SİYASƏT
Azərbaycan həqiqətlərinin dünya ictimaiyyətinə çatdırılmasında gənclərin üzərinə mühüm vəzifələr düşür [YENİLƏNİB] VİDEO
Bakı, 3 iyun, C.Rüstəmov, E.Hüseynov, AZƏRTAC
Azərbaycan həqiqətlərinin dünya ictimaiyyətinə çatdırılmasında gənclərin üzərinə mühüm vəzifələr düşür. Gənclərimiz çalışmalıdırlar ki, üzərlərinə düşən bu məsul vəzifənin öhdəsindən layiqincə gəlsinlər.
AZƏRTAC xəbər verir ki, bu fikirlər iyunun 3-də Bakıda işə başlayan Dünya Azərbaycanlılarının IV Qurultayı çərçivəsində keçirilən “Keçmişin təcrübəsi və müasir düşüncə - Azərbaycan diaspor hərəkatında gənclər: yeni baxış və yeni strategiya” mövzusundakı panel sessiyada səsləndirilib.
Diasporla İş üzrə Dövlət Komitəsinin sədr müavini Ramin Məmmədovun moderatorluğu ilə keçən panel sessiyada “Gənclər Azərbaycan diasporunun fəaliyyət tarixində yeni mərhələnin aparıcı qüvvəsi kimi”, “Yeni nəsli fərqləndirən başlıca keyfiyyətlər”, “Azərbaycan diasporunun indiki nəsli ilə gənclər arasında fikir və düşüncə fərqi”, “Keçmiş nəslin təcrübəsi və yeni nəslin müasir yanaşma tərzi - ümumi harmoniyanı necə yaratmalı?” “Keçmiş təcrübənin yeni nəslə ötürülməsi üsulları hansılardır?” mövzularında diskussiyalar aparılıb.
Ramin Məmmədov panel sessiyasını açaraq qeyd edib ki, Azərbaycanın diaspor hərəkatının qısa tarixinə nəzər saldıqda, ulu öndər Heydər Əliyevin bu yöndə danılmaz fəaliyyətinin şahidi oluruq. Vaxtilə Ulu Öndərin təşəbbüsü ilə xarici ölkələrdə təhsil almağa göndərilən insanlar bu gün diasporumuzun fəaliyyətində mühüm rol oynayırlar. Bu siyasəti Prezident İlham Əliyev uğurla davam etdirir, diasporumuzun fəaliyyətinin daha da gücləndirilməsi istiqamətdə önəmli addımlar atılır.
Erməni təbliğatına qarşı gənclərin fəallığının daha da artırılmalı olduğunu vurğulayan R.Məmmədov deyib: “Gənclərimiz müasir innovativ texnologiyalardan istifadə etməklə bu mübarizədə öz sözlərini deməlidirlər. Prezident İlham Əliyev də Azərbaycan həqiqətlərinin dünya ictimaiyyətinə çatdırılmasında gənclərin rolunu vurğulayıb və informasiya üstünlüyünün önəmini qeyd edib. İndi konkret addımlar atılmalı, real nəticələr əldə edilməldir”.
Azərbaycan Respublikası Prezidenti Administrasiyasının ictimai-siyasi məsələlər şöbəsinin xaricdə yaşayan azərbaycanlılarla iş sektorunun məsləhətçisi Natiq Əliyev çıxış edərək bildirib ki, internet bu gün gənclərin həyatının ayrılmaz hissəsinə çevrilib. Bu vasitədən səmərəli istifadə olunarsa, ölkə həqiqətləri barədə informasiyaların daha çox insana çatmasına nail ola bilərik. Bu fəaliyyət mərkəzləşdirilmiş formada təşkil olunmalı, gənclər təşkilatları bir-biriləri ilə əlaqəli işləməli, həmrəylik nümayiş etdirməlidirlər.
