Müşfiq Məmmədli: Tibbi xidmətlərin ən mühüm amillərindən biri əlçatanlığın və keyfiyyətin yaxşılaşdırılmasıdır
Bakı, 3 may, AZƏRTAC
Prezident İlham Əliyevin tibb sahəsində müəyyən etdiyi strateji kursun davamı olaraq həkimlərin sosial vəziyyətinin yaxşılaşdırılması və fəaliyyətinin motivasiyası məqsədilə 31 ixtisas sahibi olan həkimlərin maaşlarında növbəti aydan artım tətbiq olunacaq. Həkimlərin maaşı 14 ixtisasa uyğun olaraq 2 dəfə, digər ixtisas sahiblərinin maaşının isə 20-90 faiz həcmində artırılması nəzərdə tutulub. Bütün bunlar onu göstərir ki, səhiyyə sistemində aparılan islahatlar çox qısa zaman kəsiyində bir neçə dəfə artımla birlikdə kifayət qədər yüksək rəqəmlərlə müşahidə olunur. Bu, dövlətimizin səhiyyə sektorunun işçilərinə, səhiyyə mütəxəssislərinə, həkimlərə olan qayğısının bariz nümunəsidir. Koronavirus pandemiyası ilə mübarizə zamanı həkimlərin şücaəti Prezident İlham Əliyev və birinci xanım Mehriban Əliyeva tərəfindən yüksək dəyərləndirilib, onların fəaliyyətinə mənəvi dəstək verilib. Bu prosesin məntiqi nəticəsi olaraq həkimlərin maaşlarındakı artım barədə qərar verilib. Bununla yanaşı qeyd etmək istəyirik ki, bu maaş artımının həcmi həmin ixtisas sahibləri üçün təqribən 1000 manat olacaq. Bu, son hədd deyil, - həm həkimlərin fəaliyyətində qəbul etdikləri xəstə sayına uyğun olaraq bonusları və digər əlavələri də bura əlavə etdikdə kifayət qədər yüksək maaş alacaqlarının göstəricisidir.
Bunu AZƏRTAC-a Milli Məclisin Səhiyyə komitəsinin üzvü Müşfiq Məmmədli deyib. Deputat hesab edir ki, bütün bunlar həkimlərin həm fəaliyyətinin stimullaşdırılmasına, bununla yanaşı, xəstəxanaların və tibb müəssisələrinin maddi texniki bazasının gücləndirilməsinə, yeni müasir avadanlıqların alınmasına, yeni və mövcud xəstəxanalarda isə şəraitin yaxşılaşdırılmasına, ümumiyyətlə, həkimlər üçün komfort bir iş şəraitinin yaradılmasına gətirib çıxaracaq.
“Təbii ki, tibbi xidmətlərin ən mühüm amillərindən biri əlçatanlığın və keyfiyyətin yaxşılaşdırılmasıdır. Burada iki amilin mühüm rolu var. Birinci amil, dediyimiz kimi, müvafiq səhiyyə strukturlarının modernləşdirilməsi, ikinci isə səhiyyə strukturlarında çalışan işçilərin maddi texniki bazasının yaxşılaşdırılması ilə yanaşı, həm də stimullaşdırıcı addımların atılmasıdır. Bütün bu addımlar birlikdə atıldıqda biz qısa zaman kəsimində səhiyyədə köklü dəyişikliklərin şahidi oluruq və olacağıq. Bütün bunlarla yanaşı həm də icbari tibbi sığorta çətiri altında vətəndaşlarımız tibbi xidmətlərin sayının artmasını da müşahidə edirlər. Çünki 700 dən artıq tibbi xidmət artıq icbari tibbi sığortanın xidmətlər zərfinə daxil edilib. Bu, onu göstərir ki, bir çox nozoloji qrupa aid olan xəstəliklərin də müalicəsi artıq icbari tibbi sığorta çərçivəsində təmin ediləcəkdir. Buraya, həmçinin stasionarda olan xəstələrin istər dərman, istər qida təminatının yaxşılaşdırılması və sonrakı mərhələdə isə artıq ambulator xidmət göstərilən xəstələrin də dərman təminatının xidmətlər zərfi çərçivəsinə alınmasıdır. Bu da çox müsbət bir addımdır, kifayət qədər maliyyə tutumlu bir addımdır. Biz düşünürük ki, İcbari Tibbi Sığorta Agentliyində toplanmış vəsaitlərin miqdarı artdıqca həm həkimlərin bundan sonrakı maddi vəziyyətinin yaxşılaşdırılmasının, həm də kifayət qədər tibbi xidmətlərin əlçatanlığının və keyfiyyətinin yaxşılaşdırılmasının şahidi olacağıq. Yəni bu addımlar Prezidentin müəyyənləşdirdiyi strateji kursun tərkib hissəsidir və bunun davamlılığı da müşahidə olunur və olunacaqdır”, - deyə M.Məmmədli bildirib.
İcbari Tibbi Sığorta üzrə Dövlət Agentliyi tərəfindən güzəştli ipoteka krediti və sosial mənzil almaq hüququ verilən şəxslərin siyahısına dövlət tibb müəssisələrində çalışan tibb işçilərinin əlavə edilməsi ilə bağlı hazırlanan təkliflərə münasibət bildirən M.Məmmədli deyib: “Gənc həkimlərin İcbari Tibbi Sığorta Agentliyi tərəfindən hazırlanan təkliflər əsasında güzəştli ipoteka kreditinə çıxışının təmin olunması istiqamətində təkliflərin verilməsi də çox mühüm bir addımdır. Bu, bir daha gənc həkimlərin həm maddi vəziyyətinin gücləndirilməsi ilə yanaşı, həm də həyat şəraitinin yaxşılaşdırılmasına gətirib çıxaracaq. Artıq tibbi sahədə fəaliyyətə başlayan insan ipoteka kreditindən istifadə etməklə öz yaşayış şəraitini də yaxşılaşdıracaq. Bu təklif vətəndaşlarımıza göstərilən tibbi xidmətin keyfiyyətinin, həkimlərin rahat həyat şəraitinin təmin olunmasında çox mühüm və vacib addımlardan biridir”.
Bölmənin digər xəbərləri
