CƏMİYYƏT
Qubadlı rayonu üzrə birinci yarım ilin nəticələri müzakirə edilib
Bakı, 31 iyul, AZƏRTAC
İyulun 31-də Qubadlı Rayon İcra Hakimiyyətinin inzibati binasinda cari ilin birinci yarısının sosial-iqtisadi inkişafının yekunlarına və qarşıda duran vəzifələrə həsr olunmuş yığıncaq keçirilib.
AZƏRTAC xəbər verir ki, toplantıda rayon icra hakimiyyəti başçısının aparatı, rayonun idarə, müəssisə və təşkilat rəhbərləri, ictimaiyyət nümayəndələri iştirak ediblər.
Tədbirdə rayon icra hakimiyyətinin başçısı Malik İsaqov çıxış edərək bildirib ki, iyulun 8-də Prezident İlham Əliyevin sədrliyi ilə Nazirlər Kabinetinin 2018-ci ilin birinci yarısının sosial-iqtisadi inkişafının yekunlarına və qarşıda duran vəzifələrə həsr olunan iclası keçirilib. Həmin iclasda da vurğulandığı kimi, Azərbaycan öz dinamik inkişaf templərini saxlayaraq həm iqtisadi, həm də beynəlxalq siyasət sahələrində uğurlar əldə edib.
Sonra rayon icra hakimiyyəti başçısının müavini Allahverdi Haxverdiyev hesabat məruzəsi ilə çıxış edib. Bildirilib ki, cari ilin altı ayında rayon üzrə 53 yeni iş yeri açılıb. Ümumiyyətlə son 14 ildə rayon üzrə yeni yaradılan iş yerlərinin sayı 3 min 807-yə çatıb. Bu ilin birinci yarımilində rayon sakinlərinin məskunlaşma yerlərində yaşayış şəraitinin yaxşılaşdırılması istiqamətində də işlər davam etdirilib. Rayon icra hakimiyyəti başçısının Sabirabad, Saatlı, İmişli, Xızı rayonlarında və digər yerlərdə keçirdiyi səyyar qəbullar zamanı sakinlər tərəfindən qaldırılan məsələlərin həlli istiqamətində müəyyən işlər görülüb.
Qeyd edilib ki, yerli gəlirlərdən daxilolma 959 min 414 manat proqnoz rəqəminə qarşı 1 milyon 284 min 47 manat və ya 1,3 dəfə çox icra olunub. Bu da nəzərdə tutulduğundan 234 min 633 manat çox vəsaitin daxil olması deməkdir. Rayon vergilər şöbəsi də işini günün tələbləri baxımından qurmağa çalışıb. İyulun 1-nə kimi şöbədə 1793 vergi ödəyicisi uçota alınıb ki, onların da hazırda 994-ü faktiki fəaliyyət göstərir. Vergilər şöbəsi hesabat dövrü 1166 min 100 manat plana qarşı 1561 min 500 manat vəsait toplayıb. Bu da planın 133,9 faizi, yəni 395 min 400 manat artıq vəsaitin daxil olması deməkdir.
Məruzədə bildirilib ki, ötən dərs ilində Dövlət İmtahan Mərkəzinin rəsmi açıqlamasında ali məktəblərə qəbulun nəticələrinə görə Qubadlı rayonu birinci yerə layiq görülüb, IX və XI siniflərin nəticələrinə görə isə ilk onluqda qərar tutub.
Aqrar sahədə görülən işlərdən danışılarkən diqqətə çatdırılıb ki, baramaçılıq inkişaf etdirilib və 520 kiloqram əvəzinə, 578 kiloqram yüksək keyfiyyətli barama istehsal olunaraq, respublika üzrə plan artıqlaması ilə yerinə yetirilib. Rayonda arı ailələrinin sayı isə 5 min 200-ə yaxınlaşıb.
Vurğulanıb ki, gənclər siyasətinin rayonda ardıcıl həyata keçirilməsi üçün müntəzəm iş aparılır. 2005-2006-cı il təvəllüdlü yeniyetmələr arasında futbol üzrə “Sevinc” kuboku uğrunda Xaçmaz rayonunda keçirilən ölkə birinciliyində rayonun komandası birinci yeri tutaraq respublika çempionu olub. Rayon idmançıları beynəlxalq yarışlarda da yüksək nəticələr göstəriblər.
Sonra çıxış edən Dövlət Sosial Müdafiə Fondunun rayon şöbəsinin rəisi Cəlaləddin Məmmədov, rayon məşğulluq mərkəzinin direktoru Cəfər Ağayev, rayon kənd təsərrüfatı idarəsinin rəisi Ənvər Quliyev, Balasoltanlı kənd inzibati ərazi dairəsi üzrə nümayəndə Xanlar Əliyev, Çardaxlı kənd inzibati ərazi dairəsi üzrə nümayəndə Oktay Əsgərov rayonda müvafiq sahələr üzrə görülən işlərdən bəhs ediblər.