Kanada-Azərbaycan Əməkdaşlıq Assosiasiyasının sədri, Vaterlo Universitetinin professoru İlham Axundov deyib ki, hər bir zamanın dominant anları var. Regionda və dünyada olan siyasi sıçrayışları və informasiya müharibəsini də nəzərə alsaq, gənclər bu istiqamətdə daha aktiv olmalıdırlar. Lobbiçilikdən danışan İ.Axundov bildirib ki, Azərbaycan lobbisi artıq formalaşmağa başlayıb, bu tarix 20 ilə yaxın bir dövrü əhatə edir və bu gün Azərbaycan diasporu əlaqəli fəaliyyət göstərir. O deyib: “Zənnimcə, müvəffəqiyyətin ən qısa yolu auditoriyalardan keçir. Misal üçün, Azərbaycan tarixi dərsi Torontoda magistrlara təqdim olundu və onlar bu istiqamətdə araşdırmalar apardılar. Onlar Azərbaycana gəldilər, reallıqları öz gözləri ilə gördülər. Geri qayıtdıqdan sonra isə burada gördüklərini tezis formasında çap etdirdilər. Daha sonra Kanadanın böyük bir nümayəndə heyəti Azərbaycana gələrək, burada mühüm tədbirdə iştirak etdi. Bu, bir daha göstərdi ki, auditoriya ilə aparılan işlər öz bəhrəsini verir”.
“Bu gün Prezident İlham Əliyev informasiya sahəsində hələ görüləsi çox işlərin olduğunu bildirdi. Bunu nəzərə alaraq, işimizi daha da canlandırmalıyıq. Bu gün müasir dünyada yeni innovativ texnologiyalar populyarlıq qazanır. İstifadə etdiyimiz kompyuterlər artıq daha innovativ vasitələrlə əvəzlənir. Belə bir şəraitdə məlumatları operativ ötürməyi bacarmalıyıq. Bu baxımdan texniki şərait mövcuddur, yalnız qalır onu reallıqda tətbiq etmək”, - deyə İ.Axundov diqqətə çatdırıb.
Rusiya Azərbaycanlıları Gənclər Təşkilatının icraçı direktoru Emin Hacıyev çıxış edərək deyib: “Prezident İlham Əliyev qurultayın açılışında üç önəmli məsələyə toxundu. Bunlar diasporun ən zəif nöqtələrini əhatə edir: mediada boşluqlar, qanunvericilik orqanlarında boşluqlar, azərbaycanlı iş adamlarının Azərbaycana sərmayə yatırması. Hər üç istiqamətdə görüləsi işlər çoxdur. Çalışmalıyıq ki, hər kəs bu işdə əlindən gələn köməyi əsirgəməsin”.
Rusiya Azərbaycanlıları Gənclər Təşkilatının fəaliyyəti barədə də məlumat verən Emin Hacıyev qurumun reallaşdırdığı tədbirlərdən, həyata keçirdiyi layihələrdən danışıb.
Azərbaycan-Rumıniya Gənclər və Mədəniyyət Assosiasiyasının sədri İqbal Hacıyev müasir dövrdə mediada innovativ texnologiyalardan istifadənin önəmindən danışaraq sosial şəbəkələrdə - facebook və tvitter-də gənclərin aktiv olmasının zəruriliyini bildirib. Qeyd olunub ki, bu gün dünyada sosial şəbəkələr bir təbliğat vasitəsinə çevrilib. Azərbaycanlı gənclər də bu vasitələrdən istifadə etməklə, ölkəmiz haqqında reallıqların daha geniş arealda yayılmasında fəallıq göstərməlidirlər.
Fasilədən sonra panel ikinci hissə ilə işini davam etdirib.
Norveç Azərbaycan Gənclər Assosiasiyasının (NAYO) sədri Ramil Əliyev xarici ölkədə yaşayan həmvətənlərimizin həmin ölkələrin icraedici və qanunverici orqanlarında təmsil olunmalarının zəruriliyini vurğulayıb. “Yaxın zamanlarda Norveçdə ikinci radiomuz fəaliyyətə başlayacaq ki, bu da Azərbaycan həqiqətlərinin norveçlilərə çatdırılmasında mühüm rol oynayacaq. Hər bir cəmiyyətin öz marağı olduğu üçün çalışmalıyıq ki, bunu nəzərə alaq və təbliğatımızı bu yöndə quraq”, - deyə R.Əliyev qeyd edib.
Ukraynada azərbaycanlı gənclərin fəallığından danışan Ukrayna Azərbaycanlıları Gənclər Birliyinin sədri İlhamə Allahverdiyeva isə xalqlar arasında münasibətlərin bu işdə önəmindən bəhs edib. Bildirilib ki, gənclərimiz Ukraynanın siyasi, sosial və elmi-mədəni sahələrində təmsil olunurlar və bu, təbliğat işinin qurulmasında xüsusi məna kəsb edir. Azərbaycanda həyata keçirilən gənclər siyasəti bu baxımdan xüsusi vurğulanmalıdır.
