"Barattson" şirkəti və Auditorlar Palatası Milli mühasibləri sertifikatla təltif edib
Bakı, 8 oktyabr, AZƏRTAC
"Barattson" şirkəti və Auditorlar Palatası Milli mühasibləri sertifikatla təltif edib.
Palatadan AZƏRTAC-a bildiriblər ki, milli sertifikatların təqdimetmə mərasimində "Barattson" şirkətinin rəhbəri Elşən Rəhimov, Auditorlar Palatasının sədri Vahid Novruzov, Milli Sertifikat imtahanını uğurla keçən, eyni zamanda, "Barattson" şirkətinin maliyyə və mühasibatlıq sahəsində təşkil etdiyi təlim kurslarını müvəffəqiyyətlə bitirən namizədlər və media nümayəndələri iştirak ediblər.
Tədbirin keçirilməsində məqsəd Milli Sertifikat imtahanını uğurla bitirən namizədləri təltif etmək, bu sahəyə olan diqqət və marağı artırmaqdan ibarət olub.
"Barattson" şirkətinin rəhbəri Elşən Rəhimov mühasibatlıq sahəsinə marağın artması və bu sahənin yüksək dinamika ilə inkişafı barədə tədbir iştirakçılarını məlumatlandırıb. O, "Barattson" şirkətində təşkil olunan hazırlıq kurslarında ACCA tədris standartlarının uğurla tətbiqi və yüksəkixtisaslı maliyyəçilərin hazırlanması barədə danışıb. Milli Sertifikat imtahanının əhəmiyyəti barədə çıxış edən Elşən Rəhimov imtahanı uğurla keçən namizədləri təbrik edib.
Auditorlar Palatasının sədri Vahid Novruzov qeyd edib ki, milli mühasiblərin yetişməsi istiqamətində bir sıra mühüm addımlar atılır. O, "Barattson" və Auditorlar Palatasının təhsil sahəsindəki birgə fəaliyyətindən məmnunluğunu dilə gətirərək, bundan sonra da birgə əməkdaşlığın davam edəcəyini bildirib. Bu sahəyə olan dövlət dəstəyindən söz açan palata sədri imtahanda yüksək nəticə göstərən namizədləri təbrik edib və onlara uğurlar arzulayıb.
Sonra Milli Sertifikat imtahanını uğurla keçən namizədlər sertifikatla təltif olunublar. Qeyd edilib ki, bu il təşkil olunan Milli Sertifikat imtahanında 24 namizəd iştirak edib, 15 namizəd imtahanı uğurla keçib.
Tədbirin sonunda "Barattson" şirkəti tərəfindən maliyyə və mühasibatlıq sahəsində təşkil olunan təlim kurslarını uğurla bitirən namizədlər də sertifikatla təltif olunublar.
Bildirilib ki, avqust-sentyabr ayları ərzində təşkil olunan kursları 61 nəfər yüksək nəticə ilə bitirib.
Qeyd edək ki, dünya miqyasında tanınan ACCA kvalifikasiyasının Azərbaycanda ən çox yayılmış F3 Mühasibat Uçotu fənnini beynəlxalq standartlara uyğun Azərbaycan dilində yalnız "Barattson" şirkəti tədris edir. Fənnin tədrisi ilə yanaşı, Milli Mühasibatlıq imtahanı Azərbaycanda yalnız "Barattson" şirkəti və Auditorlar Palatasının birgə təşkilatçılığı ilə həyata keçirilir. F3 Mühasibat Uçotu imtahanı yerli mütəxəssislərin bu sahədə bilik səviyyəsini təsdiqləyən imtahandır və Milli Sertifikat adı ilə tanınır. Bu imtahanı uğurla keçən namizədlər "Barattson" şirkəti və Auditorlar Palatası tərəfindən təsdiqlənən Milli Sertifikatla təltif olunurlar.
Bölmənin digər xəbərləri
