Bakı, 3 aprel, AZƏRTAC

AZƏRTAC müasir müstəqil Azərbaycan dövlətinin banisi, görkəmli siyasi və dövlət xadimi Heydər Əliyevin 100 illik yubileyi ilə əlaqədar xalqımızın Ulu Öndərinin parlaq, zəngin və şərəfli həyat yolunun əsas məqamlarını, bənzərsiz siyasi və dövlətçilik fəaliyyətini - xalqa bağışlanmış ömrünün anlarını xronoloji ardıcıllıqla təqdim edir.

X X X

2 iyul. Prezident Heydər Əliyev Azərbaycan polisinin 80 illik yubileyinə həsr olunmuş tədbirdə nitq söylədi.

4 iyul. ABŞ-nin milli bayramı - İstiqlaliyyət Günü münasibətilə Amerika səfirliyinin təşkil etdiyi rəsmi qəbulda çıxış etdi.

10 iyul. Prezident sarayında Moskva, Sankt-Peterburq, MDB və Baltikyanı ölkələrin jurnalistlərinə müsahibə verdi.

12 iyul. Bibiheybət Məscid-Ziyarətgah Kompleksinin açılış mərasimində nitq söylədi.

19-24 iyul. Böyük Britaniyada beşgünlük səfərdə oldu.

29 iyul. Küveyt dövlətinin nümayəndə heyətini qəbul etdi.

30 iyul. ABŞ-nin Xəzər və enerji problemləri üzrə yeni təyin olunmuş xüsusi nümayəndəsi Riçard Morninqstarın və Türkiyənin xarici işlər nazirinin müavini Yaman Başkurtun rəhbərlik etdikləri birgə nümayəndə heyəti ilə görüşdü.

X X X

Prezident Heydər Əliyev daxili işlər orqanlarının qarşısında üç əsas tələb qoymuşdu: intellektual səviyyəni yüksəltmək və peşəkarlığı dünya standartları səviyyəsinə çatdırmaq, ən müasir texnologiyalara yiyələnmək və nəhayət, Vətənə, xalqa və dövlətə sadiq olmaq. Azərbaycanın daxili işlər orqanlarının bu hədəflərə nail olmaq üçün atdığı addımlar polis sistemində yеniləşmənin, modеrnləşmənin, beynəlxalq standartlar səviyyəsinə yüksəlişin əsasını qoydu.

Ümummilli Lider Azərbaycan polisinin 80 illik yubileyinə və Polis Gününə həsr olunmuş tədbirdə qeyd etdi ki, Ermənistanın təcavüzü başlayandan bəri və döyüşlər gedən illərdə Azərbaycan polisi torpaqlarımızın qorunması uğrunda şücaətlə vuruşublar, qəhrəmanlıq nümunələri göstəriblər. Daxili İşlər Nazirliyinin əməkdaşları öz xidməti vəzifələrini həyata keçirərək, Azərbaycan vətəndaşlarının, dövlətin, xalqın mənafeyini qoruyaraq canlarını qurban veriblər. Belə qəhrəmanların xatirəsi heç vaxt unudulmayacaq, onların qəhrəmanlıq nümunələri müstəqil Azərbaycanın polis əməkdaşları üçün həmişə örnək olacaq.

Ulu Öndərin Azərbaycan polisinin yubiley tədbirində söylədiyi bu fikirlər isə təkcə 1990-cı illər üçün deyil, bütün dövrlər üçün aktualdır: “Polis peşəsi ağır, çətin peşədir. Polis peşəsinə öz həyatını sərf edən insan bir çox xüsusi keyfiyyətlərə malik olmalıdır. Polis əməkdaşı birinci növbədə ölkəsinin dövlətinə, konstitusiyasına, qanunlarına tam sadiq olmalıdır. Polis əməkdaşı bilikli, öz sahəsində yüksək təhsilə, yaxşı təcrübəyə malik, iradəli, cəsarətli, qorxmaz olmalıdır. Polis əməkdaşı saf mənəviyyata malik olmalıdır. Polis əməkdaşı yalnız və yalnız qanun çərçivəsində fəaliyyət göstərməlidir, qanunun aliliyini daim rəhbər tutmalıdır, qanuna həmişə hörmət etməlidir. Polis əməkdaşı vətəninə, torpağına hədsiz sədaqətli və istənilən vaxt öz vəzifəsini yerinə yetirərək həyatını belə qurban verməyə hazır olmalıdır”.

