Aqrar sahənin dinamik inkişafı Azərbaycan iqtisadiyyatına yeni nəfəs gətirir
Bakı, 22 aprel, AZƏRTAC
Son illərdə həyata keçirilən islahatlar həm ölkənin sosial-iqtisadi inkişafında, həm də iqtisadiyyatın neft amilindən asılılığının azaldılmasında mühüm rol oynayır. Bununla əlaqədar dövlətimizin başçısı İlham Əliyev çoxsaylı sərəncam və fərmanlar imzalayıb. Prezidentin aqrar sahədə intensiv texnologiyaların tətbiqi ilə bağlı tapşırığına uyğun olaraq ölkəmizdə aqroparkların yaradılması geniş vüsət alıb.
Bunu AZƏRTAC-a açıqlamasında Milli Məclisin deputatı Müşfiq Cəfərov deyib.
M.Cəfərov bildirib ki, Azərbaycanda müasir tələblərə cavab verən belə aqromüəssisələrə çox böyük önəm verilir. Rəqabətqabiliyyətli kənd təsərrüfatı məhsullarının istehsalında, ixrac potensialının və məşğulluğun artırılmasında xüsusi rol oynayan bu aqroparkların yaradılması nəticəsində kənd təsərrüfatı məhsullarımızın istehsalı böyük həcmdə artacaq. Bununla da ölkəmizin qarşısında duran əsas vəzifələrdən biri - ərzaq təhlükəsizliyi məsələsi öz həllini tapacaq. Bu aqroparkların bir üstünlüyü də ondan ibarətdir ki, burada ən müasir texnologiyalar tətbiq olunur, o cümlədən müasir suvarma texnologiyaları, pilot suvarma sistemləri quraşdırılır. Fəaliyyətə başlayan bütün aqroparkların texnika ilə təchizatına xüsusi diqqət yetirilir. Belə ki, “Aqrolizinq” ASC-dən uzunmüddətli lizinq əsasında Amerika istehsalı olan 20 adda 41 “John Deere” və Türkiyə istehsalı olan müxtəlif kənd təsərrüfatı təyinatlı texnika və aqreqatlar alınaraq istehsal prosesinə cəlb edilib. Görülən bu işlər aqrar sahənin dinamik inkişafında mühüm rol oynayır və Azərbaycan iqtisadiyyatına yeni nəfəs gətirir. Əlbəttə, aqroparkların fəaliyyətinin bu şəkildə qurulması Prezident İlham Əliyevin aqrar sektorda apardığı uğurlu siyasətin təzahürüdür.
Deputatın sözlərinə görə, aqroparklar həm də hər bir bölgənin infrastrukturuna yeni töhfələr verir. Bu isə həmin rayonların iqtisadi potensiallarının möhkəmlənməsində aqroparkların rolundan xəbər verir. Bir sözlə, bu cür aqroparkların yaradılması bir daha sübut edir ki, Prezident İlham Əliyevin rəhbərliyi ilə aqrar sahənin inkişafı istiqamətində görülən işlər, dövlətimizin başçısının bu sahənin təkmilləşdirilməsi və müasirləşdirilməsi üçün qəbul etdiyi qərarlar ölkəmizin hərtərəfli inkişafına yeni stimul verir. “Azərbaycanın dayanıqlı inkişafının təmin edilməsi baxımından kənd təsərrüfatı böyük potensiala malikdir. Aqrar sektora güzəştli kreditlərin, vergi güzəştlərinin, subsidiyaların verilməsi, aqrolizinq xidmətlərinin göstərilməsi istiqamətində mühüm addımlar atılır və böyük layihələrin icrası davam etdirilir. Ölkəmizin başçısı tərəfindən son illərdə verilmiş fərman və sərəncamlar, qəbul edilmiş qanunlar, qərarlar aqrar sektorda iqtisadi fəallığın yüksəlməsinə səbəb olub. Artıq Azərbaycanda qeyri-neft sektorunun inkişaf bazalarından biri kimi aqrar-sənaye sektoruna daha böyük üstünlük verilir”, - deyə deputat bildirib.
Müşfiq Cəfərov vurğulayıb ki, ölkəmizdə texnopark modelinin yeni forması olan aqroparkların əsas işi kənd təsərrüfatı məhsulunun istehsalı, qablaşdırılması, logistikası və satışından ibarətdir. İqtisadçı ekspertlər də hesab edirlər ki, yaxın onillikdə kənd təsərrüfatında ən mühüm layihələr aqroparkların yaradılması ilə bağlı olacaq. Məhsulların yerli və xarici bazarlara çıxarılması, saxlanması və daşınması baxımından aqroparkların rolu əvəzedilməzdir. İstehsal, emal və logistikanın bir müəssisə çərçivəsində cəmləşməsi öz səmərəsini göstərir. Bu baxımdan, Hacıqabulda “Aqro Dairy” MMC və “Azərsun Şamaxı Aqropark”ın istifadəyə verilməsi təqdirəlayiqdir.
Bölmənin digər xəbərləri
