REGİONLAR


Nəsiminin yaradıcılığı Azərbaycan dili və ədəbiyyatının inkişafında mühüm mərhələdir

Lənkəran, 15 may, Bağır Əliyev, AZƏRTAC

Azərbaycan xalqının çoxəsrlik ənənələrə malik bədii və fəlsəfi fikir tarixində dərin iz qoymuş mütəfəkkir şair İmadəddin Nəsiminin zəngin irsi bu gün də insanların mənəvi-əxlaqi kamilləşməsində böyük əhəmiyyətə malikdir.

AZƏRTAC-ın bölgə müxbiri xəbər verir ki, bu fikir Lənkəran Rayon Mərkəzi Kitabxanasında “Nəsimi ili” çərçivəsində “Nəsimi parlaq bir günəşdir” mövzusunda keçirilən tədbirdə səsləndirilib.

Tədbirdə çıxış edən Lənkəran Rayon Mərkəzləşdirilmiş Kitabxana Sisteminin direktoru Nuranə Nəsirova dahi Azərbaycan şairi Nəsiminin klassik ədəbiyyatımızda şeir nümunələrinin əvəzsiz olduğunu vurğulayaraq bildirib ki, 2019-cu ildə böyük şairin anadan olmasının 650 illiyi tamam olur. Azərbaycan Respublikası Prezidentinin 11 yanvar 2019-cu il tarixli Sərəncamına əsasən 2019-cu ilin ölkəmizdə “Nəsimi ili” elan edilməsi ilə əlaqədar ölkəmizin hər yerində olduğu kimi, Lənkəranda müxtəlif tədbirlər keçirilir.

Toplantıda Lənkəran Dövlət Universitetinin müəllimi, filologiya elmləri doktoru, professor Yədulla Ağazadənin şairin həyat və yaradıcılığı barədə məruzəsi dinlənilib.

Qeyd olunub ki, mütəfəkkir şair Nəsimi ilk təhsilini Şamaxıda alıb, dövrün elmlərini, din tarixini, məntiq, riyaziyyat və astronomiyanı öyrənib. Nəsimi, həmçinin hürufi Fəzlullah Nəiminin təlimlərindən bəhrələnib.

Şairin əsərlərinin təhlili göstərir ki, Nəsimi Şamaxıda o dövrün ən yaxşı universitetlərinin tələbinə cavab verəcək dərəcədə mükəmməl təhsil alıb. O, dilləri elə yaxşı öyrənmişdi ki, Azərbaycan, fars və ərəb dillərində eyni dərəcədə gözəl şeirlər yaza bilirdi.

Bildirilib ki, hürufilər Teymurləng tərəfindən ciddi təzyiqlərə məruz qaldığı bir vaxtda Nəsimi Vətəndən didərgin düşüb, İraq, Türkiyə, Suriyada yaşamağa məcbur olub. O, hürufilik təlimi əsasında irəli sürdüyü panteist ideyaları üstündə Hələb şəhərində edam olunub.

Mütəfəkkir şairin Azərbaycan dilində yazdığı şeirlərinin dili həm zənginliyi, həm də xalq dilinə yaxınlığı ilə seçilir. Bu şeirlərdə atalar sözləri, zərb-məsəllər, hikmətli sözlər çoxluq təşkil edir. Onun rübailəri Azərbaycan xalq şeiri nümunələri olan bayatılara çox yaxındır.

Diqqətə çatdırılıb ki, Nəsiminin yaradıcılığı Azərbaycan dili və ədəbiyyatının inkişafında mühüm mərhələdir. Onun yaradıcılığının mərkəzində lirik qəhrəmanın aşiq olduğu, onu yüksəldən, kamilləşdirən və öz nuruna qərq edən Allah dayanır. İnsan üçün ən yüksək, ülvi duyğu həmin sevgilinin vüsalına yetişmək, ona qovuşmaq, onda əriyib yox olmaqdır.

Tədbirin sonunda kitabxananın fəal oxucuları, şəhər 5 nömrəli tam orta məktəbin şagirdləri böyük şairin şeirlərindən parçalar ifa ediblər. Nəsiminin şeirlərini daha səlis söyləyən oxucular və şagirdlər fəxri fərmanla mükafatlandırılıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.