ALMANİYADA YENİ XARİCİ PASPORTLARIN VERİLMƏSİNƏ BAŞLANILMIŞDIR
AZƏRTAC-ın xüsusi müxbiri xəbər verir ki, Almaniya Avropa İttifaqına üzv ölkələr içərisində birinci olaraq vətəndaşlarına 2005-ci il noyabrın 1-dən etibarən yeni növ biometrik elektron səfər pasportlarının verilməsinə başlamışdır. Almaniya Federal Xarici İşlər İdarəsi və Federal Daxili İşlər Nazirliyi bu barədə rəsmi məlumat yaymışlar. Məlumatda bildirilir ki, xaricə səfər etmək arzusunda olan hər bir vətəndaş yeni pasport almalıdır. Pasportlara vətəndaşların digital fotoşəkli və əl barmaqlarından ikisinin izləri əlavə olunacaqdır. Vətəndaşların hazırda istifadə etdikləri köhnə səfər pasportları bu sənədlərin müddəti bitənə qədər etibarlı sayılacaqdır.
Almaniya ictimaiyyəti və siyasi dairələri federal hökumətin Avropa İttifaqının beynəlxalq terrorizmə, cinayətkar qruplaşmalara və qanunsuz miqrasiyaya qarşı mübarizənin gücləndirilməsinə dəstək məqsədi ilə həyata keçirdiyi bu proqramı müdafiə edir və yüksək qiymətləndirirlər. Onların qənaətinə görə, yeni növ biometrik səfər pasportlarının tətbiqinin beynəlxalq terrorçuların, mütəşəkkil cinayətkarların müəyyənləşdirilməsi və ifşa edilməsində əvəzsiz rolu olacaqdır.
Bölmənin digər xəbərləri
