Anastasiya Mixaylova: Dağ yaşayış məntəqələrinin dayanıqlılığı iqlim dəyişiklikləri fonunda xüsusi əhəmiyyət daşıyır
Bakı, 20 may, AZƏRTAC
Dağ və yüksək dağlıq yaşayış məntəqələrinin davamlı inkişafı, xüsusilə iqlim dəyişikliklərinə və təbii fəlakətlərə qarşı dayanıqlılığın artırılması müasir urban siyasətin əsas istiqamətlərindən biridir.
AZƏRTAC xəbər verir ki, bu fikirləri BMT-nin Məskunlaşma Proqramının (UN-Habitat) Rusiya Federasiyası üzrə proqram rəhbəri Anastasiya Mixaylova Ümumdünya Şəhərsalma Forumunun 13-cü Sessiyası (WUF13) çərçivəsində keçirilən “Dağ yaşayış məntəqələrinin davamlı inkişafı” mövzusunda tədbirdə çıxışı zamanı səsləndirib.
O bildirib ki, dağ yaşayış məntəqələri təbii fəlakətlər və ekstremal temperatur dəyişiklikləri qarşısında xüsusilə həssasdır. Bu baxımdan, iqlim dəyişikliklərinə dayanıqlılıq və təhlükəsizlik məsələləri yüksək dağlıq regionların inkişafında əsas prioritetlərdən biridir. UN-Habitat şəhərsalma sahəsində mədəni xüsusiyyətləri, iqlim şəraitini, biomüxtəlifliyin qorunmasını və dağ landşaftlarının mühafizəsini nəzərə alan yanaşmaları təşviq edir. Bu metodlar şəhərlərin həddindən artıq genişlənməsinin qarşısını almaq üçün kompakt və qarşılıqlı əlaqəli şəhər planlaşdırılmasına əsaslanır.
UN-Habitat nümayəndəsi diqqətə çatdırıb ki, təşkilat bu istiqamətdə MDB ölkələri, o cümlədən Azərbaycan, Ermənistan, Qazaxıstan, Qırğızıstan və Tacikistanla fəal əməkdaşlıq edir.
Bölmənin digər xəbərləri
