ANAMA-nın təsis edilməsinin 23-cü ildönümünə həsr olunmuş tədbir keçirilib
Bakı, 23 iyul, AZƏRTAC
İyulun 23-də Azərbaycan Respublikasının Minatəmizləmə Agentliyinin (ANAMA) təsis edilməsinin 23-cü ildönümünə həsr olunmuş tədbir keçirilib.
AZƏRTAC xəbər verir ki, Agentliyin İdarə Heyətinin sədri Vüqar Süleymanov ANAMA-nın 1998-ci il iyulun 18-də ulu öndər Heydər Əliyevin Sərəncamı əsasında yaradıldığını bildirib. Qeyd edilib ki, Prezident İlham Əliyevin 2021-ci il 15 yanvar tarixli Fərmanı ilə Agentliyin əsasında publik hüquqi şəxs statuslu Azərbaycan Respublikasının Minatəmizləmə Agentliyi yaradılıb. ANAMA ölkə daxilində həyata keçirilən bütün minatəmizləmə işləri ilə bağlı fəaliyyətləri planlaşdırmaq, əlaqələndirmək, idarə və nəzarət etməklə bərabər həm də səlahiyyətli orqan qismində hökumətin bu sahə üzrə əsas icraçı qurumudur. İyirmi üç il ərzində əraziləri mina və partlamamış hərbi sursatlardan təmizləyərək istifadəyə verən ANAMA çətin və şərəfli yol keçib. Agentlik Azərbaycanda və xaricdə bir çox layihələri uğurla həyata keçirib.
Diqqətə çatdırılıb ki, Vətən müharibəsində Müzəffər Ali Baş Komandan İlham Əliyevin rəhbərliyi ilə Azərbaycan Ordusu düşməni darmadağın edərək işğal altındakı ərazilərimizi azad etdi. Bu qələbədən sonra ANAMA-nın qarşısında yeni çağırışlar və məqsədlər müəyyənləşdirilib. Otuz il ərzində işğal altında olmuş ərazilərimizdə xeyli sayda mina və hərbi sursat basdırılıb. Azad olunmuş ərazilərdə artıq yenidənqurma işlərinin, infrastruktur layihələrinin həyata keçirilməsinə başlanılıb. Bütün bu işlərdə ANAMA-nın üzərinə böyük məsuliyyət düşür. Çünki işlərin görüldüyü ərazilərdə külli miqdarda mina basdırılıb. ANAMA yeni hədəflərə doğru irəliləyir. Bu hədəflərə çatmaq üçün insan və maddi-texniki potensialın artırılması istiqamətində addımlar atılır.
Məlumat verilib ki, bu ilin yanvarından bu günədək 3072 hektar ərazi minalardan və partlamamış hərbi sursatdan təmizlənib. Bu dövrdə piyada əleyhinə 3202, tank əleyhinə 1522 mina və 7625 ədəd partlamamış hərbi sursat aşkarlanaraq zərərsizləşdirilib. Noyabrdan bu günədək isə 3647 hektar ərazi təmizlənib və istifadəyə verilib. Həmçinin piyada əleyhinə 8791, tank əleyhinə 4012 mina və 9633 ədəd partlamamış hərbi sursat aşkarlanaraq zərərsizləşdirilib.
“Təəssüf ki, biz mina hadisələrinin fəsadlarını tez-tez görürük. Vaxtaşırı hadisələr baş verir. Bu günədək mina hadisələri nəticəsində 37 nəfər xəsarət alıb, 19 nəfər həlak olub. Bu, ancaq mülki şəxslərə aid olan məlumatdır. Bundan başqa, hərbçilərimiz arasında da itkilər olub”, - deyə Vüqar Süleymanov bildirib.
Kənd Təsərrüfatı Nazirliyinin Aqrar İnnovasiya Mərkəzinin direktoru Əkbər Abbasov, Qarabağa Dönüş Təşkilatının sədr müavini Gülməmməd Məmmədov, ANAMA yanında İctimai Şuranın sədri Umud Mirzəyev, sədr müavini Emil Həsənov, katibi Hafiz Səfixanov və digərləri çıxış edərək Agentliyin yaradılmasının 23-cü ildönümü münasibətilə təbriklərini çatdırıb, işğaldan azad olunmuş ərazilərimizdə minalardan təmizlənməsi, təhlükəsiz vəziyyətə gətirilməsi işində Agentliyin əməkdaşlarına uğurlar arzulayıb, minaaxtaranlarımızın bu işin öhdəsindən uğurla gəldiklərini bildiriblər. ANAMA-nın qarşıda duran vəzifələrin öhdəsindən layiqincə gələcəyinə inandıqlarını vurğulayan natiqlər əhalinin maarifləndirilməsi məsələlərinin bundan sonra daha da sürətləndiriləcəyini qeyd ediblər.
Sonra qurumun ötən illər ərzində qazandığı təcrübə və nailiyyətlər, eləcə də dövlət prioritetlərinə əsasən icra edilən minatəmizləmə fəaliyyəti barədə məlumat və videoçarx təqdim olunub.
Tədbir çərçivəsində “Azərbaycan 2030: sosial-iqtisadi inkişafa dair Milli Prioritetlər”in təsdiq edilməsi haqqında” Prezident İlham Əliyevin Sərəncamının icrasının təmin olunması, “Böyük qayıdış” istiqaməti üzrə Qarabağa qayıdan ilk sakinlərimizin mina və partlayıcı qurğuların təhlükəsinə dair maarifləndirilməsi, təhlükəli ərazilərdə əsas davranış qaydaları ilə bağlı təlimlərə cəlb olunması yönümündə fikir mübadiləsi aparılıb.
Qeyd edilib ki, həmin sakinlərin doğma yurdlarına qayıdışı Zəngilan rayonunda reallaşdırılan “ağıllı kənd” layihəsi çərçivəsində həyata keçiriləcək.
Bölmənin digər xəbərləri
