Aprel döyüşləri Azərbaycanın sarsılmaz iradəsini bir daha bütün dünyaya nümayiş etdirib RƏY
Bakı, 1 aprel, AZƏRTAC
Azərbaycan Ordusunun qələbəsi ilə nəticələnən tarixi Aprel döyüşlərindən 10 il ötür. Belə ki, 2016-cı ilin aprelində Ermənistan silahlı qüvvələrinin cəbhə xəttində törətdiyi ardıcıl təxribatlara cavab olaraq həyata keçirilən əks-hücum əməliyyatı nəticəsində Azərbaycan Ordusu mühüm hərbi-strateji uğurlar əldə edib. Dörd gün davam edən döyüşlər zamanı Silahlı Qüvvələrimiz düşmənə sarsıdıcı zərbələr endirib, onun canlı qüvvəsini və hərbi texnikasını məhv edib. Nəticədə, Ermənistan silahlı birləşmələri ciddi itkilərə məruz qalıb. Aprel döyüşləri Azərbaycan Ordusunun yüksək döyüş qabiliyyətinin, peşəkarlığının və qələbə əzminin bütün dünyaya nümayişidir.
Bu sözləri AZƏRTAC-a açıqlamasında Milli Məclisin deputatı Könül Nurullayeva deyib.
O qeyd edib ki, əks-əməliyyat nəticəsində bir sıra strateji yüksəkliklər işğaldan azad olunub. Bu yüksəkliklərin azad edilməsi cəbhə xəttində üstünlüyün Azərbaycan tərəfinə keçməsini təmin etməklə yanaşı, ordumuzun mövqelərini daha da möhkəmləndirib. Döyüşlərin ən simvolik hadisələrindən biri isə Cəbrayıl rayonunun Lələtəpə yüksəkliyində Azərbaycan Bayrağının ucaldılmasıdır. Bu Qələbə nəticəsində Cocuq Mərcanlı kəndinin bərpasına başlanılıb və kəndə həyat qayıdıb. Beləliklə, Cocuq Mərcanlı Böyük Qayıdış prosesinin ilk real təcəssümünə çevrilib.
“Aprel döyüşləri yalnız hərbi uğur deyil, həm də Ermənistanın hərbi-siyasi məğlubiyyəti kimi qiymətləndirilir. Bu qələbə bir daha sübut edib ki, Azərbaycan Ordusu istənilən an ölkənin ərazi bütövlüyünü bərpa etməyə qadirdir. Həmin il Azərbaycan Silahlı Qüvvələrinin yaradılmasının 100 illiyi münasibətilə Bakının Azadlıq meydanında keçirilən möhtəşəm hərbi paradda Aprel döyüşləri və Naxçıvan əməliyyatı zamanı azad edilən ərazilərdə ucaldılan Azərbaycan bayraqları nümayiş etdirilib. Paradda çıxış edən Ali Baş Komandan İlham Əliyev ölkəmizin ərazi bütövlüyünün mütləq bərpa olunacağını qətiyyətlə vurğulayıb”, - deyə deputat qeyd edib.
K.Nurullayeva Ermənistan tərəfinin Aprel döyüşlərindən nəticə çıxarmadığını xatırladaraq növbəti illərdə də təxribatların davam etdirildiyini diqqətə çatdırıb. Vurğulayıb ki, 2020-ci ilin iyul ayında Tovuz istiqamətində törədilən hücumların qarşısı Azərbaycan Ordusu tərəfindən qətiyyətlə alınıb və düşmənə ağır zərbələr vurulub.
“Nəhayət 2020-ci ilin sentyabrında dövlətimizin başçısı İlham Əliyevin rəhbərliyi ilə Azərbaycan xalqı “Dəmir yumruq” kimi birləşərək 44 günlük Vətən müharibəsində tarixi Qələbə qazanıb. Bu müharibə nəticəsində ölkəmizin ərazi bütövlüyü böyük ölçüdə bərpa olunub. Daha sonra həyata keçirilən lokal antiterror tədbirləri nəticəsində Azərbaycan öz dövlət suverenliyini tam təmin edib. Bununla da uzun illər davam edən münaqişəyə son qoyulub. Aprel döyüşləri müasir Azərbaycanın hərb tarixində mühüm mərhələ kimi qalmaqla yanaşı, böyük Zəfərə aparan yolun başlanğıcıdır. Bu şanlı qələbə Azərbaycan Ordusunun gücünü, xalq-ordu birliyini və ölkəmizin sarsılmaz iradəsini bir daha bütün dünyaya nümayiş etdirib”, - deyən deputat fikirlərini yekunlaşdırıb.
Bölmənin digər xəbərləri
