Astaralı “canlı xəritə” - 7 yaşında 190 ölkəni tanıyır VİDEO
Astara, 8 may, AZƏRTAC
Astaranın Şahağacı kəndindən olan 7 yaşlı Səid Fərzəlizadə öz qeyri-adi bacarığı ilə hər kəsi heyrətləndirir. Onun böyük kəşflər dünyasına gedən yolu sadə bir xəritə ilə başlayıb. Hazırda dünyanın siyasi və fiziki xəritəsini əzbər bilən balaca Səid coğrafi bilikləri ilə öz yaşıdlarını xeyli qabaqlayır.
AZƏRTAC-ın bölgə müxbiri xəbər verir ki, 1-ci sinif şagirdi olan Səid artıq yuxarı siniflərdə tədris olunan coğrafiya mövzularını mənimsəyib. O, dünya ölkələrinin paytaxtlarını, bayraqlarını, əhalisinin sayını, həmçinin materik və okeanlarla bağlı geniş məlumatları demək olar ki, əzbər bilir. Səidin yaddaşı, öyrənmək həvəsi və araşdırma qabiliyyəti onu yaşıdlarından fərqləndirən əsas xüsusiyyətlərdəndir.
Səidin bu gün nümayiş etdirdiyi bacarıqların arxasında böyük bir mübarizə dayanır. Belə ki, o, iki yaş yarımına qədər ciddi nitq məhdudiyyəti yaşayıb. Valideynləri ona “psixi nitq inkişafının ləngiməsi” diaqnozu qoyulduqdan sonra paytaxtdakı ixtisaslaşmış mütəxəssislərə müraciət ediblər. Loqoped və psixoloqların sistemli dəstəyi nəticəsində Səidin nitqi tədricən bərpa olunub. Bu uğurlu reabilitasiya prosesi onun həyatında mühüm dönüş nöqtəsinə çevrilərək, gələcək kəşfləri üçün yeni bir mərhələnin təməlini qoyub.
Onun bu maraqlı səyahəti babası Məhərrəm Baxşıyevin zirzəmisində toz basmış köhnə bir xəritə ilə başlayıb. Məhərrəm kişi deyir ki, bir gün təsadüfən həmin xəritəni görən balaca Səid maraqla soruşub: “Baba, bu nədir?”. Babası ona bu kağız parçasında bütün dünyanın – uca dağların, nəhəng materiklərin və uzaq ölkələrin yerləşdiyini izah edib. Səidin cavabı isə qəti və heyrətamiz olub: “Mən bunların hamısını öyrənmək istəyirəm!”. Elə həmin andan etibarən o köhnə xəritə Səid üçün böyük dünyaya açılan sehrli bir qapıya çevrilib”.
Hətta Bakıya gedəndə də ağlı-fikri o xəritədə qalıbmış. Babasına zəng edib xəritənin yerində olub-olmadığını dəfələrlə dəqiqləşdirən Səid kəndə qayıdan kimi dərslərə başlamaq istəyini dilə gətirib. Babasının köməkliyi ilə hər gün beş ölkə haqqında məlumatlar toplayıb. Bu qısa müddətdə balaca Səid ölkələrin coğrafi yerləşməsindən tutmuş paytaxtlarına, okeanlardan dənizlərə qədər ən çətin məlumatları yaddaşına köçürə bilib.
Məhz babasının köməyi ilə Səidin coğrafiyaya marağı sürətlə inkişaf edib. O, bu gün artıq dünyanın 190-dan çox ölkəsi haqqında geniş məlumata sahibdir.
Anası Lalə Baxşıyeva deyir ki, Səid çox araşdırmaçı və öyrənməyə həvəsli uşaqdır. Riyaziyyat, Azərbaycan dili, ingilis dili – hansı sahə olursa-olsun, daim yeni biliklər əldə etməyə çalışır. Məktəbdə də fərqlənən xüsusiyyətlərindən biri çox sual verməsidir. Müəllimləri bildirirlər ki, Səid tez-tez maraqlı suallar verir. Onlar da Səidin marağını nəzərə alaraq bütün suallarını səbirlə cavablandırırlar.
Səid Fərzəlizadə bildirir ki, babası onun üçün üç müxtəlif xəritə alıb. Bunlardan biri siyasi xəritə, digəri fiziki xəritə, üçüncüsü isə Azərbaycanın xəritəsi olub. Onun sözlərinə görə, babası ona həmin xəritələrin hamısını öyrədib. Bildirir ki, bu məşğələlər yaddaşının daha da güclənməsinə kömək edib. Hazırda dünyanın bütün ölkələrinin bayraqlarını, paytaxtlarını və dövlət dillərinin adını bildiyini söyləyir.
Bu balacanın maraqları təkcə coğrafiya ilə bitmir. O, riyaziyyata da böyük həvəs göstərir. Ailəsi isə onun istedad və bacarıqlarını düzgün istiqamətdə inkişaf etdirmək üçün çalışır. Valideynləri bildirirlər ki, Səidin gələcəkdə hansı sahəni seçməsindən asılı olmayaraq, ona hər zaman dəstək olacaqlar və seçimində yanında dayanacaqlar.
Müxbir - İlkin Adıyev
Bölmənin digər xəbərləri