Heydər Əliyevin müstəqil Azərbaycana rəhbərliyi dövründə dövlət-din münasibətləri əsaslı şəkildə yenidən quruldu. Əhalisinin böyük əksəriyyəti müsəlmanlardan ibarət olan ölkəmizdə yeni məscidlər tikilir, mövcud ibadət yerləri abadlaşdırılır və əsaslı təmir edilirdi. 1998-ci il iyulun 12-də Bibiheybət Məscid-Ziyarətgah Kompleksinin açılışı oldu. Mərasimdə nitq söyləyən Ulu Öndər kompleksin açılışını tarixi hadisə adlandıraraq bu münasibətlə Azərbaycan xalqını, İslam aləmini təbrik etdi. Bu müqəddəs yerdə abadlıq işləri aparılmasına və vaxtilə dağıdılmış məscidin bərpa edilməsinə bir neçə il əvvəl başlandığını xatırladaraq dedi: “Xalqımız bu məscidin bərpa edilməsini daim istəyibdir. Xüsusən sovet hakimiyyəti dağılandan, Azərbaycanda dövlət müstəqilliyi əldə edildikdən, dinimizə - İslam dininə azadlıq veriləndən sonra insanlarda bu istək, arzu daha da artmışdır. Bu gün bizim üçün böyük tarixi hadisə, böyük xoşbəxtlikdir ki, bu arzularımızı artıq yerinə yetirə bilmişik. Burada, bu müqəddəs yerdə gözəl, bu müqəddəs yerə, islamiyyətə, millətimizə, xalqımıza layiq bir məscid tikib yarada bilmişik. Bu, tarixi hadisədir. Bu bayram günü biz buraya bu məscidin yenidən doğulması, dünyaya gəlməsi münasibətilə toplaşmışıq. Bu, Azərbaycan müsəlmanları, güman edirəm, bütün islam aləmi üçün ikiqat bayramdır. Məhəmməd peyğəmbərin mövlud günü həzrəti Hökümənin, həzrəti imamlarımızın övladlarının, qohumlarının qəbirləri üzərində əzəmətli bir məscidin açılması ikinci bir bayramdır”.

Xronologiyadan göründüyü kimi, 1998-ci ilin iyulunda Azərbaycanın xarici əlaqələrinə güclü impuls verən mühüm səfər reallaşdı. Ulu Öndər qlobal siyasətin müəyyənləşdirilməsində aparıcı rol oynayan, dünyada yüksək nüfuza malik Böyük Britaniyada beşgünlük səfərdə oldu. Səfərin proqramı olduqca zəngin idi: Kraliça II Elizabet, Baş nazir Toni Bleyer, Krallığın beynəlxalq inkişaf üzrə dövlət katibinin müavini Corc Foulks, xarici işlər üzrə dövlət naziri Daq Henderson, müdafiə işləri üzrə dövlət katibi Corc Robertson, ticarət və sənaye üzrə dövlət katibi xanım Marqaret Bekett, enerji üzrə dövlət naziri Con Battl, xarici işlər və birlik işləri üzrə dövlət katibi Robin Kuk və digər rəsmi şəxslərlə görüşlər. Eyni zamanda, Heydər Əliyev səfər çərçivəsində “Shell” şirkətinin icraçı direktoru Fill Vots, “British Petroleum” (BP) şirkətinin prezidenti Con Braun, “Monument Oil and Gas” şirkətinin baş direktoru Tim Eqqar və digər aparıcı kompaniyaların rəhbərləri ilə danışıqlar apardı və ümumilikdə 50-yə yaxın görüş keçirdi, BBC televiziyasına müsahibə verdi.

