Xaricdə təhsil almaq artıq peşəkar xaricdə təhsil şirkətləri sayəsində asanlıqla həll olunan bir prosedur halına gəlib. Çünki müxtəlif səbəblərdən ali məktəbə qəbul imtahanlarında uğurlu nəticə əldə edə bilməyən abituriyentlər indi heç bir imtahan vermədən, yalnız attestatla tələbə adını qazanmaq şansı əldə edə bilirlər.

Hər il minlərlə tələbəyə bu sevinci bəxş edən “Zenith” xaricdə təhsil şirkətinin təsisçisi və rəhbəri Nahid İbrahimov 2024-cü ildə əldə etdikləri uğurlar və 2025-ci ilin təhsil hədəfləri barədə AZƏRTAC-a danışıb.

- Nahid bəy, bu gün sizə daha çox kimlər müraciət edir?

- Hazırda əsas müraciətlər imtahanlarda uğur qazana bilməyən, lakin buna baxmayaraq, ümidini itirməyən abituriyentlər tərəfindən daxil olur. “Zenith” xaricdə təhsil şirkəti bu abituriyentlərə tək attestatla, heç bir imtahan nəticəsi tələb olunmadan Rusiya, Ukrayna və Türkiyədə təhsil almaq imkanı yaradır. Ümumiyyətlə, xaricdə təhsil almaq istəyən gəncləri iki qrupa bölmək olar. Birinci qrupa daxil olanlar artıq bir neçə il öncədən təhsil alacaqları ölkəni, universiteti, fakültəni seçirlər. Hədəflərinə doğru inamla addımlayırlar. Bu gün həmin şəxslər artıq tələbədirlər, arzularına çatıblar. İkinci qrup abituriyentlər isə Dövlət İmtahan Mərkəzinin keçirdiyi imtahanlara köklənir və yalnız hansısa səbəbdən tələbə adı qazana bilmədikdə şanslarını xarici ölkədə sınamaq istəyirlər.

- “Zenith” xaricdə təhsil şirkətinə əsasən hansı ölkələrdə təhsillə bağlı müraciət olunur?

- Son dövrlər Rusiya universitetlərinə müraciətlər artıb. Buna səbəb Azərbaycanda yalnız Rusiya universitetlərinin qiyabi təhsil formasının tanınmasıdır. Digər ölkələrdə qiyabi təhsilin tanınmamasının başlıca səbəbi bu ölkələrdə təhsilin əslində qiyabi yox, distant olmasıdır. Bir daha vurğulamaq istəyirəm ki, ölkəmizdə xarici universitetlərdə distant yolla təhsil alan tələbələrin diplomları birmənalı olaraq tanınmır. Qeyd edim ki, ölkəmizdə Ukraynanın da diplomları tanınır. Lakin hazırda mövcud vəziyyətlə əlaqədar gələcəklə bağlı proqnoz vermək çətindir. Buna baxmayaraq, israrla Ukrayna universitetlərində təhsil almaq istəyən tələbələrimizə bütün dəstəyi göstəririk.

- Nahid bəy, ötən illərin və 2024-cü ilin hələ də tələbə olmaq sevincini dadmayan abituriyentləri üçün bu il imtahansız, attestatla təhsil almaq imkanı varmı?

- Təəssüf ki, əyani təhsil forması üzrə bu il artıq qəbul bitib. Yalnız qiyabi təhsil forması üzrə Rusiya və Ukrayna universitetlərinə müraciət etmək mümkündür. “Zenith” xaricdə təhsil şirkəti Moskva İdarəetmə Akademiyasının Azərbaycanda yeganə rəsmi təmsilçisidir. Hazırda bu təhsil ocağında təhsil almaq istəyən tələbələrimiz üçün ayda 1 dəfə qiyabi təhsil forması üzrə qəbul açırıq. Təhsilini davam etdirmək istəyən gənclərimizə hər zaman dəstək olmağa hazırıq. Həmçinin Ukraynada da hər il noyabr ayına qədər əyani təhsil forması üzrə qəbullar davam edir. Təhsil forması əyani olaraq qalır, lakin dərslər mövcud vəziyyətlə əlaqədar onlayn formada keçirilir. Bir daha vurğulayıram ki, davam edən müharibə şəraiti ilə əlaqədar bu ölkədə təhsillə bağlı proqnoz vermək çətindir, bu risk barədə bizə müraciət edən abituriyentləri də məlumatlandırırıq. Buna baxmayaraq, elə tələbələrimiz də var ki, israrla Ukrayna təhsilində maraqlıdırlar. Ukraynanı gələcək Avropa ölkəsi olaraq görürlər.

- Bu il hansı ixtisaslara maraq artıb?

