Arxangelskdə Novruz bayramı münasibətilə təntənəli mərasim keçirilib
Bakı, 16 mart, AZƏRTAC
Rusiyanın Arxangelsk vilayətində Novruz bayramı münasibətilə təntənəli mərasim keçirilib.
Diasporla İş üzrə Dövlət Komitəsindən AZƏRTAC-a bildiriblər ki, Komitənin və region hökumətinin dəstəyi ilə gerçəkləşdirilən tədbiri Arxangelsk vilayətindəki Azərbaycan diasporu təşkil edib.
Tədbirdə yerli hakimiyyət orqanlarının, ictimaiyyətin, diasporun nümayəndələri və Azərbaycandan gələn qonaqlar iştirak ediblər.
Vilayətin Azərbaycan diasporunun rəhbəri Tərlan Qasımov mərasimdə çıxış edərək Novruz bayramının yaranma tarixindən, bu bayramın insan və təbiətin yenilənməsi, xalqlar arasında mənəvi əlaqələrin möhkəmləndirilməsi və ümumi dəyərlərin qorunub saxlanılmasının rəmzi kimi qeyd olunmasından danışıb.
Vilayətin qubernatoru İqor Orlov bayram münasibətilə soydaşlarımızı təbrik edib, bu gözəl bahar bayramının birlikdə keçirilməsinin xoş ənənəyə çevrildiyini, Pomorye torpağının burada yaşayan xalqları bir araya gətirdiyini, Azərbaycan diasporunun şimalda ən güclü icmalardan biri olduğunu nəzərə çatdırıb.
Qeyd edilib ki, son illərdə vilayətin Azərbaycan ilə münasibətlərinin genişlənməsində və dərinləşməsində, yerli sakinlər və dövlət orqanları arasında müxtəlif sahələrdə əməkdaşlığın daha məhsuldar olmasında diasporun böyük rolu var. İqtisadi-ticarət və humanitar sahələrdə əməkdaşlıq haqqında imzalanan müqavilənin, onun reallaşdırılması üzrə tədbirlər planının yeni ideya və layihələrlə zənginləşəcəyinə əminlik ifadə olunub.
Tədbir Azərbaycanın Xalq artisti Samir Cəfərovun, milli mahnı və rəqs qrupunun çıxış etdiyi konsert proqramı ilə yekunlaşıb.
Bölmənin digər xəbərləri