Ulu Öndər Heydər Əliyev demək olar ki, hər bir görüşündə Azərbaycan həqiqətləri, ölkəmizin qarşılaşdığı çətinliklər, xüsusilə də təcavüzkar Ermənistanın torpaqlarımızın 20 faizini işğal etməsi nəticəsində bir milyondan çox azərbaycanlının qaçqına və məcburi köçkünə çevrilməsi və onların problemləri barədə danışırdı. Böyük Britaniyanı Azərbaycanın müttəfiqi və yaxın dostu adlandıran Prezident Heydər Əliyev Kraliça II Elizabet ilə görüşündə Birləşmiş Krallığın respublikamızda 100-dən çox şirkətinin fəaliyyət göstərdiyini xüsusi vurğulayaraq dedi: “Birləşmiş Krallıq ilə Azərbaycan arasında hələ bu əsrin əvvəllərində sıx əlaqələr olmuşdur. Müstəqil respublikamız Böyük Britaniya kimi nüfuzlu bir dövlətlə müttəfiq olmaqdan, onun simasında özünə yaxın dost tapmaqdan çox məmnundur. Azərbaycan ilə Böyük Britaniya arasında beynəlxalq təşkilatlar çərçivəsində də yaxşı əlaqələr qurulmuşdur. Biz əminik ki, ölkəmizin haqq işinin müdafiə olunmasında İngiltərə səylərini daha da artıracaqdır”.

Ulu Öndər bütün xarici səfərlərində olduğu kimi, Böyük Britaniyaya səfəri zamanı da Azərbaycan diasporunun üzvləri ilə görüşdü. Onları azərbaycançılıq ruhunu, xüsusən ana dilini qoruyub-saxlamağa səslədi, diasporumuzun qarşısında duran ümdə vəzifələrdən danışdı.

Sitat: Siz bilirsiniz ki, mənim təhsilim, ümumiyyətlə, rus dilində gedibdir. Gənc vaxtımdan bütün həyatım boyu rus dilində oxumuşam, rus dilində işləmişəm. Moskvada böyük vəzifələrdə işləmişəm. Mənim üçün rus dili ana dili kimi bir dildir. Amma mən o dildən nə qədər istifadə etmiş olsam da, Azərbaycan dilini unuda bilmərəm. Azərbaycan dili mənim üçün hər şeydən əzizdir. Millətin milliliyini saxlayan onun dilidir. Şübhəsiz ki, musiqi də, ədəbiyyat da, ayrı-ayrı tarixi abidələr də millətin milliliyini təsdiq edir. Amma millətin milliliyini ən birinci təsdiq edən onun dilidir. Əgər Azərbaycan dili olmasa, Azərbaycan dilində ədəbiyyat da olmaz. Azərbaycan dili olmasa, Azərbaycan dilində mahnılar olmaz, musiqi olmaz. Bunlar hamısı bir-biri ilə bağlıdır. Ona görə bu beş ildə Azərbaycan dilinin dövlət dili kimi yaşaması, möhkəmlənməsi, inkişaf etməsi də bizim ən böyük nailiyyətlərimizdən biridir. Bu, təkcə dil məsələsi deyil, azərbaycançılıq məsələsidir. Azərbaycançılıq bizim üçün böyük Azərbaycan nöqteyi-nəzərindən çox vacibdir.

Həmin çıxışdan daha bir neçə vacib məqama diqqət yetirmək yerinə düşər:

• Azərbaycan dilini hər yerdə daha da yüksəklərə qaldırmaq hamımızın vəzifəsidir, sizin də vəzifənizdir

• Mən hər dəqiqə Azərbaycanın müstəqilliyini və milliliyini təsdiq edirəm, bunu nümayiş etdirirəm, hər sahədə göstərirəm. Qoy onlar elə bilməsinlər ki, biz keçmişdəki kimi yenə də Rusiyanın müstəmləkəsiyik, rus dilində danışırıq. Yox! Bizim öz dilimiz var və öz dilimizdə danışırıq, dilimiz də çox gözəl, zəngin dildir.

• Vətənlə həmişə sıx əlaqə saxlayın, gəlin-gedin və bilin ki, Azərbaycanın müstəqilliyi etibarlı əllərdədir.

• Biz Azərbaycan bayrağını dünyanın hər yerində qaldırmışıq və bundan sonra da qaldıracağıq. Azərbaycanın müstəqilliyi əbədidir, sarsılmazdır, dönməzdir. Mən bunun üçün çalışmışam, çalışıram və bundan sonra da çalışacağam.

Uzaq Britaniyada 25 il əvvəl söylənilmiş bu fikirlər, göründüyü kimi, bütün dövrlər üçün aktual olaraq qalır.