İDMAN

Qadınlar arasında 10 metrdən hava tüfəngi ilə atəşaçma yarışının qalibi serbiyalı idmançı olub [YENİLƏNİB] VİDEO

16.06.2015 [17:28]
Çap et
A⁺ A^-

“Bakı-2015”-də qadınlar arasında atıcılıq idmanının səngər stendi yarışının qalibi ispaniyalı Fatima Qalvez olub. O, mümkün 15 atışdan 13-nü düzgün yerinə yetirərək San-Marino idmançısı Arianna Perillini qızıl medaldan məhrum edib. Rusiyalı Elena Tak isə bürünc medala sahib olub.

Qaliblərə medalları San-Marino Milli Olimpiya Komitəsinin prezidenti Can Primo Cardi təqdim edib.

17:02

Qadınlar arasında atıcılıq idmanının səngər stendi yarışının final mərhələsi başlayıb.

Finalda ispaniyalı Fatima Qalvez ilə San-Marino idmançısı Arianna Perilli qızıl medal uğrunda mübarizə aparırlar.

Rusiyalı Elena Stak ilə Tatyana Barsuk isə bürünc medal uğrunda yarışırlar.

Azərbaycan idmançısı Alina Rəfixanova yarışın təsnifat mərhələsində mübarizəni dayandırıb.

16:32

Birinci Avropa Oyunlarında qadınlar arasında atıcılıq idmanının səngər stendi yarışının yarımfinal mərhələsi keçirilir.

Yarımfinalda Rusiya, Türkiyə, İspaniya, Finlandiya və San-Marino idmançıları mübarizə aparırlar. Rusiya bu mərhələdə iki idmançı ilə təmsil olunur. Digər ölkələrdən isə bir idmançı mübarizəyə qoşulub.

14:46

“Bakı-2015” birinci Avropa Oyunlarının atıcılıq idman növünün qadınlar arasında 10 metrdən hava tüfəngi ilə atəşaçma yarışının qalibi serbiyalı Andera Arsoviç olub.

Səkkiz ölkədən idmançıların mübarizə apardığı finalda A.Arsoviç 207.8 xal qazanaraq qızıl medala yiyələnməklə gələn il Braziliyada keçiriləcək Yay Olimpiya Oyunlarında iştirak hüququ əldə edib.

Yarışda gümüş medala isveçrəli Sara Hornonq, bürünc medala isə almaniyalı idmançı Barbara Enqleder sahib çıxıb.

Sonra qaliblərin mükafatlandırma mərasimi olub. Qaliblərə medalları Avropa Atıcılıq Konfederasiyasının vitse-prezidenti Pekka Kusisto təqdim edib.

Andera Arsoviç 2010-cu ildə Avropa çempionatının qalibi və 2013-cü ildə dünya kubokunun sahibi olub. Bundan başqa o, “London-2012”də iştirak edib.

14:15

"Bakı-2015" birinci Avropa Oyunlarının atıcılıq idman növünün qadınlar arasında 10 metrdən hava tüfəngi ilə atəşaçma yarışlarının finalında 8 ölkənin idmançısı mübarizə aparır. Yarışın qalibi qızıl medal almaqla yanaşı gələn il Braziliyada keçiriləcək Yay Olimpiya Oyunlarında iştirak hüququ da qazanacaq.

12:56

Qadınlar arasında 10 metrdən hava tüfəngi ilə atəşaçma yarışının təsnifat mərhələsi başlayıb.

Azərbaycan təmsilçilərinin iştirak etmədiyi bu yarışda 39 idmançı mübarizə aparır.

12:49

Otuz beş idmaçının mübarizə apardığı kişilər arasında 10 metrdən hava tüfəngi ilə atəş yarışının qalibi məlum olub. Belaruslu idmançı Vitali Bubnoviç finalda 206,6 nəticə göstərərək qızıl medala sahib çıxıb. O, "Rio-2016" Yay Olimpiya Oyunlarında iştirak etmək hüququ da qazanıb. Gümüş medala “Bakı-2015”-in idman elçisi italiyalı Nikkolo Kampriani, bürünc medala isə israilli Serqey Riçter sahib çıxıb.

Sonra qaliblərin mükafatlandırma mərasimi olub. Qaliblərə medalları Avropa Atıcılıq Konfederasiyasının vitse-prezidenti Kerstin Bodin təqdim edib.

Qeyd edək ki, Vitali Bubnoviç 2014-cü il Dünya Çempionatında üçüncü yeri tutub.

12:41

Artıq qadınlar arasında səngər stendi yarışının təsnifat mərhələsi də start götürüb.

Səngər stendi yarışında Azərbaycanı 21 yaşlı Alina Rəfixanova təmsil edir. O, son iki ildə atıcılıqla məşğul olmasına baxmayaraq, güclü oyunçudur. A.Rəfixanova Avropanın ən yaxşı beş idmançısı, Olimpiya və dünya çempionları ilə mübarizə aparacaq.

12:34

Kişilər arasında səngər stendi yarışının təsnifat mərhələsi də başlayıb.

Bu mərhələdə Azərbaycan idmançılarından Elvin İsmayılov və Əlmirzə Quliyev mübarizə aparacaq.

10:24

Kişilər arasında 10 metrdən hava tüfəngi ilə atəş yarışının təsnifat mərhələsi başlayıb.

Bu mərhələdə 35 idmançı mübarizə aparır. Yarışda Azərbaycan idmançısı iştirak etmir.

09:44

İyunun 16-da Bakı Atıcılıq Mərkəzində birinci Avropa Oyunlarının atıcılıq yarışları başlayıb.

AZƏRTAC xəbər verir ki, iyunun 22-dək davam edəcək yarışların ilk günündə kişilər və qadınlar arasında 10 metrdən hava tüfəngi ilə atəş açmaq, o cümlədən kişilər və qadınların səngər stendi yarışları keçirilir. Kişilər arasında səngər stendi yarışının ilk təsnifat mərhələsində Azərbaycanı Elvin İsmayılov və Əlimirzə Quliyev, qadınların yarışında isə Alina Rafiqxanova təmsil edir.

Yeddi yarış günündə ümumilikdə 210 kişi və 120 qadın idmançı 19 medal dəsti uğrunda mübarizə aparacaq. Yarışlar 9 kişi, 6 qadın və 4 qarışıq komanda halında keçiriləcək. Bu idman növündə Azərbaycanı 10 idmançı təmsil edir.

Bununla yanaşı, 15 fərdi yarışın qalibləri birbaşa “Rio-2016” Yay Olimpiya Oyunlarında iştirak etmək hüququ qazanacaqlar.

Qeyd edək ki, atıcılıq ilk dəfə Olimpiya Oyunlarının proqramına 1896-cı ildən daxil edilib. 2000-ci ildə keçirilən Sidney Yay Olimpiya Oyunlarında Azərbaycanı təmsil edən Zemfira Meftəhəddinova qızıl medal qazanıb.