“Abşeron Zeytun” MMC-nin əməkdaşının öldürülməsi ilə bağlı cinayət işinin istintaqı başa çatdırılıb
Bakı, 2 sentyabr, AZƏRTAC
Ötən il sentyabrın 28-də paytaxtın Xətai rayonu ərazisində yerləşən “Abşeron Zeytun” Məhdud Məsuliyyətli Cəmiyyətində işləyən Bağır Piriyevin xəsarətlər yetirilib qəsdən öldürülməsi, habelə Filman Piriyevə və Fərhad İsmayılova qarşı xuliqanlıq edilməsi faktı üzrə Cinayət Məcəlləsinin 120.2.1-ci (bir qrup şəxs, qabaqcadan əlbir olan bir qrup şəxs, mütəşəkkil dəstə və ya cinayətkar birlik (təşkilat) tərəfindən adam öldürmə), 120.2.2-ci (xuliqanlıq niyyətilə qəsdən adam öldürmə), 221.2.1-ci (xuliqanlıq, bir qrup şəxs tərəfindən törədildikdə), 221.2.2-ci (ictimai qaydanın qorunması üzrə vəzifəni yerinə yetirən və ya ictimai qaydanın pozulmasının qarşısını alan hakimiyyət nümayəndəsinə və ya digər şəxsə müqavimət göstərməklə xuliqanlıq etmə) və 221.3-cü (silah qismində istifadə olunan əşyalar tətbiq etməklə xuliqanlıq etmə) maddələri ilə Xətai Rayon Prokurorluğunda cinayət işi başlanaraq istintaq aparılıb.
Xətai Rayon Prokurorluğunun AZƏRTAC-a daxil olan məlumatına görə, istintaqla müəyyən edilib ki, ötən il sentyabrın 28-də saat 11 radələrində Ramil Ağayevin qardaşı Kənan Ağayev ilə birlikdə Xətai rayonu ərazisində yerləşən “Abşeron Zeytun” MMC-yə məxsus zeytun bağına gedərək zeytun yığarkən cəmiyyətdə zeytun yığımına nəzarət edən və orada sahə rəisi işləyən Bağır Piriyev, mühasib Filman Piriyev və fəhlə Fərhad İsmayılov onlara yaxınlaşaraq həmin ərazidə zeytun yığmağın qadağan olunduğunu deyərək, ərazini tərk etmələrini istədikdə Ramil Ağayev və qardaşı Kənan Ağayev sonunculara ərazini tərk etməyəcəklərini və zeytun yığmağa davam edəcəklərini bildiriblər. Buna görə aralarında yaranmış mübahisə zamanı Ramil Ağayev qardaşı Kənan Ağayevlə birlikdə bir qrup şəxs halında orada olan şəxslərə öz üstünlüyünü nümayiş etdirmək məqsədilə cəmiyyətdə insanlar arasında bərqərar olunmuş birgə yaşayış qaydalarını kobud surətdə pozan, cəmiyyətə açıqca hörmətsizlik ifadə edən, şəxs üzərində zor tətbiq olunması ilə müşayiət edilən qərəzli xuliqanlıq hərəkətləri edərək yumruqla, təpiklə və taxta dəyənəklə Bağır Piriyevə zərbələr vurmasına, sonuncuya kömək etmək üçün onlara yaxınlaşan Filman Piriyevə silah qismində istifadə etdiyi taxta dəyənəklə vuraraq xəsarətlər yetirməsinə əsaslı şübhələr müəyyən edilib.
Kənan Ağayev Cinayət Məcəlləsinin 120.2.1-ci, 120.2.2-ci və 221.3-cü, Ramil Ağayev isə Cinayət Məcəlləsinin 221.2.1-ci və 221.2.2-ci maddələri ilə təqsirləndirilən şəxs qismində cəlb edilərək barələrində məhkəmənin müvafiq qərarları ilə həbs qətimkan tədbiri seçilib.
Cinayət işi üzrə müvafiq ekspertizalar təyin olunub, hadisə yerinə baxış keçirilib, maddi sübutlar götürülüb, şahidlər dindirilib və digər zəruri prosessual hərəkətlər yerinə yetirilib.
Cinayət işi üzrə istintaq yekunlaşdırılıb və baxılması üçün aidiyyəti üzrə Bakı Ağır Cinayətlər Məhkəməsinə göndərilib.
Bölmənin digər xəbərləri
