Aİ “Sumud” donanmasına görə İsrailə qarşı sanksiyalar tətbiq edə bilər
Bakı, 2 iyun, AZƏRTAC
Avropa İttifaqı (Aİ) “Sumud” beynəlxalq donanması ilə bağlı vəziyyətə görə İsrailə qarşı sanksiyalar paketi üzərində işə başlamağı müzakirə edir.
AZƏRTAC xəbər verir ki, “Euractiv” portalı bu barədə Avropa İttifaqı Şurasının iyunun 18–19-da keçiriləcək sammitinə dair layihə sənədinə istinadla məlumat yayıb. Məlumata görə, sənəddə beynəlxalq sularda donanmaya hücum zamanı saxlanılan şəxslərə qarşı kobud rəftar pislənilir. Eyni zamanda, Avropa İttifaqına üzv dövlətlərin xarici işlər nazirləri insan hüquqları pozuntularında rol oynayan İsrail rəsmilərinə qarşı məhdudlaşdırıcı tədbirlərin tətbiqini nəzərdən keçirə bilər.
Sanksiyaların qəbul edilməsi üçün Avropa İttifaqı ölkələrin yekdil razılığı tələb olunur, lakin bəzi üzv dövlətlər bu təşəbbüsə qarşı çıxır. Qərarın gələcək sammit çərçivəsində müzakirə olunacağı gözlənilir.
Qeyd edək ki, “Sumud” aksiyası aprel ayında start götürüb. Onun məqsədi Qəzza sektorunun dəniz blokadasını yarmaq və daimi humanitar dəniz dəhlizi yaratmaqdır. Mayın 18-də İsrail ordusu sahildən yüzlərlə kilometr uzaqda, beynəlxalq sularda donanmanın gəmilərinə hücum edərək aksiyada iştirak edən fəalları saxlayıb.
Bölmənin digər xəbərləri
