SİYASƏT


Bahar Muradova avropalı həmkarlarını şübhəli mənbələrdən istifadə etməməyə çağırıb VİDEO

Berlin, 10 iyul, AZƏRTAC

Avropada Təhlükəsizlik və Əməkdaşlıq Təşkilatı (ATƏT) Parlament Assambleyasının illik 27-ci sessiyasının plenar iclasında çıxış edən Azərbaycan nümayəndə heyətinin rəhbəri, Milli Məclisin vitse-spikeri Bahar Muradova isveçli deputat Kristian Holm Barenfeldin Azərbaycanda məlum demokratik quruculuğun müsbət dinamikasını və insan haqlarının möhkəmləndirilməsi prosesini görməyə hazır olmadığı ilə bağlı məyusluğunu ifadə edib. O, isveçli həmkarını şübhəli niyyətlərlə və kimlərinsə vasitəsilə təşkilatın binasına daxil olmuş Azərbaycan xalqının bədxahları tərəfindən iclasların fasiləsində foyedə ona ötürülən məlumatlara deyil, etibarlı və obyektiv mənbələrə istinad etməyə çağırıb.

Milli Məclis sədrinin müavini sessiyanın yüksək səviyyədə təşkilinə görə alman həmkarlarına təşəkkürünü bildirib. O deyib: “Vaxtilə bölünmə rəmzi olan Berlin bu gün birliyi təcəssüm etdirir”.

Bahar Muradova Bundestaqın sədri Volfqanq Şoblenin çıxışında ATƏT-in fəaliyyətinin və beynəlxalq hüququn təməl prinsipləri - bu təşkilata üzv ölkələrin ərazi bütövlüyünün, suverenliyinin və sərhədlərinin toxunulmazlığının dəstəklənməsinin zəruriliyi ilə bağlı yer almış fikirləri xatırladıb. “Mövcud böhranların həlli 1975-ci il Helsinki Yekun Aktında əks olunmuş prinsiplərə qeyd-şərtsiz əməl olunmasından asılıdır”, - deyən Bahar Muradova hərbi-siyasi bloklara müraciət edərək, onları bloklara qoşulmayan dövlətlərin ərazi bütövlüyünün tanınması üzrə öhdəliyi öz üzərlərinə götürməyə səsləyib.

Milli Məclisin sədr müavini ATƏT məkanında iqtisadi əməkdaşlığa yardım məsələlərini də diqqət mərkəzində saxlamağa çağırıb. “Bunun üçün nəqliyyat dəhlizlərinin inkişafı sahələrində əməkdaşlığı genişləndirmək, ticarəti sadələşdirmək, insan kapitalını inkişaf etdirmək zəruridir. Məsələn, biz bunları İpək Yoluna Dəstək Qrupu kimi birliklər vasitəsilə həyata keçiririk”, - deyən Bahar Muradova dünənki iclasda ATƏT PA-nın vitse-prezidenti Azay Quliyevin İpək Yolu ilə bağlı təqdim etdiyi qətnaməyə səs verən hər kəsə təşəkkürünü bildirib.

ATƏT PA-nın sessiyası iyulun 11-də işini başa vuracaq.

Pərvanə Qarayeva

AZƏRTAC-ın xüsusi müxbiri

Berlin

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.