DÜNYA
Latviya karantin tətbiq etmək üçün əlavə borc vəsaiti götürməli olacaq
Riqa, 21 oktyabr, AZƏRTAC
Latviya karantin tətbiq etmək və fəaliyyətini müvəqqəti olaraq dörd həftəlik dayandıracaq sahələri təşviq etmək məqsədilə əlavə borc vəsaiti götürməli olacaq.
AZƏRTAC ölkə mətbuatına istinadla xəbər verir ki, bu sözləri Latviyanın Baş naziri Krişyanis Karinş söyləyib.
Baş nazir ölkədə daha sərt məhdudiyyətlərin tətbiq edilməsi üçün lazım olan konkret maliyyələşdirməni hələ müzakirə edilmədiyini bildirib. Lakin bu məsələnin İqtisadiyyat və Maliyyə Nazirliyinin səlahiyyətlərinə daxil olacağını qeyd edib.
“Bu, ölkəmiz üçün ən böyük faciələrdən biridir, çünki indi cəmiyyət vaksin vurdurmayanların sayının hələ də çox olması sayəsində səhiyyə sistemimizi xilas etmək məqsədilə nəinki dörd həftəlik qapanmaq məcburiyyətində qalacaq, həm də fəaliyyətini müvəqqəti dayandıracaq iqtisadiyyata sərmayə yatırmaq üçün borc götürməli olacağıq”, – deyə Baş nazir Krişyanis Karinş vurğulayıb.
Baş nazir qeyd edib ki, Latviya artıq maliyyə dəstəyi məsələlərinin həllində təcrübəyə malikdir, bu isə əvvəlki bütün dəstək mexanizmlərinin yenidən istifadə olunacağı anlamına gəlir.
Qeyd edək ki, Latviya hökuməti oktyabrın 21-dən noyabrın 15-dək ölkədə lokdaun elan edib.
Asiman Əsədov
AZƏRTAC-ın xüsusi müxbiri
Riqa