"Müsyö Jordanın Qarabağ sərgüzəştləri” tamaşasının Bakı premyerası gerçəkləşib
Bakı, 7 mart, AZƏRTAC
10 Mart - Milli Teatr Günü münasibətilə Mədəniyyət Nazirliyinin, Dövlət Milli Gənc Tamaşaçılar Teatrı və Azərbaycan Teatr Xadimləri İttifaqının birgə təşkilatçılığı ilə “Müsyö Jordanın Qarabağ sərgüzəştləri” tamaşasının Bakı premyerası gerçəkləşib.
AZƏRTAC xəbər verir ki, Ağdam Dövlət Dram Teatrının paytaxtda təqdim etdiyi səhnə əsərinə gənc və istedadlı rejissor Fuad Cavadzadə quruluş verib.
Gənc rejissorun yenilikçi baxış bucağı ilə yaradıcı və innovativ yanaşması əsasında hazırlanan səhnə əsəri, paytaxt tamaşaçılarının rəğbətini qazanaraq böyük maraqla qarşılanıb.
Tamaşanın əsas süjet xəttini fransalı alim Müsyö Jordanın Qarabağa gəlməsi, Qarabağın adət-ənənələri, məşhur Qarabağ xalçaları, atları, muğamı, yeməkləri, bitkiləri ilə yaxından və əyani tanış olmaq istəməsi, gördüklərini bütün dünyaya çatdıra bilməsi məqsədilə Şahbaz bəyi özü ilə Fransaya aparmaq istəyi təşkil edir.
Bir hissədən ibarət olan tamaşa vasitəsilə tamaşaçılara Qarabağ adət-ənənələrinin təbliğ və tərənnümü ilə yanaşı, maarifçilik, cəhalətin tənqidi və elmin təbliği təqdim olunur.
Yeni yaradıcılıq işinin quruluşçu rejissoru Fuad Cavadzadə, quruluşçu rəssamı Müşviq Qarayev, geyim üzrə rəssamı Qönçə Həzizadə, musiqi tərtibatçısı Zaur Rəşidov, rəqslərin quruluşu Şükür Həsənzadə, rejissor assistenti Ceyhun Yusifovdur.
Tamaşada aktyorlar Kərim Həsənov, Anar Əhməd, Zərifə Ağayeva, Fərhad Fərhadzadə, Afərdə Əhmədova, Ramil Hüseynzadə, Xəyalə Xudadatova, Camal Zamanov, Tural Yusifov, Behbud Əsgərov, Turan Nərimanov, Yusif Ziyadlı iştirak ediblər.
Qeyd edək ki, Mədəniyyət Nazirliyinin regionlarda teatr prosesinin canlanmasına, teatr sahəsində kadrların peşəkarlıq səviyyəsinin artırılmasına yönəlmiş "Öyrədərək, öyrənirəm" layihəsi çərçivəsində gənc rejissor Fuad Cavadzadənin Ağdam Dövlət Dram Teatrında “Aktyorun öz təbiətinin açılmasından obrazın yaradılmasına qədər olan yol. K.S.Stanislavski sisteminin psixofiziki mərhələləri” mövzusunda təlimləri keçirilib. Ustad dərslərinin praktik və nəzəri biliklərinin təkmilləşdirilməsi məqsədilə yaradıcı kollektivlə M.F.Axundzadənin "Hekayəti Müsyö Jordan Həkimi-Nəbatat və dərviş Məstəli şah Cadükuni-Məşhur" pyesi əsasında “Müsyö Jordanın Qarabağ sərgüzəştləri” adlı tamaşa hazırlanaraq ictimaiyyətə təqdim olunub. Əvvəlcə Qarabağda, Ağdam Dövlət Dram Teatrında premyerası gerçəkləşən tamaşa, ətraf rayon və şəhərlərdə dəfələrlə uğurla nümayiş olunub.
Bölmənin digər xəbərləri
