AMEA-nın prezidenti: İstinad göstəriciləri ilə bağlı sistemli iş aparılmasına ciddi ehtiyac var
Bakı, 16 mart, AZƏRTAC
İstinad göstəricilərinə görə də Azərbaycan elminin nüfuzu artıb. Lakin bu sahəyə də diqqətin artırılması vacibdir.
AZƏRTAC xəbər verir ki, bunu AMEA-nın prezidenti akademik İsa Həbibbəyli Akademiyanın 2022-ci ilə dair elmi və elmi-təşkilati fəaliyyətinə həsr olunmuş Ümumi yığıncağında çıxışı zamanı deyib.
Onun sözlərinə görə, humanitar və ictimai elmlər sahəsində istinad göstəricilərinin müəyyən edilməsi ilə bağlı sistemli iş aparılmasına ciddi ehtiyac var.
Bildirib ki, ciddi elmi əsərlərin xarici dillərdə və nüfuzlu dünya nəşriyyatlarında çap olunması Azərbaycan elminin beynəlxalq nüfuzunu artıra bilər: "Azərbaycan elmi ölkəmizin sosial-iqtisadi inkişafı proseslərində daha çox və daha yaxından iştirak etməlidir. Qarabağa və Qərbi Azərbaycana Böyük Qayıdış hərəkatlarına elmimiz daha çox töhfələr verməyə səfərbər olmalıdır. Elmimiz dünya elminə daha çox inteqrasiya etməli, bəşəri problemlərin araşdırılıb tədqiq olunmasına daha fəal şəkildə qoşulmalıdır. Beynəlxalq qrantlar və patentlər sahəsində də dönüşə nail olmalıyıq. Biz Azərbaycan alimləri Nobel mükafatına gedən yolun dərslərini təhlil və müzakirə etməklə Azərbaycan elminin diqqətini dünya elminin prioritetlərinə doğru daha geniş şəkildə istiqamətləndirməyi planlaşdırırıq”.
Bölmənin digər xəbərləri
