SİYASƏT
Qondarma “erməni soyqırımı” - böyük siyasətdə həm alət, həm də işğalçılıq ideyası VİDEO
Bakı, 24 aprel (AZƏRTAC). Bütün dünyada qondarma “erməni soyqırımı”nı təbliğ edən erməni millətçiləri nə üçünsə tarixçilərin arxivləri açmaq, dünyaya real tarixi faktları göstərmək çağırışlarına məhəl qoymurlar. Aydındır ki, bu, onlara sərf etmir, çünki arxiv materialları erməni millətçiliyi və terrorizminin əsl mahiyyətini açıb göstərmiş olacaq, “erməni soyqırımı” haqqında yalançı faktları alt-üst edəcəkdir. Lakin tarixi həqiqəti əks etdirən faktlar mövcuddur.
XIX əsrin ikinci yarısında Türkiyədə “erməni məsələsi” qaldırılmazdan əvvəl ermənilər Osmanlı tərkibində ən çox üstünlüklərə malik xalqlardan biri idi. Lakin Osmanlı imperiyasını zəiflətmək, ölkə daxilində münaqişə yaratmaq üçün xaricdə yaşayan ermənilər yeni “erməni özünüdərki” və Türkiyə ərazisində erməni dövlətinin yaradılması məsələsini ortaya atdılar. Buna nail olmaq üçün isə qanlı toqquşmalar yaratmaqla Avropanı inandırmaq lazım idi ki, Türkiyədə ermənilər məhv edilir. Bu faktları çar Rusiyasının general-mayoru, Rus Qafqaz Ordusunun qərargah rəisi Bolxotinovun raportunda da əks olunub. Beləliklə, erməni ideoloqları istəklərinə nail olmaq üçün öz soydaşlarına belə bir fikir aşılamağa başladılar: “Sadəcə qan tökmək lazımdı və ermənilər Avropanın köməyi ilə hər şey əldə edəcəklər”.
Elə bunun ardınca ermənilərin “Qnçak”, “Daşnaksütyun” kimi terror təşkilatları yaranır və Kukunyan, Serop və Andranik kimi quldurların rəhbərliyi altında türk kəndlərinə hücumlar təşkil edilir. Məqsəd isə aydın idi: sadə ermənilərlə türkləri qanlı toqquşmalara təhrik etmək və sonra da ermənilərin Türkiyədə vəziyyətinin ağır olmasını bütün dünyaya car çəkmək. Əslində isə ermənilərin türklərə qarşı başladığı soyqırımı nəticəsində minlərlə uşaq, qadın, qoca xüsusi amansızlıqla qətlə yetirildi. Rus generalı yazır ki, erməni terrorçuları istəklərinə nail olmaq üçün yüzlərlə erməni ailəsini qıraraq bunu türklərin törətdiyini bəyan edirdi. Türk əsgərləri günahsız ermənilərə silah çəkmədiyi halda, bunu erməni terrorçuları edirdilər. Amma erməni millətçilərinin minlərlə insanın qanı bahasına Türkiyə ərazisində dövlət qurmaq planları ürəklərində qaldı.
Bundan sonra isə daşnaklar öz planlarını Qafqazda reallaşdırmağa başladılar. Rus generalı qeyd edir ki, erməni ideoloqları türklərlə müharibədə çar Rusiyasına kömək olmaq adı altında silahlanmağa başladılar. Bu silahlar Qafqazda əvvəlcə dinc azərbaycanlılara qarşı yönəldi. Andranikin rəhbərliyi altında Azərbaycan torpaqlarında görünməmiş qətliamlar və vəhşiliklər törədildi. 1905-1906-cı illərdə İrəvan və Gəncə quberniyalarında 200, Şuşa, Cəbrayıl və Zəngəzurda 75 azərbaycanlı kəndi erməni millətçiləri tərəfindən talan edildi, minlərlə insan öldürüldü. 1918-ci ilin mart-aprelində erməni daşnakları Bakı, Şamaxı, Quba və Lənkəranda 30 mindən çox azərbaycanlını qətlə yetirdi, 10 minlərlə insan öz torpaqlarından qovuldu. Təkcə Bakıda 10 minə yaxın azərbaycanlı xüsusi qəddarlıqla öldürüldü, Şamaxıda 58 kənd dağıdıldı, 1653-ü qadın və 965-i uşaq olmaqla 7 min nəfər məhv edildi. Quba ərazisində 122, Qarabağın dağlıq hissəsində 150, Zəngəzurda 115, İrəvan quberniyasında 211 kənd yerlə yeksan olundu.
Ermənilər on minlərlə türk və azərbaycanlıların qanı bahasına, yalan və uydurma “soyqırımı” əsasında Azərbaycanın tarixi torpağı olan İrəvan quberniyasında öz dövlətlərini qurdular. Amma İrəvan memarlığı erməniləri çox qıcıqlandırırdı. Elə buna görə də bu torpaqların guya ermənilərə məxsus olmasını göstərmək üçün sovet hakimiyyəti illərində İrəvan qalası, Şah sarayı tamamilə məhv edildi. Onların yerində isə indiki İrəvanın mərkəzi meydanı salındı.
İllər sonra erməni ideoloqları “erməni məsələsi”ni bir əsr bundan öncəki üsullarla yenidən qaldırdılar. Ötən əsrin 80-90-cı illərində erməni millətçiləri sovet hakimiyyətindəki havadarlarının dəstəyi ilə Azərbaycan torpaqlarının işğalına, dinc insanların qətlinə başladılar. Eyni ssenari...
XİX əsrdə Türkiyədə ermənilər öz soydaşlarını qırıb bunu türklərin üzərinə atdığı kimi, XX əsrdə Sumqayıtda Qriqoryanın başçılığı ilə eyni ssenari həyata keçirildi. Onlar öz millətindən olan insanları öldürərək bunu ermənilərin Azərbaycanda sıxışdırılması kimi qələmə verdilər. Elə bunun ardınca da Qarabağ məsələsi qaldırıldı. Xocalı, Qaradağlı, Başlıbel faciələri... Minlərlə dinc azərbaycanlının, qadın, uşaq və qocanın amansız qətlləri...
İndi erməni millətçiləri qondarma “erməni soyqırımı”nı hər dəfə qabardaraq özlərini məzlum kimi göstərməyə çalışırlar. Amma bu məzlumluğun arxasında əsrlərdən bəri uzanan qanlı əllər dayanır. Artıq bütün dünyaya məlumdur ki, qondarma “erməni soyqırımı” böyük siyasətdə həm alət, həm də işğalçılıq ideyasıdır.
Elşən Şahbalayev
AZƏRTAC-ın müxbiri