Türkdilli Dövlətlərin Əməkdaşlıq Şurasının yaradılmasının 10 ili tamam olur YENİLƏNİB
Bakı, 3 oktyabr, AZƏRTAC
Oktyabrın 3-də Azərbaycan Milli Elmlər Akademiyasının Mərkəzi Elmi Kitabxanasında Türkdilli Dövlətlərin Əməkdaşlıq Şurasının yaradılmasının 10 illiyi münasibətilə tədbir keçirilib.
Əvvəlcə tədbirdə Azərbaycanın dövlət himni səsləndirilib və 2009-cu il oktyabrın 3-də türkdilli ölkələrin dövlət başçılarının Naxçıvan şəhərində təşkil edilmiş IX zirvə görüşündən videokadrlar nümayiş olunub.
AZƏRTAC xəbər verir ki, tədbirdə çıxış edən türkoloq Güllü Yoloğlu türkdilli ölkələrin dövlət başçılarının IX zirvə görüşündən söz açıb. Bildirib ki, görüşdə imzalanmış Naxçıvan Sazişinə əsasən Türkdilli Dövlətlərin Əməkdaşlıq Şurası, Türk Şurası və Türk Birliyi yaradılıb. Azərbaycan, Qazaxıstan, Qırğızıstan və Türkiyə həmin təşkilatların təsisçi üzvləridir. Bu yaxınlarda Özbəkistan da Sazişə qoşulub. Türkdilli Dövlətlərin Əməkdaşlıq Şurasının əsas fəaliyyət məqsədləri və vəzifələri məhz Naxçıvan Sazişi ilə müəyyən edilir.
Diqqətə çatdırılıb ki, şura təsis olunduqdan sonra zirvə görüşləri “Türkdilli Dövlətlərin Əməkdaşlıq Şurasının Zirvə Görüşləri” adı altında Almatı, Bişkek, Nur-Sultan, Bodrum və Qəbələ şəhərlərində keçirilib. Növbəti zirvə görüşünün də Azərbaycanda keçirilməsi qərara alınıb. Bugünkü tədbir də həmin görüşün və Türkdilli Dövlətlərin Əməkdaşlıq Şurasının yaradılmasının 10 illiyinə həsr olunub. Güllü Yoloğlu türk məkanında inteqrasiyanın formalaşdırılmasının əsas mərhələlərindən söz açıb. Bildirib ki, ötən 10 ildə Türkdilli Dövlətlərin Əməkdaşlıq Şurası dünyanın bir çox nüfuzlu təşkilatları ilə əməkdaşlıq qurub və bu əlaqələr hazırda uğurla davam edir. 2009-cu il Naxçıvan görüşündə türkdilli dövlətlərin bir çox istiqamətlərdə əməkdaşlığı nəzərdə tutulub ki, onlardan biri də elm sahəsidir. Bunu əldə əsas tutaraq Dünya Türkologiya Mərkəzi İctimai Birliyini təsis etmək qərarına gəldik. Türkoloq alim deyib: “Dünya Türkologiya Mərkəzinin Azərbaycanda yaradılmasının bir sıra əsaslı səbəbləri var. Belə ki, ölkəmiz uzun illər qeyri-rəsmi olaraq dünya türkologiyasının mərkəzi olub. 1926-cı ildə I Türkoloji Qurultay Bakıda keçirilib. Hələ sovet dövründə “Sovetskaya türkologiya” jurnalı Bakıda çap olunub. Məhz bu gün də biz dünya türkoloqlarını, türkologiya mərkəzlərini ölkəmizdə birləşdirməyi qarşımıza məqsəd qoymuşuq”.
Tədbirdə Dünya Türkologiya Mərkəzinin yaradılması elan olunub və ictimai birliyin Nizamnaməsi təqdim edilib.
AMEA-nın İctimai Elmlər Bölməsinin akademik-katibi, akademik Nərgiz Axundova Türkdilli Dövlətlərin Əməkdaşlıq Şurasının türkdilli dövlətlər arasında elm, təhsil və mədəniyyət sahəsində qarşılıqlı əlaqələrin genişləndirilməsində müstəsna rolu olduğunu deyib.
Milli Məclisin deputatı Qənirə Paşayeva türkdilli ölkələrin tanınmış təşkilatlarının beynəlxalq səviyyədə türk dünyasının ortaq dəyərlərinin təbliği sahəsində fəal rol oynadığını söyləyib. O, Türkdilli Dövlətlərin Əməkdaşlıq Şurasının da dünyada və regionda türkdilli ölkələr arasında müxtəlif prioritet sahələr üzrə əməkdaşlığın inkişaf etdirilməsi məqsədilə bir sıra tədbirlər həyata keçirdiyini, uğurlara imza atdığını bildirib.
“Azərbaycan Televiziya və Radio verilişləri” QSC-nin nəzdindəki Televiziya və Radio Akademiyasının rektoru Faiq Hüsiyev, tərcüməçi-jurnalist Rafiq Savalan, Azərbaycanlıların və digər Türkdilli Xalqların Əməkdaşlıq Mərkəzinin sədri İlham İsmayılov və digər çıxış edənlər Türkdilli Dövlətlərin Əməkdaşlıq Şurasının təsis olunmasını və keçdiyi yolu türkdilli ölkələr və xalqlar üçün əhəmiyyətli hadisə kimi dəyərləndirib, Dünya Türkologiya Mərkəzinin fəaliyyətinə uğurlar arzulayıblar.
Tədbirdə Macarıstan, Qazaxıstan, Özbəkistan və Türkmənistanın ölkəmizdəki səfirliklərinin nümayəndələri iştirak ediblər.
Bölmənin digər xəbərləri
