ALMANİYADA ATOM ELEKTRİK STANSİYALARINI SÜNİ DUMAN QORUYACAQDIR

15.01.2004 [11:09]
Çap et
A⁺ A^-

AZƏRTAC-ın xarici informasiya agentliklərindən aldığı xəbərdə deyilir ki, atom elektrik stansiyalarını təyyarələri ələ keçirmiş terrorçuların hücumlarından süni duman qoruyacaqdır.

Ölkənin 18 AES–ni işlədən alman şirkətləri onların terrorçulardan qorunmasının digər imkanları sırasında süni duman qurğularını da ciddi qiymətləndirirlər.

Almanların fikrincə, təhlükə yarandığı halda, atom elektrik stansiyası bir anda qatı duman örtüyü ilə əhatə oluna bilər. Mülki təyyarələr yer səthindəki obyektləri seçə bilən radarlarla təchiz olunmadığından, terrorçular hara gəldi uçmağa məcbur olacaqlar. Doğrudur, bəzi alman ekspertləri, xüsusilə küləkli havada, dumanla müdafiə vasitəsinin səmərəliyinə şübhə edirlər. Onlar nəhəng AES tikililərini gizlətmək üçün hədsiz sayda qurğulara ehtiyac olacağını göstərirlər.

ABŞ-da isə atom elektrik stansiyalarını hava hücumundan müdafiə raket sistemləri ilə təchiz etmək imkanları üzərində düşünürlər.