Ağamurad Qəhrəmanov: Yerli yarışlar gücümüzü sınamaq üçün əla fürsətdir
Bakı, 26 mart, AZƏRTAC
Kişi idman gimnastikası üzrə 27-ci Azərbaycan birinciliyi və Bakı çempionatında iştirak gücümüzü sınamaq imkanı verir.
AZƏRTAC xəbər verir ki, bu sözləri yarışın iştirakçısı Ağamurad Qəhrəmanov deyib.
A.Qəhrəmanov qeyd edib ki, bu gün proqram onun üçün daha çətin keçib. Proqramın sabah - yarışın sonuncu günündə daha yaxşı olacağını bildirən gimnast bu cür yarışların idmançıların öz güclərini sınamaq üçün əla fürsət olduğunu və beynəlxalq startdan əvvəl xüsusi vacibliyini diqqətə çatdırıb.
Martın 31-dən aprelin 3-dək Bakıda təşkil olunacaq dünya kuboku yarışlarında üç proqramda çıxış edəcəyini açıqlayan gimnast bildirib: "Dünya kuboku yarışlarına hazırlıq plana uyğun davam edir. Məşqçi bizə inanır və mən də əlimdən gələni etməyə çalışacağam. Yaxşı nəticəyə ümid edirəm. Doğma ölkədə keçirilən beynəlxalq yarışlarda çıxış etmək böyük qürur və məsuliyyətdir”.
Martın 26-dək davam edəcək yarışlarda “Ocaq Sport”, Bakı Gimnastika Məktəbi, Sumqayıt Olimpiya İdman Kompleksi, Sumqayıt İxtisaslaşdırılmış Olimpiya Ehtiyatları Uşaq Gənclər İdman Məktəbi və Balakəni təmsil edən 79 idmançı qüvvəsini sınayır.
Bölmənin digər xəbərləri
