ADAU-da Milli Dirçəliş Günü ilə əlaqədar tədbir təşkil olunub
Gəncə, 14 noyabr, Elcan Məmmədov, AZƏRTAC
Azərbaycan Dövlət Aqrar Universitetinin (ADAU) Əsaslı Kitabxanasında 17 Noyabr - Milli Dirçəliş Günü ilə əlaqədar tədbir keçirilib.
AZƏRTAC-ın bölgə müxbiri xəbər verir ki, Dövlət Himninin səsləndirilməsi ilə başlayan tədbirdə Ümummilli Lider Heydər Əliyevin və şəhidlərin əziz xatirəsi bir dəqiqəlik sükutla yad olunub.
Tədbirdə çıxış edən universitetin tədris işləri üzrə prorektoru Əhməd Məlikov 17 Noyabr - Milli Dirçəliş Gününün Azərbaycan xalqı üçün əhəmiyyətindən danışıb. Bildirib ki, 1988-ci il noyabrın 17-də Azərbaycan xalqının azadlıq səsini ucaldaraq imperiyaya qarşı hamılıqla ayağa qalxması onun dirçəlişi yolunda dönüş nöqtəsi olub. Öz haqqı, azadlığı uğrunda mübarizəyə qalxan, torpaqlarına sahib çıxmaq istəyən Azərbaycan xalqı bu müqəddəs ideallar naminə birlik və bərabərliyini bir daha bütün dünyaya nümayiş etdirib.
Ulu Öndər Heydər Əliyevin milli dövlət quruculuğu sahəsində fəaliyyətindən söz açan İctimai fənlər kafedrasının müdiri Elgün Aslanov Prezident İlham Əliyevin bu kursu inamla davam etdirərək, Azərbaycana böyük Zəfər sevincini yaşatdığını vurğulayıb.
Daha sonra Mühəndislik fakültəsinin dekanı Təvəkgül İslamov, kafedra müdiri Zakir Hüseynov, kitabxana direktoru Kamil Məmişov və İctimai fənlər kafedrasının müəllimi Günay Quliyeva məruzələrlə çıxış ediblər.
Sonda tələbələr Milli Dirçəliş Günü ilə bağlı şeirlər səsləndiriblər.
Bölmənin digər xəbərləri
