"Qarabağ" növbəti transferini həyata keçirib
Bakı, 17 iyul, AZƏRTAC
"Qarabağ" yeni mövsüm üçün daha bir futbolçunu heyətinə qatıb.
AZƏRTAC xəbər verir ki, Zaqrebin “Dinamo” klubu ilə uzun sürən danışıqlar uğurla nəticələnib və Sami Mmae icarə əsasında komandada forma geyinəcək. İcarə müqaviləsi 1 illik nəzərdə tutulub.
Peşəkar karyerasına 2014-cü ildə Belçikanın “Standard” klubunda başlayan Sami 2017-2018-ci illərdə icarə əsasında Niderland təmsilçisi “Maastrixt”in formasını geyinib. 2018-2021-ci illərdə Belçikanın “Sent-Truden”, 2021-2024-cü illərdə Macarıstanın “Ferensvaroş” klubunda çıxış edən müdafiəçi ötən il “Dinamo”ya keçib. Belçikanın U-19 və U-21 yığmalarında forma geyinmiş Sami 2020-ci ildə debüt etdiyi Mərakeş millisində 10 matç keçirib. O, Çempionlar Liqasının 2024/2025-ci illər mövsümünün pley-offunda “Dinamo”nun heyətində komandamıza qarşı hər iki oyunda 90 dəqiqə meydanda olub.
Qeyd edək ki, Ağdam təmsilçisi indiyədək daha üç futbolçunu – braziliyalılar Dani Bolt və Pedro Bikalyo, Fil Dişi Sahilindən olan Kris Kuakunu transfer edib.
Bölmənin digər xəbərləri
