® “Kapital Bank”ın nümayəndəsi: İpoteka kreditləşməsini genişləndirməkdə məqsəd insanların mənzilə olan ehtiyacını ödəməkdir
Son zamanlar kommersiya bankları tərəfindən ipoteka kreditlərinin rəsmiləşdirilməsi istiqamətində böyük işlər görülür. Kommersiya bankları İpoteka və Kredit Zəmanət Fondu tərəfindən təqdim olunan kreditlərlə yanaşı, öz vəsaitləri hesabına sərfəli daxili ipoteka kreditləri də təqdim edir. Bu sahədə ölkənin iri banklarından olan “Kapital Bank” daha böyük portfelə malik olmaqla müştərilərinə sərfəli şərtlər əsasında ipoteka kreditləri təklif edir. AZƏRTAC “Kapital Bank”ın Pərakəndə satış idarəsinin baş direktoru Ramil İmamovun ipoteka kreditləşməsi sahəsindəki yeniliklər barədə müsahibəsini təqdim edir.
- Ramil müəllim, son zamanlar “Kapital Bank” ipoteka kreditlərinin verilməsinə böyük diqqət ayırır. Xahiş edirik bu istiqamətdə olan yeniliklər və statistik məlumatlar barədə məlumat verəsiniz.
- “Kapital Bank” vətəndaşların mənzil ehtiyacının ödənilməsi və yeni mənzil əldə edənlərə kömək məqsədilə ipoteka kreditlərinin verilməsini hər zaman diqqət mərkəzində saxlayır. Bununla əlaqədar olaraq son dövrdə bankımızda riteyl kreditləşmə sahəsinin tərkib hissəsi olan ipoteka kreditləşməsinin əhatə dairəsi genişləndirilib. Belə ki, əhalinin mənzilə olan tələblərinin qarşılanması məqsədilə dövlət tərəfindən maliyyələşən kreditlərin həcmi artırılıb, habelə bankın öz vəsaiti hesabına kreditlərin verilməsinə başlanılıb. Statistik göstəricilərə nəzər salsaq görərik ki, hazırda “Kapital Bank”ın ipoteka kredit portfeli artaraq 200 milyon manat həddinə çatıb. Bankın gələcək prioritetlərindən biri cari portfeli saxlamaqla yanaşı, daha da artırmaqdır.
- “Kapital Bank”da əsasən hansı növ ipoteka kreditləri mövcuddur?
- “Kapital Bank” cari il üzrə İpoteka və Kredit Zəmanət Fondu hesabına verilən adi və güzəştli ipoteka kreditlərin verilməsində aktiv iştirak edib. Fond hesabına verilən kreditlər üzrə yerləşdirmə ötən ilin müvafiq dövrü ilə müqayisədə 25 faiz artıb. Bundan sonrakı dövr üzrə bankımız tərəfindən İpoteka və Kredit Zəmanət Fondu hesabına verilən kreditlərin həcminin artırılması planlaşdırılır. Həmçinin “Kapital Bank” Mənzil İnşaatı Dövlət Agentliyi (MİDA) tərəfindən təqdim olunan mənzillərin kreditləşməsi üzrə olan dövlət layihəsində də aktiv iştirak edir. Ötən il ərzində MİDA layihəsi üzrə təqdim olunan mənzillər üçün 3 milyon manat həcmində kredit rəsmiləşdirilib. Bu ipoteka növü üzrə kredit portfeli ümumilikdə 6 milyon manat təşkil edir. Cari il ərzində MİDA tərəfindən təqdim olunan yeni layihələrə əsasən mənzillərin kreditləşməsi nəzərdə tutulur və vətəndaşların müraciətlərinə operativ şəkildə baxılması təmin edilir. Bununla əlaqədar “Kapital Bank”ın rəsmi internet səhifəsində (www.kapitalbank.az/loans), həmçinin bütün ölkəni əhatə edən filial şəbəkəmizdə vətəndaşların müraciətlərinin qəbul edilməsi üçün rahat imkan yaradılıb.
Bundan başqa dövlət layihələri ilə yanaşı, “Kapital Bank” müştərilərin artan mənzil tələbatlarını ödəmək üçün öz vəsaiti hesabına 2 növ yeni daxili ipoteka məhsulunu təklif edir. İpoteka kreditləşməsini genişləndirməkdə məqsəd insanların mənzilə olan ehtiyaclarını ödəməkdir.
- İpoteka kreditləşməsi yalnız Bakı şəhərini əhatə edir?
- Regionlarda əhalinin yaşayış şəraitinin və mənzil təminatını yaxşılaşdırmaq məqsədilə bu ilin may ayından etibarən regionlar üzrə güzəştli şərtlərlə sosial ipoteka məhsulunun kreditləşməsinə başlanılıb. Qeyd olunan məhsul növündən əsasən aztəminatlı və sosial təbəqəyə mənsub olan gənc ailələrin faydalanması nəzərdə tutulur. Bir aydan artıq müddət ərzində bu məhsul növündən 22 vətəndaş faydalanıb ki, bu şəxslərə verilən kreditlərin həcmi 500 min manat miqdarındadır. Bu məhsul növü üzrə 10 milyon manat civarında kreditlərin verilməsi nəzərdə tutulur və mütəmadi olaraq müraciətlər qəbul edilir.
Paralel olaraq bank tərəfindən ipoteka kreditləşməsinin əhatə dairəsi Bakı, Abşeron və Sumqayıt üzrə yeni növ daxili ipoteka krediti məhsulunun satışına başlanılıb. Təklif olunan məhsul növü ilə müştərilərə 10 il müddətinə 500 min manatadək daxili ipoteka kreditindən faydalanmaq imkanı yaradılıb. Müştərilərimiz üçün sevindirici xəbər olaraq bildirək ki, hazırda tərəfimizdən müvafiq məhsul üzrə 3 aylıq endirim kampaniyası təklif olunur. Belə ki, kampaniya müddətində müştərilərimiz 10 faizdən başlayan illik faiz dərəcəsi ilə bu kreditlərdən faydalana bilərlər. Kampaniya sentyabrın 30-dək davam edəcək. Bu məhsul növü üzrə bir sıra mənzil tikinti kooperativləri ilə də əməkdaşlıq etmək nəzərdə tutulub. Bunun nəticəsində bank tikinti sektorunda fəaliyyət göstərən biznes subyektlərinə də öz dəstəyini göstərir.
- İpoteka kreditlərindən faydalanmaq istəyənlər “Kapital Bank”a hansı kanallarla müraciət etməlidirlər?
- Artan ipoteka kreditləşməsi tələbatını ödəmək və müştərilərə operativ xidmət göstərmək məqsədilə “Kapital Bank” tərəfindən ipoteka krediti verən xidmət nöqtələrinin sayı artırılaraq, regionlar üzrə 52, Naxçıvan Muxtar Respublikası üzrə bir, Bakı şəhəri üzrə 2, ümumilikdə isə 55 filialda müştərilərə xidmət göstərilir. Gələcəkdə yarana biləcək əlavə ehtiyacların ödənilməsi üçün bu sayın daha da artırılması planlaşdırılır. Həmçinin ipoteka kreditləşməsi üzrə müştərilərin müraciətlərinin operativ şəkildə qəbulu, təhlili və cavablandırılması filiallarla yanaşı müxtəlif onlayn kanallar - (+99451) 250 99 99 “WhatsApp” nömrəsi, 8196 qısa nömrəsi, 196 Məlumat Mərkəzi, bankın rəsmi internet səhifəsi (www.kapitalbank.az/loans) vasitəsilə də həyata keçirilir.
Bölmənin digər xəbərləri
