Azərbaycanın Misirdəki səfiri “Nil Əl-Əxbar” telekanalında “Bakı-2015” ilk Avropa Oyunlarından danışıb VİDEO
Qahirə, 15 may, AZƏRTAC
Azərbaycanın Misirdəki səfiri Şahin Abdullayev geniş tamaşaçı auditoriyasına malik “Nil Əl-Əxbar” televiziya kanalına müsahibə verib.
“Bakı-2015” ilk Avropa Oyunları barədə danışan Ş.Abdullayev iyunun 12-dən 28-dək keçiriləcək yarışlarda 49 ölkədən 6 mindən çox idmançının 20 idman növündə mübarizə aparacağını diqqətə çatdırıb.
Səfir Azərbaycanın 2012-ci ildə Londonda keçirilmiş Yay Olimpiya Oyunlarında 10 medal qazandığını qeyd edib. Bildirilib ki, həmin yarışlarda Azərbaycan dünyanın 200-dən artıq ölkəsi arasında 30-cu yeri, Avropa ölkələri arasında isə 15-ci yeri tutub.
Azərbaycan hökumətinin gənclərə və idmana göstərdiyi xüsusi qayğıdan danışan Ş.Abdullayev son on il ərzində ölkəmizdə 40-dan çox Olimpiya Kompleksinin inşa edildiyini söyləyib. Bundan başqa, səfir 2017-ci ildə Azərbaycanın İslam Həmrəyliyi Oyunlarına da ev sahibliyi edəcəyi barədə məlumat verib.
Ş.Abdullayev bildirib ki, Azərbaycan Şərq və Qərb mədəniyyətlərinə sahibdir və İslam dünyasının ayrılmaz bir hissəsidir. Səfir, həmçinin ölkəmizdə keçirilən ümumdünya mədəniyyətlərarası, dinlərarası və sivilizasiyalararası forumlar barədə məlumat verib, Azərbaycanda tolerantlığın yüksək səviyyədə olduğunu diqqətə çatdırıb.
İlk Avropa Oyunlarının Azərbaycanda keçirilməsinin başlıca səbəblərinə toxunan səfir qeyd edib ki, ölkə iqtisadiyyatı son illər sürətlə inkişaf edir, təbii sərvətlərdən, neft və qazdan əldə olunan gəlirlər digər sahələrə, o cümlədən idmanın inkişafına yönəldilir, azərbaycanlı idmançılar beynəlxalq arenalarda mühüm nailiyyətlər qazanırlar. “Bakı-2015” dünya ölkələrinin diqqətini Azərbaycana yönəltmək, eyni zamanda, ölkəmizdə idman və turizmin inkişafına təkan vermək baxımından müstəsna əhəmiyyətə malikdir.
Ölkəmizin əsas problemi olan Dağlıq Qarabağ münaqişəsi barədə də danışan Ş.Abdullayev vurğulayıb ki, Azərbaycanın 20 faiz torpaqları Ermənistan silahlı qüvvələri tərəfindən işğal olunub, bir milyondan çox azərbaycanlı öz doğma torpaqlarından qovulub. BMT Təhlükəsizlik Şurasının bununla bağlı qəbul etdiyi dörd qətnamə Ermənistan tərəfindən indiyədək yerinə yetirilməyib.
1990-cı illərin əvvəllərində dövlət müstəqilliyini bərpa etmiş Azərbaycanın çox çətin dövrlər yaşadığını diqqətə çatdıran səfir hakimiyyətin bir neçə dəfə dəyişdiyini, ölkəmizin daxildən və xaricdən bir çox təzyiqlərlə üzləşdiyini söyləyib. Qeyd olunub ki, 1993-cü ildə Heydər Əliyevin yenidən hakimiyyətə gəlməsi ilə ölkədə ciddi dəyişikliklərin həyata keçirilməsinə başlanılıb. Məhz ulu öndər Heydər Əliyevin müdrik siyasəti nəticəsində qısa zaman ərzində dövlətin əsaslarını gücləndirmək mümkün olub, atəşkəs əldə edilib. Ümummilli lider Heydər Əliyev tərəfindən milli enerji strategiyası müəyyənləşdirilib və bunun nəticəsi olaraq 1994-cü ildə dünyanın aparıcı şirkətləri ilə layihə dəyəri 50 milyard ABŞ dolları olan neft kontraktları - “Əsrin müqaviləsi” imzalanıb. Səfir neft və qazdan əldə edilən gəlirlərin qeyri-neft sektoruna yatırıldığını və Azərbaycan iqtisadiyyatının çoxşaxəliyinin təmin olunduğunu diqqətə çatdırıb.
Ölkələrimiz arasında əlaqələrə toxunan Ş.Abdullayev xalqlarımızın ortaq dəyərlərə malik olduğunu bildirərək deyib ki, Misir Azərbaycanın müstəqilliyini tanıyan ilk ölkələrdən biridir. Eyni zamanda, Azərbaycanın xarici siyasətinin əsas istiqamətlərindən birini ərəb və islam dünyası, xüsusilə də Misir Ərəb Respublikası ilə əməkdaşlıq təşkil edir.
Səfir son illər Misir və Azərbaycan arasında iqtisadi sahədə də əlaqələrin inkişaf etdiyini söyləyib. Məlumat verilib ki, Misirin Azərbaycandan idxal etdiyi neft və neft məhsullarının dövriyyəsi getdikcə artır. Həmçinin Misirdən Azərbaycana ixrac olunan dərman preparatlarının illik dövriyyəsində də artım var. Azərbaycanın iqtisadi imkanlarının yüksəlməsi onun Misir tərəfindən həyata keçirilən layihələrində iştirakına şərait yaradır. Bu ilin noyabrında hökumətlərarası müştərək iqtisadi komissiyanın növbəti iclası keçiriləcək. İclasda hər iki dövlətdən rəsmi nümayəndə heyətləri ilə yanaşı, iş adamlarının iştirakı gözlənilir. Azərbaycan Misirlə enerji, neft və neft məhsulları, neft emalı və digər sahələrdə əməkdaşlıqda maraqlıdır. Eləcə də iş adamları arasında müxtəlif sahələrdə əməkdaşlıq imkanları öyrəniləcək.
Veriliş zamanı Azərbaycanın yüksək inkişaf tempini və “Bakı-2015” ilk Avropa Oyunlarına hazırlıq işlərinin gedişini əks etdirən videoçarxlar nümayiş olunub.
Müsahibəyə aşağıdakı link vasitəsi ilə baxmaq mümkündür:
https://www.youtube.com/watch?v=y2G4NDDqgfo&feature=youtu.be
Asya Hacizadə
AZƏRTAC-ın xüsusi müxbiri
Qahirə
Bölmənin digər xəbərləri
