Şabranın dörd kəndinin sakinləri selin uçurduğu körpünün təmirini gözləyir VİDEO
Şabran, 18 noyabr, Elxan Yusifli, AZƏRTAC
Şabranda 7 ay əvvəl sel sularının təsiri nəticəsində dağılan körpü təmir olunmayıb.
AZƏRTAC-ın bölgə müxbiri xəbər verir ki, cari il aprel ayının 16-da güclü sel suları Şabrançay üzərindəki avtomobil körpüsünü uçuraraq əks istiqamətdəki kəndlərlə nəqliyyat əlaqəsini müvəqqəti məhdudlaşdırmışdı. Həmin vaxt körpü ilə yanaşı çay kənarında yaşayan kənd sakinlərinin evlərinə və təsərrüfatlarına ciddi ziyan dəymişdi. Yerli qurumların köməyi ilə fəsadlar aradan qaldırılsa da körpü indiyə kimi təmir olunmayıb.
Gəndob-Xaçmaz-Yalama-Rusiya Federasiyası ilə dövlət sərhədi (6 km) – Padar avtomobil yolunun üzərində, Borbor kəndi ərazisində yerləşən körpüdən ümumilikdə Padar kəndi də daxil olmaqla 4 yaşayış məntəqəsinin sakinləri intensiv istifadə edir. Körpünün dağılması Rəhimli, Borbor və Maytablı sakinlərinin rayon mərkəzinə gediş-gəlişini çətinləşdirib.
Avtomobillər hazırda çayın içərisindən keçərək rayon mərkəzinə gedir. Piyadalar üçün müvəqqəti keçid yaradılıb. Amma suyun səviyyəsi artanda piyadaların yolu kəsilir, sürücülər isə digər yollardan istifadə etmək məcburiyyətində qalır. Bu da məsafənin kilometrlərlə uzanmasına, əlavə yanacaq və zaman sərfinə səbəb olur.
“Bu yol 2021-ci ildə çəkilib. Körpü də həmin vaxt tikilib. Aprel ayında çaya güclü sel gəldi. Sel suları kəndi basdı. Kəndə çıxan suyun qarşısını almaq üçün texnikalar körpünün yanını qazaraq suyun qarşısını açdılar. O vaxtdan da belə vəziyyət yaranıb.
Borbor kəndindən Padar kənd tam orta məktəbinə 27 şagird gəlir. Bu uşaqların məktəbə gediş-gəlişi zamanı valideynlər böyük çətinliklə üzləşirlər”, - deyə kənd sakini Akif Fərmanov söyləyib.
Sakinlər çayda suyun səviyyəsi qalxanda daha çox çətinliklə üzləşdiklərini bildirirlər.
Ərazidə olduğumuz zaman avtomobillərin suyun içindən keçdiyini müşahidə etdik. Minik avtomobilləri üçün suyun içindən keçmək daha çətindir. Bu səbəbdən yolda hərəkətin intensivliyi xeyli azalıb.
“Maşınlarımız buradan keçəndə dağılır. İndi çayda su azdır. Yağış yağanda, su çox alanda maşının içinə də dolur. Evim Rəhimli kəndindədir. Mən hər gün bu yolu gedib-gəlirəm. Bura bağlı olanda rayon mərkəzinə başqa yolla gedirəm. Yolum 20-30 kilometr uzanır”, - deyə sürücü Elçin Müseyibov söyləyib.
“Mənim təsərrüfatım çayın bir tərəfində, evim isə başqa tərəfindədir. Otumuzu yükləyib maşına buradan keçə bilmirik. Qarşı tərəfə doqquz kilometr aralıdan keçməli oluram. Çox çətindir”, - deyə Borbor kənd sakini Elvin Məlikov müsahibəsində söyləyib.
Şabran Rayon İcra Hakimiyyəti (RİH) başçısı aparatının Ərazi idarəetmə və yerli özünüidarəetmə orqanları ilə iş şöbəsinin baş məsləhətçisi Daşqın Məmmədov AZƏRTAC-ın bölgə müxbirinə müsahibəsində bildirib ki, Borbor kəndində Şabrançay üzərindəki körpünün təmiri ilə əlaqədar müvafiq dövlət orqanlarına müraciət olunub.
“Bu il aprel ayının 16-da yağan intensiv yağışlar nəticəsində yaranmış sel suları Şabran rayonunun yol təsərrüfatına ciddi ziyan vurub. Sel Şabrançay və Dəvəçi çayı üzərindəki bir neçə körpünü sıradan çıxarıb. Seldən bir gün sonra görülən işlər nəticəsində yollarda hərəkət bərpa edilib, müvəqqəti keçidlər qoyulub. Hazırda da həmin alternativ keçidlərdən istifadə olunur. Körpülərin əsaslı təmiri üçün Şabran RİH tərəfindən müvafiq dövlət qurumlarına müraciətlər və məlumatlar göndərilib. Bundan sonra əraziyə gəlib körpülərə baxış keçiriblər”, - deyə Daşqın Məmmədov söyləyib.
Azərbaycan Avtomobil Yolları Dövlət Agentliyinin (AAYDA) mətbuat katibi Anar Nəcəfli AZƏRTAC-ın sorğusuna cavab olaraq bildirib ki, körpünün təmiri ilə bağlı təkliflər hazırlanaraq aidiyyəti üzrə təqdim olunub: “Sözügedən körpünün bərpası ilə bağlı mütəxəssislər tərəfindən həmin əraziyə baxış keçirilib. Təkliflər hazırlanaraq aidiyyəti üzrə təqdim edilib. Maliyyə vəsaiti ayrılan kimi, həmin ərazidə körpünün bərpası istiqamətində işlər həyata keçirəcək”.
Bölmənin digər xəbərləri