Azərbaycan torpaqlarının 20 faizinin erməni silahlı birləşmələri tərəfindən işğalının, onun acı nəticələrinin dünya ictimaiyyətinə çatdırılmasının gənclərin ümdə vəzifələrindən olduğunu söyləyən Frankfurt Sülh Araşdırmaları İnstitutunun elmi əməkdaşı, siyasi elmlər doktoru Azər Babayev deyib: “Diaspor fəaliyyətimizin önəmli aspektlərindən biri Ermənistan-Azərbaycan, Dağlıq Qarabağ münaqişəsi ilə bağlı həqiqətlərin dünya ictimaiyyətinə dolğun çatdırılmasından ibarətdir. Bildiyiniz kimi, geniş mənada həqiqətin, gerçəkliyin necə olmasındansa, onun necə qavranılması, görünməsi daha önəmlidir. Bu cəhətdən Ermənistan-Azərbaycan münaqişəsinin Qərb elmi ictimaiyyətində təqdimatının da ilk növbədə, bir qavranılma məsələsi olduğu qənaətinə gəlmək olar. Buna bariz misal kimi, bir alman məktəb dərsliyindən sitatı diqqətinizə çatdırmaq istərdim. 2000-ci ildə Berlin şəhərinin orta məktəbləri üçün çap olunmuş 8-ci sinif coğrafiya dərsliyində Qarabağ münaqişəsinə dair “doğru inam uğrunda mübarizə” başlıqlı arayışda deyilir: “Azərilər İslam dininə itaət edirlər və buna görə də erməniləri “erməni kimliyindən” məhrum etmək istəyirlər. Onlar dini xristian olan ermənilərə ana dilində təhsil almağı, habelə erməni tarixini və coğrafiyasını öyrənməyi qadağan etmişdilər. Bundan başqa, onlar xristian dini adət-ənənələrini icra etməyə də əngəl yaradırdılar”. Beləliklə, bu dərsliyin misalında təqdimatın gerçəklikdən nə dərəcədə kəskin fərqləndiyi özünü aydın şəkildə büruzə verir. Düşünün ki, 8-ci sinif alman şagirdinin Dağlıq Qarabağ problemi barədə ilk təəssüratı yanlış formada formalaşır. Ermənilərin yalan üzərində qurulmuş bu təbliğatı şagirdlərin, yəni, gələcək nəslin ilkin təsəvvürlərinin formalaşmasına səbəb olur. Ona görə bu istiqamətdə fəaliyyətimizi daha da artırmalıyıq”.
Polşada Azərbaycanlı Gənclər Şurasının sədri, diaspora.az saytının baş redaktoru Nail Məmmədzadə çıxışında bildirib ki, Azərbaycan diasporunun əsas problemlərindən biri həmvətənlərimizin yaşadıqları ölkənin cəmiyyətinə inteqrasiya olunmasındadır. Bunun üçün hər bir kəs yaşadığı ölkənin dilini, mədəniyyətini daha yaxşı bilməlidir. N.Məmmədzadə, həmçinin gənclərimizin diaspor sahəsində maarifləndirilməsinin vacibliyini qeyd edib.
Sonra çıxış edən Corc Vaşinqton Universitetinin professoru Türkər Özdoğan qeyd edib ki, bu gün türk dünyasının yalnız olduğu barədə səslənən fikirlər tamamilə yanlışdır. Əgər 300 milyonluq türkün varlığını nəzərə alsanız, bunun belə olmadığını görərsiniz. Bu gün Azərbaycan iri layihələrə imza atmaqla, eləcə də idman və mədəni sahələrdə əldə etdiyi uğurlarla dünyaya səs salır. Bunu görməmək mümkün deyil. Çalışmaq lazımdır ki, xaricdə təhsil alan azərbaycanlı gənclərin sayı daha da artsın. Corc Vaşinqton Universitetində onların sayı nə qədər çox olarsa, bu, ölkənin uğurudur. Ona görə də azərbaycanlı gəncləri universitetimizdə görməkdən şad olaram”.
Panel sessiyası işini müzakirələrlə davam etdirib, bir sıra təkliflər səsləndirilib, suallar cavablandırılıb.