Almaniyada rekord sayda - 13,3 milyon insan yoxsulluq həddindən aşağı yaşayır
Bakı, 2 iyun, AZƏRTAC
2025-ci ildə Almaniyada yoxsulluq səviyyəsi “acınacaqlı həddə” çatıb.
AZƏRTAC xəbər verir ki, Almaniya Sosial Təminat Assosiasiyasının (“Paritätische Wohlfahrtsverband”) məlumatına görə, ölkə əhalisinin 16 faizindən çoxu yoxsulluq həddindən aşağı yaşayır. Bu, 13,3 milyon Almaniya vətəndaşı deməkdir.
Almaniyada yoxsulluq həddi orta gəlirin 60 faizi olaraq müəyyən edilib. Bu, bütün qazanılan gəlirlərin orta meyarı olan gəlirdir. “Nu.nl” xəbər verir ki, 2025-ci ildə bu rəqəm 54.066 avro olub.
Bundan əlavə, alman təşkilatı müxtəlif əhali qrupları arasındakı fərqin artdığını da qeyd edir. Xüsusilə, yaşlılar, qadınlar və tək valideynlər getdikcə daha çox yoxsulluq içində yaşayırlar. Belə ki, 65 yaşdan yuxarı hər beş nəfərdən biri yoxsulluq həddindən aşağı yaşayır və ya yoxsulluğa düşmək riski altındadır. Təşkilat hesab edir ki, bu rəqəmlər “dövlətin mövcud nöqsanlarını” nümayiş etdirir.
“Paritätische Wohlfahrtsverband” qeyd edir ki, yoxsulluq insanların gözlənilməz xərcləri, məsələn, sıradan çıxan paltaryuyan maşını dəyişdirmək kimi xərcləri ödəməsini çətinləşdirir. Bu, həmçinin onların gündəlik xərclərini, məsələn, qida məsrəflərini ödəməsini daha da müşkül edir. Yüksək enerji qiymətləri vəziyyəti daha da çətinləşdirir.
Almaniyada ən yüksək yoxsulluq səviyyələri Bremen, Berlin, Hamburq, Leypsiq və Xemnits şəhərlərində müşahidə olunur. Cənubda, o cümlədən daha varlı Bavariya və Baden-Vürtemberq əyalətlərində yoxsulluq səviyyəsi nisbətən aşağıdır.
Bölmənin digər xəbərləri
