Cəbi Bəhramov: “Virtual Qərbi Azərbaycan ensiklopedik toplusu” tarixi həqiqətləri ortaya qoyur VİDEO
Bakı, 29 dekabr, AZƏRTAC
Virtual Qərbi Azərbaycan ensiklopedik toplusu Prezident İlham Əliyevin 2022-ci il dekabrın 24-dəki müraciətinə cavab olaraq hazırlanıb. Çox qısa müddət ərzində möhtəşəm və fundamental bir iş ortaya qoyulub.
Bu sözləri AZƏRTAC-a açıqlamasında AMEA-nın Abbasqulu Ağa Bakıxanov adına Tarix və Etnologiya İnstitutunun Qərbi Azərbaycan tarixi şöbəsinin rəhbəri, "Virtual Qərbi Azərbaycan" ensiklopedik toplusunun elmi rəhbəri Cəbi Bəhramov söyləyib.
O bildirib ki, bu ensiklopedik topluda Qərbi Azərbaycan tarixi ilə bağlı olan bütün məsələlər öz əksini tapıb: "Siyasi, sosial-iqtisadi, mədəni və dini sahələrə dair məlumatlar etibarlı mənbələrə, rəsmi və arxiv sənədlərinə əsaslanaraq hazırlanıb. Toplu 16 cilddən ibarətdir. Bu cildlərin 10-u birbaşa Qərbi Azərbaycan ərazisində yerləşən tarixi yaşayış məntəqələrimizin tədqiqinə həsr olunub. Digər 6 cilddə isə İrəvan şəhəri, ilk dəfə olaraq Gümrü şəhəri, ermənilərin köçürülməsi xəritələri, azərbaycanlıların deportasiyası xəritələri, eləcə də 513-dən artıq məscid haqqında məlumatlar yer alıb. Bütün materiallar elmi süzgəcdən keçirilib, sistemləşdirilib və Qərbi Azərbaycan tarixinin ümumiləşdirici şəkildə yazılması üçün möhkəm elmi baza yaradılıb".
O əlavə edib ki, bu görülən işlər Prezident İlham Əliyevin çağırışlarına tam cavab verir. Xüsusilə Elmlər Akademiyasının 80 illik yubiley tədbirində Qərbi Azərbaycanla bağlı səsləndirilən fikirlər, o cümlədən Göyçə gölünün heç vaxt “Sevan” adlanmaması ilə bağlı deyilənlər tarixi həqiqətin açıq ifadəsidir.
“Biz burada real və obyektiv tarixi ortaya qoymuşuq. Məhz buna görə də erməni tərəfi təşviş içindədir. Çünki tarix göstərir ki, hazırkı Ermənistan adlanan ərazi qanunsuz şəkildə formalaşdırılıb. 1918-ci il mayın 29-da qəbul edilən qərarlar və sonrakı dövrdə sovet Rusiyasının Azərbaycan torpaqlarını hədiyyə etməsi faktiki olaraq xalqın iradəsinə zidd və cinayət xarakterli addımlar idi. Qərbi Azərbaycan tarixinin yazılması üçün artıq çox möhkəm bir elmi təməl qoyulub və bu tədqiqatlar bundan sonra da davam etdiriləcək”, - deyə elmi rəhbər vurğulayıb.
O, bu ensiklopedik toplunun hazırlanmasında təkcə müəllif kimi deyil, həm də elmi redaktor kimi iştirak etdiyini diqqətə çatdıraraq deyib: “Buna görə də tam məsuliyyətlə deyə bilərəm ki, materiallar olduğu kimi, heç bir təhrifə yol verilmədən təqdim olunub. Bizə məxsus Əmir Səid məqbərəsini ermənilər türkmənlərə aid abidə kimi təqdim edirlər. Digər tərəfdən Göy Məscidi 2016-cı ildən etibarən Ermənistan Mədəniyyət Nazirliyi tərəfindən 99 illik müddətə İran səfirliyinə icarəyə verilib. Halbuki bu məscidin farslara və ya İrana aidiyyəti yoxdur”.
Bölmənin digər xəbərləri
