ABŞ AZƏRBAYCANLILARI YARATDIQLARI YENİ ŞƏBƏKƏ İLƏ SEÇİCİLƏRİN QÜVVƏSİNİ SƏFƏRBƏR EDİRLƏR
2008-ci il ABŞ-da seçki ilidir. Noyabrda amerikalılar seçki məntəqələrinə gedərək, təkcə prezident və vitse-prezident deyil, həm də Konqresin Nümayəndələr palatasının bütün üzvlərini, Senatın üçdə bir hissəsini, ştatların qubernatorlarını və yerli hakimiyyət orqanlarına təmsilçiləri seçəcəklər. Amerikanın Azərbaycan icması bu ərəfədə təşkilatlanaraq, seçicilərin qüvvəsini səfərbər edir. AZƏRTAC-ın xüsusi müxbiri xəbər verir ki, bu missiyanı üzərinə “ABŞ Azərbaycanlıları şəbəkəsi” götürmüşdür. Yanvarın 10-dan onun www.usazeris.org internet səhifəsi açılacaqdır. Layihə diaspor fəallarının maddi dəstəyi ilə bir il ərzində reallaşdırılmışdır.
Amerika azərbaycanlılarının seçici qüvvəsini üzə çıxarmaq məqsədi ilə yaradılan şəbəkə Birləşmiş Ştatlarda yaşayan soydaşlarımızı səsvermə hüquqları barədə maarifləndirmək, siyasi proseslərə cəlb etmək və seçkiqabağı kampaniyalarda Amerikanın türkdilli seçicilərini narahat edən məsələləri diqqət mərkəzinə gətirmək niyyətindədir. Usazeris.org müasir texnologiyalardan istifadə edərək, Azərbaycan mənşəli seçicilərin yerli və federal qanunverici və icra orqanları, media nümayəndələri ilə əlaqələrini asanlaşdırır. Belə ki, internet səhifəsində qeydiyyatdan keçəndən sonra Azərbaycan mənşəli hər bir Amerika vətəndaşı dərhal istədiyi konqresmenə, quberantora və ya KİV-ə məktub, müraciət, məlumat və s. informasiyalar göndərə biləcəkdir. Bu yolla soydaşlarımız prezidentliyə, Konqresə, yerli icra hakimiyyətlərinə seçkilərdə namizədlərlə sıx əlaqə qurmaq, öz problemlərini kampaniyalarda işıqlandırmaq fikrindədirlər. Şəbəkədən alınan məlumata görə, Birləşmiş Ştatların Azərbaycan mənşəli seçicilərini maraqlandıran mövzular arasında enerji təhlükəsizliyi, dini tolerantlıq, NATO, Avropa İttifaqı və Dünya Ticarət Təşkilatına dair ABŞ-ın siyasəti, müttəfiq ölkələrə humanitar və texniki yardım, vergilər, sosial təminat və səhiyyə məsələləri prioritet yerləri tutur.
Şəbəkənin Amerika azərbaycanlılarına müraciətində “Səsvermə demokratiyanın əsas pillələrindən biri, lakin yalnız birinci mərhələ” olduğu vurğulanır, namizədlərlə seçildikdən sonra da mütəmadi əlaqə saxlamaq, ABŞ prezidentinə, konqresmenlərə və media nümayəndələrinə arzu və istəklərini çatdırmağın, onların həllində kömək axtarmağın vacibliyi bildirilir.
Xatırladaq ki, əzəldən ABŞ-da yaranan “qrasrut” (ingilis dilində “ot” və “kök” sözlərinin birləşməsi) hərəkatının - yəni adi seçicilərin müəyyən məsələlər ətrafında könüllü şəkildə birləşib maraqlarını təmsil etməsinin ölkənin siyasi mühitində mühüm təsiri vardır. Usazeris.org saytında deyilir ki, “bu Amerika terminini anlamaq üçün əsrlər boyu Azərbaycan və türk dillərində istifadə olunan “ot kökü üstündə bitər” məsəlini xatırlatmaq kifayətdir. Amerikalıların və türkdilli xalqların, coğrafiyadan asılı olmayaraq, eyni düşüncəyə malik olduğunu nümayiş etdirən bu misala əsaslanaraq, ABŞ Azərbaycanlıları şəbəkəsi icmamızı maraqlandıran “köklü” məsələlərin üstündə “ot kimi bitən” nə qədər seçici olduğunu müəyyənləşdirib, onları birləşdirməyə və sayını çoxaltmağa çalışacaqdır.
Əsasən Kaliforniya, Nyu-York, Nyu-Cersi, Texas və Virciniya ştatlarında məskunlaşan 400 minlik Azərbaycan mənşəli amerikalılar yarım milyonluq türk icması ilə səsini birgə ucaldaraq, 2008-ci ildə ABŞ siyasətində yeni “qrasrut” fəaliyyətinə qədəm qoyacaqlar.
Bölmənin digər xəbərləri
