Aktyor Orxan İskəndərli: Məşhurluq heç vaxt məqsədim olmayıb VİDEO
Bakı, 10 sentyabr, AZƏRTAC
Müasir dövrdə gənclərin qarşılaşdığı problemlər, yanlış seçimlərin doğurduğu nəticələr və zərərli istiqamətlərə marağın fəsadları müxtəlif sənət əsərlərində öz əksini tapır. İctimai Televiziyada (İTV) yayımlanmış və populyarlıq qazanmış “Mikrorayon” serialı da məhz bu mövzulara diqqətçəkən ekran işlərindəndir.
Serialda gənclərin kriminal çevrələrə marağı, bu yola necə cəlb olunmaları, yanlış seçimlərin onların həyatına təsiri və həmin yoldan geri dönməyin mümkünlüyü ön plana çəkilir. Ekran işində hadisələr vasitəsilə gənclərə yanlış seçimlərin ağır nəticələri barədə mesaj verilir.
“Mikrorayon”da diqqətçəkən obrazlardan biri də aktyor Orxan İskəndərlinin canlandırdığı Azikdir. Mənfi obraz olan Azik serialın əsas konfliktlərinin formalaşmasında mühüm rol oynayır. Obrazın davranışları və gənclərlə münasibəti kriminal mühitin cəlbedici görünən, lakin təhlükəli tərəflərini nümayiş etdirir.
Aktyor Orxan İskəndərli AZƏRTAC-a müsahibəsində “Mikrorayon” serialı, Azik obrazı, çəkiliş prosesi, tamaşaçı reaksiyaları və öz yaradıcılıq fəaliyyəti ilə bağlı danışıb. Onun sözlərinə görə, uşaqlıqdan aktyor olmaq istəyib. Lakin dəqiq elmləri yaxşı bildiyi üçün ali məktəbə qəbul zamanı kompüter mühəndisliyi ixtisasını seçib. Universitetdə təhsil aldığı müddətdə də aktyorluğa marağı davam edib.
Aktyor mənfi obrazı canlandırmağın onun üçün fərqli və maraqlı təcrübə olduğuna da diqqət çəkib. Onun sözlərinə görə, belə obrazlar aktyordan yalnız xarakteri yaratmağı deyil, personajın davranışlarının arxasında dayanan motivləri də düzgün anlamağı tələb edir.
Məşhurluğun heç vaxt məqsədi olmadığını deyən Orxan İskəndərli Azik obrazının onun populyarlığına ciddi təsir göstərdiyini vurğulayıb. Aktyorun sözlərinə görə, bu obraz tamaşaçılar tərəfindən geniş müzakirə olunub və onun yaradıcılığına marağı artırıb. “Bu obraz üzərində işləyərkən yalnız ssenarinin mənə təqdim olunmasını gözləmirdim. Əslində, aktyor rola ssenari gəldiyi gündən hazırlaşmır. O, bütün həyatı boyu gördükləri, müşahidə etdikləri və təhlil etdikləri ilə həmin rolu canlandırır”, – deyə aktyor söyləyib.
Ətraflı videomaterialda izləyə bilərsiniz.
Bölmənin digər xəbərləri
