ABŞ-ın Yuta ştatında Azərbaycanın strateji əhəmiyyətinə dair təqdimatlar olub
Vaşinqton, 27 fevral, AZƏRTAC
ABŞ-ın Yuta ştatının paytaxtı Solt Leyk Siti şəhərində yerləşən aparıcı təhsil mərkəzlərindən biri olan Yuta Universitetinin dəvəti ilə Azərbaycanın ABŞ-dakı səfiri Elin Suleymanov “Ermənistan-Azərbaycan Dağlıq Qarabağ konflikti” mövzusunda tələbə və professor heyəti qarşısında çıxış edib.
AZƏRTAC xəbər verir ki, çıxışında E.Süleymanov Azərbaycanın coğrafiyası və tarixi barədə iştirakçılara qısa məlumat verib. 1918-ci ildə yaradılan Azərbaycan Xalq Cümhuriyyətinin müsəlman aləmində ilk demokratik respublika və bütün vətəndaşlarına, o cümlədən qadınlara seçki hüququ verən ölkələrdən biri olduğunu qeyd edib.
Ölkəmizin zəngin neft və qaz quyularına malik olduğunu vurğulayan diplomat dünyada ilk neft yatağının 1848-ci ildə məhz ölkəmizdə qazıldığını diqqətə çatdırıb. O, Azərbaycanın regiondakı vacib iqtisadi əhəmiyyətindən danışaraq, müstəqillik əldə etdikdən sonra ölkəmizdə reallaşdırılan və həyata keçirilməkdə olan iri iqtisadi layihələr, o cümlədən Bakı-Tbilisi-Ceyhan neft kəməri, Cənub Qaz Dəhlizi, Bakı-Tbilisi-Qars dəmir yolu layihələri barədə ətraflı məlumat verib.
Səfir Azərbaycanın Ermənistan tərəfindən silahlı təcavüzə məruz qaldığını, nəticədə ərazisinin təqribən 20 faizinin işğal edildiyini, işğalçılıq və etnik təmizləmə siyasəti nəticəsində 1 milyondan çox insanın qaçqın və məcburi köçkünə çevrildiyini diqqətə çatdırıb.
E.Süleymanov iştirakçılara 1992-ci il 26 fevral tarixində Xocalıda Ermənistan silahlı qüvvələri tərəfindən dinc əhaliyə qarşı törədilən və Ermənistan Azərbaycan Dağlıq Qarabağ münaqişəsi tarixində ən dəhşətli faciə olan Xocalı soyqırımı barədə də məlumat verib. Səfir Azərbaycan dövlətinin və xalqının hər zaman sülhə hazır olduğunu bildirib.
Səfir soyqırımı cinayətinin birbaşa iştirakçıları olan və qanlı cinayətin törədilməsini etiraf edən Ermənistan Respublikasının keçmiş rəhbərləri Robert Koçaryan və Serj Sarkisyanın hazırda Ermənistan Respublikasında öz xalqlarına qarşı törətdikləri cinayətlərə görə məsuliyyətə cəlb edilmələri prosesinin getdiyini bildirib və bir gün sözügedən şəxslərin ölkəmizin Xocalı şəhərində insanlıq əleyhinə törətdikləri cinayətlərə görə də məsuliyyətə cəlb ediləcəklərinə ümidvar olduğunu qeyd edib.
Bölgədə sülhün bərqərar olunması və Ermənistanın da regionda həyata keçirilən iqtisadi layihələrə qoşulması üçün bu ölkənin silahlı qüvvələrinin Azərbaycan Respublikasının işğal olunmuş ərazilərindən çıxarılmasının vacibliyini diqqətə çatdırıb.
Daha sonra E.Süleymanov tərəfindən Yuta Universitetinin tələbə və professor heyətinin çoxsaylı sualları cavablandırılıb.
Səfər çərçivəsində həmin gün səfir E.Süleymanov ABŞ-ın Yuta ştatının Senatına və Nümayəndələr Palatasına dəvət edilib və hər iki Palatada Azərbaycanla bağlı təqdimat edilib. Kapitol binasında Yuta ştatı Senatının Prezidenti Styuart Adams, senator Cin Deyvis, Beynəlxalq Ticarət və Diplomatiya Departamentinin Direktoru Frans Kolbla görüşlər keçirilib.
Yuta ştatı Senatının Prezidenti Styuart Adamsla ikitərəfli görüş zamanı Azərbaycan-ABŞ ikitərəfli münasibətləri barədə müzakirələr aparılıb. Səfir Solt Leyk Siti şəhərinə yenidən səfər etməsindən məmnunluğunu ifadə edib.
Daha sonra E.Süleymanov Yuta ştatı Senatının iclasına qonaq qismində dəvət edilib. Senator Cin Deyvis iclasda təqdimatla çıxış edərək ölkəmizin tarixi barədə qısa məlumat verib, ölkəmizin hətta ABŞ-dan əvvəl qadınlara seçki hüququ verən ölkələrdən biri olduğunu qeyd edib. Ölkəmizin regionda ABŞ-ın strateji tərəfdaşı olduğunu və İsrail dövləti ilə sıx əməkdaşlıq edən ölkə olduğunu qeyd edib.
Eyni zamanda, səfir E.Süleymanov Yuta ştatının Nümayəndələr Palatasının iclasına da qonaq qismində dəvət edilib. Respublikaçılar partiyasından olan Nümayəndələr Palatasının üzvü Erik Hatçinqs ölkəmiz barədə təqdimatla çıxış edib.
Hər iki palatada Azərbaycanla bağlı təqdimatlar canlı yayımda nümayiş etdirilib.
Yusif Babanlı
AZƏRTAC-ın xüsusi müxbiri
Vaşinqton
Bölmənin digər xəbərləri
