ABŞ-IN SABİQ PREZİDENTİ CİMMİ KARTER “HƏMAS”A İMKAN VERMƏYƏ ÇAĞIRIR
AZƏRTAC “Novosti” agentliyinə istinadla xəbər verir ki, Karter “Vaşinqton post” qəzetinin 20 fevral nömrəsində dərc edilmiş məqaləsində yazır: “ABŞ və İsrailin müsbət rol oynaması vacibdir. Cəza vasitəsilə Fələstin xalqına mane olmaq üçün iki dövlət arasında hər hansı gizli və ya rəsmi “sövdələşmə” səmərəsiz olacaq və fəlakətli nəticələrə gətirib çıxaracaqdır”.
Sabiq ABŞ prezidenti “Həmas”ın “dinc birlik hökuməti” yaratmağa çalışdığı barədə hərəkatın rəsmi nümayəndəsinin bəyanatını xatırladaraq, ona bunu əməli surətdə təsdiq etmək imkanı verməyə çağırmışdır.
Karter İsrailin gömrük rüsumları və vergilərdən hər ay fələstinlilərə 50 milyon dollar verilməsinin qarşısını almaq, habelə Fələstin parlamentinə üzv seçilən “Həmas” nümayəndələrinə Fələstin ərazisindəki İsrail blok-postlarından keçməyi qadağan etmək qərarını da tənqid etmişdir. O, Corc Buş hökumətinin Fələstin hakimiyyət orqanlarına Amerikanın yardımını dayandırmaq qərarına da tənqidi münasibət bildirmişdir. Karter vurğulamışdır ki, rəsmi Vaşinqton Fələstinə öz maliyyə yardımını “qaçqınlara, səhiyyə və digər humanitar xidmətlərə cavabdeh olan BMT agentlikləri vasitəsilə” yönəltmək planından hələlik imtina edir. Onun fikrincə, bu cür mövqe fələstinliləri zorakılığa daha çox təhrik edəcək və “Həmas”ın mötədillik göstərməsi üçün qətiyyən stimul olmayacaqdır.
Sabiq prezident yazır: “Həmas”dan namizədlər seçilməsi sülh danışıqlarına mənfi təsir göstərməyəcək, çünki beş ildən çoxdur ki, belə danışıqlar, sadəcə olaraq, aparılmamışdır. Fələstinlilərin lideri Mahmud Abbas ilə birbaşa danışıqlar aparılmasına heç nə əngəl törətmir”.
Bölmənin digər xəbərləri
