Anastasiya Lavrina: Prezident İlham Əliyevə yüksək etimad Azərbaycanın uğurlu dövlət siyasətinin nəticəsidir
Bakı, 3 iyul, AZƏRTAC
Son ictimai rəy sorğularında Prezident İlham Əliyevə yüksək ictimai etimadın qorunub saxlanılması Azərbaycanın son illərdə əldə etdiyi tarixi nailiyyətlərin və uğurlu dövlət siyasətinin məntiqi nəticəsidir. Bu etimad, ilk növbədə, vətəndaşların real nəticələrə, milli maraqların qətiyyətlə müdafiəsinə və ölkənin davamlı inkişafına verdiyi yüksək qiymətin ifadəsidir.
Bu fikirləri AZƏRTAC-a açıqlamasında Yeni Azərbaycan Partiyası Gənclər Birliyinin üzvü, ADA Universitetinin İnkişaf və Diplomatiya İnstitutunun elmi tədqiqatçısı Anastasiya Lavrina deyib.
O qeyd edib ki, Prezident İlham Əliyevin rəhbərliyi ilə Azərbaycan müasir tarixinin ən mühüm uğurlarına imza atıb.
“Ölkəmizin ərazi bütövlüyü və dövlət suverenliyi tam bərpa olunub, Azərbaycan Bayrağı Qarabağın və Şərqi Zəngəzurun hər bir nöqtəsində qürurla dalğalanır. Prezident İlham Əliyev Ümummilli Lider Heydər Əliyevin müəyyən etdiyi dövlətçilik kursunu uğurla davam etdirərək həm ata vəsiyyətini, həm də Azərbaycan xalqına verdiyi sözü yerinə yetirdi. Müzəffər Ali Baş Komandan kimi 44 günlük Vətən müharibəsində qazanılan tarixi Zəfər təkcə hərbi qələbə deyil, həm də milli iradənin, güclü dövlətçiliyin və tarixi ədalətin təntənəsi oldu. Bu Qələbənin əsas xüsusiyyətlərindən biri xalq-dövlət birliyinin ən yüksək səviyyədə özünü göstərməsi idi. Müharibə dövründə Azərbaycan cəmiyyəti misilsiz həmrəylik nümayiş etdirdi, hər bir vətəndaş ordumuzun və Ali Baş Komandanın ətrafında sıx birləşdi. Məhz bu milli birlik Azərbaycanın Zəfərini təmin edən əsas amillərdən birinə çevrildi və bu gün də dövlətə olan etimadın mühüm əsaslarından biri kimi çıxış edir. Azərbaycanda milli həmrəylik yalnız müharibə dövründə deyil, gündəlik ictimai həyatda da özünü aydın şəkildə göstərir.
Azərbaycan müxtəlif etnik və dini mənsubiyyətə malik xalqların əsrlər boyu sülh, qarşılıqlı hörmət və etimad şəraitində birgə yaşadığı, multikulturalizm və tolerantlıq ənənələrinin uğurla qorunduğu ölkədir. Dövlət tərəfindən bütün vətəndaşların hüquq və azadlıqları etibarlı şəkildə təmin olunur, etnik və dini müxtəliflik isə cəmiyyətimizin zənginliyi və milli birliyimizin ayrılmaz tərkib hissəsi kimi qiymətləndirilir. Bu amillər vətəndaşların dövlətə olan inamını və ictimai etimadı daha da möhkəmləndirir”, - deyə tədqiqatçı qeyd edib.
A.Lavrina hesab edir ki, ictimai etimadı şərtləndirən digər mühüm amillər ölkədə sabitliyin və təhlükəsizliyin qorunması, iqtisadi inkişafın davamlı xarakter alması, işğaldan azad olunmuş ərazilərdə genişmiqyaslı bərpa və quruculuq işlərinin həyata keçirilməsi, keçmiş məcburi köçkünlərin doğma torpaqlarına qayıdışı, eləcə də sosial rifahın yüksəldilməsi istiqamətində ardıcıl tədbirlərin görülməsidir. Vətəndaşlar dövlət siyasətinin konkret nəticələrini gündəlik həyatlarında görür və bunu yüksək qiymətləndirirlər. Məhz bu reallıqlar ictimai etimadın möhkəmlənməsində mühüm rol oynayır. Azərbaycanın beynəlxalq nüfuzunun əhəmiyyətli dərəcədə artması da ictimai etimadın formalaşmasına təsir göstərən əsas amillərdəndir. Bu gün Azərbaycan beynəlxalq münasibətlər sistemində etibarlı tərəfdaş, regional sabitliyin təminatçısı, enerji təhlükəsizliyi, nəqliyyat-logistika və beynəlxalq dialoq sahələrində mühüm aktor kimi qəbul olunur. Azərbaycanın Türk Dövlətləri Təşkilatı çərçivəsində irəli sürdüyü təşəbbüslər, türk həmrəyliyinin gücləndirilməsi istiqamətində atdığı addımlar və üzv dövlətlər arasında əməkdaşlığın dərinləşdirilməsinə verdiyi töhfələr ölkəmizin artan beynəlxalq nüfuzunun mühüm göstəricilərindəndir. Müstəqil və milli maraqlara əsaslanan xarici siyasət Azərbaycanın beynəlxalq aləmdə söz sahibi olan dövlət kimi mövqeyini daha da möhkəmləndirib.
Anastasiya Lavrina deyib ki, bütün bu amillər gələcəkdə də dövlətlə cəmiyyət arasında qarşılıqlı etimadın daha da möhkəmlənməsinə xidmət edəcək. Güclü dövlətçilik ənənələrinə, milli birliyə və strateji inkişaf kursuna əsaslanan bu model Azərbaycanın dayanıqlı inkişafını, milli maraqlarının etibarlı müdafiəsini və beynəlxalq nüfuzunun daha da artmasını təmin edəcək.
Müxbir- Səbinə Əlizadə
Bölmənin digər xəbərləri
