Albaniya KİV-də Prezident İlham Əliyevin fəaliyyəti barədə məqalələr dərc olunub
Afina, 22 dekabr, AZƏRTAC
Albaniyanın nüfuzlu “Panorama”, “Balkan.web” və “Revistapsikologji” nəşrlərində Azərbaycan Prezidenti İlham Əliyevin həyat və fəaliyyəti barədə məqalələr dərc edilib.
Azərbaycanın Yunanıstandakı və Albaniyadakı səfirliyindən AZƏRTAC-a verilən məlumata görə, məqalələrdə Prezident İlham Əliyevin həyata keçirdiyi mühüm işlər və əldə edilmiş uğurlar, eləcə də dövlətimizin başçısının rəhbərliyi dövründə ölkəmizin sosial, idman, mədəniyyət, səhiyyə, təhsil, nəqliyyat infrastrukturunun yenilənməsi, kənd təsərrüfatı və neft-kimya sənayesi sahələrində görülmüş işlər, həyata keçirilmiş mühüm infrastruktur layihələri barədə ətraflı danışılır.
Qeyd edilir ki, Prezident İlham Əliyevin təşəbbüsü ilə bölgənin iqtisadi inkişafına yeni nəfəs verilib, mühüm regional layihələr icra edilib, Avropanın enerji təhlükəsizliyinə böyük töhfə verən marşrutlar yaradılıb. Beynəlxalq münasibətlər sistemində mövqeyini möhkəmləndirən, xarici ölkələr və beynəlxalq təşkilatlar ilə bərabərhüquqlu əməkdaşlıq quran Azərbaycan hər zaman etibarlı tərəfdaş kimi özünü doğruldub. Azərbaycanda çoxsaylı beynəlxalq tədbirlərin - siyasi, iqtisadi, mədəni-humanitar forumların, idman yarışlarının, elm, təhsil və hərbi sahələrdə sərgilərin, toplantıların keçirilməsində dünya ictimaiyyəti Azərbaycana böyük etimad göstərib.
Məqalədə, həmçinin son 18 ildə Prezident İlham Əliyevin rəhbərliyi ilə daxili və xarici siyasətdə həyata keçirilən islahatlar nəticəsində Azərbaycan iqtisadiyyatının sürətlə inkişaf etdiyi, ümumi daxili məhsul (ÜDM) üç dəfədən çox artdığı, Azərbaycanda yoxsulluğun səviyyəsinin 49-dan 5 faizə, işsizliyin isə 6 faizədək aşağı düşdüyü bildirilib. Ölkəmizdə əlverişli investisiya mühitinin yaradıldığı qeyd olunan məqalədə Azərbaycan iqtisadiyyatına 280 milyard dollara yaxın investisiya yatırıldığı, bunun demək olar yarısının xarici sərmayə olduğu diqqətə çatdırılıb. Azərbaycanın strateji valyuta ehtiyatları xarici dövlət borcunu altı dəfədən çox üstələdiyini, Azərbaycanın xarici borcu ÜDM-in cəmi 17,3 faizini təşkil etdiyi və 2030-cu ilin sonuna qədər bunu 10 faizə qədər endirilməsinin planlaşdırıldığı diqqətə çatdırılıb.
Yazıda, eyni zamanda, Azərbaycanın beynəlxalq səviyyədə tanınmış ərazilərinin 20 faizinin 30 ilə yaxın müddətdə Ermənistan tərəfindən işğal altında saxlanıldığı, torpaqların azad edilməsi məqsədilə Azərbaycan Ordusunun müdafiə və döyüş qabiliyyətinin artırıldığı, hərbi sənayenin inkişaf etdirildiyi və hərbi qulluqçuların sosial-iqtisadi vəziyyətinin yaxşılaşdırılması ilə bağlı görülən işlər haqqında məlumat verilib. Oxucular 2020-ci ilin sentyabrında cəbhə xəttində Ermənistanın növbəti hərbi təxribatı ilə üzləşən Azərbaycan Ordusu əks-hücuma keçərək ərazilərini işğaldan azad etməsi və ermənilərin 2020-ci il noyabrın 10-da kapitulyasiya aktı imzaladığı barədə də məlumatlandırılıb. Vurğulanıb ki, Azərbaycan BMT Təhlükəsizlik Şurasının 1993-cü il tarixli qətnamələrinin icrasını öz gücü ilə təmin edib.
İqbal Hacıyev
AZƏRTAC-ın xüsusi müxbiri
Afina
Bölmənin digər xəbərləri
