AFR KANSLERİ MKİ-NİN ALMANİYADA GİZLİ ƏMƏLİYYATLARININ PARLAMENT TƏHQİQİNİ APARMAĞI TƏLƏB EDİR
Kansler Avropaya səfərə çıxmış ABŞ-ın dövlət katibi Kondoliza Rays ilə görüşdən sonra bildirmişdir ki, “parlamentin təhqiqat komissiyası ABŞ xüsusi xidmət orqanlarının Almaniya aerodromlarından istifadə etməsi hallarını müəyyənləşdirmək üçün ən münasib vasitədir”.
Amerika diplomatiyası başçısının səfəri ərəfəsində Almaniyanın nüfuzlu “Şpigel” həftəlik jurnalı yazmışdır ki, əsirləri MKİ-nin gizli həbsxanalarına daşıyan təyyarələr Almaniya ərazisinə 400 dəfədən çox ara enişi enmişdir”.
Merkel demişdir: “Xarici işlər naziri Ştaynmayer bu komissiya ilə birlikdə ətraflı təhqiqat aparmalı və əvvəlki hökumətin bu əməliyyatlardan xəbəri olub-olmadığı barədə məlumat verməlidir”. Onun sözlərinə görə, terrorizmlə mübarizənin bütün təfərrüatını açıqlamaq olmaz, lakin belə əməliyyatlar üzərində parlament nəzarəti həyata keçirilməlidir.
Kansler vurğulamışdır ki, Almaniya XXI əsrin yeni təhlükələrinə qarşı mübarizədə müttəfiqlik öhdəliklərini yerinə yetirəcək, amma bu mübarizədə tətbiq olunan metodların demokratik qaydalara uyğun gəlməsində daim təkid edəcəkdir.
Xatırladaq ki, MKİ təyyarələrinin 10-dan çox ölkənin hava limanlarına gizli tranziti barədə KİV-lərin xəbərləri siyasi qalmaqala səbəb olmuşdur, çünki bu praktika onların hava məkanının pozulması deməkdir. Həmin ölkələrin hökumətləri müvafiq informasiyanı araşdırmağa başlamışlar.
Qalmaqal “Vaşinqton post” qəzetinin 2 noyabr nömrəsində dərc edilmiş məlumatdan başlanmışdır. Avropa ölkələri onların ərazisində ABŞ-ın gizli həbsxanaları olduğu və təyyarələrin xəlvəti endiyi barədə məlumatları çox əsəbi qarşılamışdır. Avropa Şurasının baş katibi Terri Devis bildirmişdir ki, təşkilatın 45 ölkəsinin hökumətlərinə rəsmi məktub göndərərək, bu xəbərlərin araşdırılmasını xahiş etmişdir.
Bölmənin digər xəbərləri