- Son dövrlərdə əsas meyil kompüter mühəndisliyinədir. Lakin Hüquq fakültəsinə olan maraq da qalmaqdadır. “Zenith” xaricdə təhsil şirkəti olaraq ixtisas, universitet, ölkə seçimində hər zaman gənclərimizə kömək etməyə hazırıq. Tələbə bizə müraciət edib hansı sahə üzrə və hansı ölkələrdə oxumaq istədiyini deyir. Bunun əsasında biz hansı universitetlərdə bu ixtisasın olduğunu araşdırırıq, həmçinin tələbənin istəyinə əsasən ölkəni seçirik. Universitetlərin qəbul şərtləri bizdə olduğundan tələbəyə istədiyi ixtisas üzrə uyğun ali məktəbdə təhsil almaq üçün hansı prosedurlardan keçməli olduğunu deyirik. Məsələn, universitetə qəbul üçün müsahibə tələbi varsa, ona necə hazırlaşmalı olduğunu, hansı imtahanlardan keçəcəyini, orta məktəb attestatı, yaxud ali məktəb diplomu üzrə orta bal tələbini bildiririk və buna uyğun hərəkət etməsini məsləhət görürük. Diqqət edilməli digər bir məqam isə xaricdə təhsil alan tələbələrin diplomlarının Azərbaycanda tanınması məsələsidir. “Zenith” xaricdə təhsil şirkətinə müraciət edən 1000 nəfərdən çox abituriyent bu il tələbə adını qazanıb və bu, bizim üçün uğurdur. Tələbələrimizin sevinci bizim sevincimizdir.

- Hansı diplomlar tanınmayacaq?

- Günümüzdə bu mövzu öz aktuallığını qorumaqdadır. Şirkətimiz Azərbaycanda diplomları 100 faiz tanınan universitetlərlə əməkdaşlıq edir. Tələbə 4-5 il ərzində təhsil haqqı ödəyir, əlavə xərclər çəkir və bu kifayət qədər böyük məbləğ edir. Ona görə əmin olmalıdır ki, Vətənə qayıtdıqdan sonra diplomu təsdiqlənəcək. Lakin bəzən valideynlər və tələbələr yalançı vədlərə aldanırlar. Diplomun tanınması üçün ali təhsil müəssisələrinin akreditasiyasının olması vacibdir. Lakin tək vacib şərt bu deyil. Tələbə Elm və Təhsil Nazirliyinin təyin etdiyi təhsil müddətində həmin ölkədə olmalıdır ki, diplomu təsdiqlənsin. Ümum-Avropa təhsil baza sistemindən və Təhsildə Keyfiyyət Təminatı Agentliyinin saytından isə mütəmadi olaraq diplomları tanınan universitetlər barədə məlumat ala bilərsiniz.

- Nahid bəy, qiyabi təhsillə bağlı anlaşılmazlıqlara aydınlıq gətirməyinizi istərdik.

- Cəmiyyətimizdə qiyabi təhsillə distant təhsili qarışdırırlar. Qiyabi təhsil postsovet ölkələrinə məxsus təhsil formasıdır. Məsələn, Türkiyə, Avropa təhsil sistemində qiyabi təhsil forması olmadığına görə bu ölkələrdə yalnız əyani və distant təhsildən söhbət gedə bilər. Azərbaycanda isə distant təhsil formalaşmayıb və bənzər analogiya yoxdur. Odur ki, bu təhsil forması ölkəmizdə təsdiqlənmir. Valideynlər bu məqama diqqət etməlidirlər.

- “Zenith” xaricdə təhsil şirkəti olaraq gələcək tələbələrə nə tövsiyə etmək istərdiniz?

- İlk növbədə, hansı xarici ölkədə təhsil almaq istədiyinizi, arzuladığınız ixtisası müəyyənləşdirin. Həmin ölkənin dilini mənimsəyin. Digər ölkələrin vətəndaşları da Azərbaycan dilinə yiyələnərək ölkəmizdə imtahansız təhsil ala bilirlər. Azərbaycan universitetləri də xarici ölkələrin vətəndaşları üçün açıqdır. Yaxşı olar ki, hər bir valideyn, ilk növbədə, bu işdə təcrübəsi olan şəxslər və ya şirkətlərlə məsləhətləşsinlər. Uşaqlarını xaricə oxumağa göndərən valideynlər ən dəyərli varlıqlarını bizə etibar edirlər. Buna görə də düzgünlük, vicdan və məsuliyyət bizim əsas prinsiplərimizdir. Bizim ixtisaslı mütəxəssislərimiz zəng vuran istənilən şəxsə ətraflı cavab verirlər. İstənilən bir şirkətin keyfiyyətli xidmətini bilmək üçün onun göstərdiyi nəticələrə nəzər yetirmək bəs edir. Bu baxımdan xarici ölkələrdə təhsil alan tələbələrimiz bizim uğurlu fəaliyyətimizin ən yaxşı sübutudur. Gələcək illərdə imtahansız və yalnız attestatla qəbul imkanlarının məhdudlaşdırılacağı ilə bağlı yayılan şayiələrə gəlincə, bu cəfəngiyatdır. Haaqa konvensiyasına qoşulan bütün dövlətlər kimi, Azərbaycan da beynəlxalq hüququn normalarına uyğun olaraq bu prosesdən geri qalmayacaq. Odur ki, “Zenith” xaricdə təhsil şirkətinə müraciət edərək rahatlıqla, imtahansız, yalnız attestatla arzuladığınız ixtisasa qəbul ola bilərsiniz.

“Zenith” xaricdə təhsil şirkəti

Əlaqə üçün: (050) 836-50-50

İnstaqram: zenith_xaricde_tehsil