AŞPA-NIN BAŞ KATİBİ AZƏRBAYCANDA GEDƏN PROSESLƏRDƏN RAZIDIR
AZƏRTAC-ın müxbiri xəbər verir ki, qonağı səmimi salamladıqdan sonra Murtuz Ələsgərov demişdir: Azərbaycan ümummilli liderimiz Heydər Əliyevin səyləri nəticəsində Avropa Şurasına üzv olduqdan sonra ölkəmizlə bu qurum arasında möhkəm əlaqələr yaranmışdır. Ölkəmizin bu mötəbər təşkilatdakı nümayəndə heyətinin başçısı olmuş, indi isə Azərbaycana rəhbərlik edən Prezident İlham Əliyev əməkdaşlığımızı daha da inkişaf etdirir və onun bu fəaliyyəti qurum tərəfindən də yüksək qiymətləndirilmişdir. Sevindirici haldır ki, İlham Əliyev AŞPA-nın tarixində bu qurumun ən ali mükafatı ilə təltif olunmuş ikinci dövlət başçısıdır.
Biz öz milli dəyərlərimizi qorumaqla Avropaya inteqrasiya edirik. Azərbaycan parlamenti insan hüquq və azadlıqlarının müdafiəsi ilə bağlı xüsusi qanunlar qəbul etmiş, Milli Məclisdə Avropa Şurasının 40-dan çox konvensiyası təsdiq olunmuşdur. Avropa Şurası qarşısında götürdüyümüz öhdəliklərin hamısı yerinə yetirilmişdir. Yalnız bir-iki qanun qalmışdır ki, onları da sentyabr ayında qəbul edəcəyik. Avropa Şurasının siyasi məhbus hesab etdiyi şəxslərə humanistlik göstərən ulu öndərimiz, Prezident Heydər Əliyev 30-dan çox əfv fərmanı imzalamışdır. Bu siyasi kursu Prezident İlham Əliyev də davam etdirərək az vaxt ərzində 3 belə sənəd imzalamışdır.
Sonra Milli Məclisin sədri Ermənistan-Azərbaycan, Dağlıq Qarabağ münaqişəsinin tarixi, Azərbaycanın bu problemin həllində tutduğu ədalətli mövqe barədə qonağa ətraflı məlumat vermişdir. Murtuz Ələsgərov baş katibə Avropa Şurasının Dağlıq Qarabağ münaqişəsi ilə bağlı qəbul etdiyi ədalətli qətnaməyə görə təşəkkürünü bildirmişdir.
Səmimi qəbul üçün minnətdarlıq edən Bruno Haller, Azərbaycanda gedən demokratikləşmə prosesindən, insan hüquq və azadlıqlarının müdafiəsi istiqamətində atılan addımlardan razılığını bildirərək demişdir ki, bölgəyə səfərimdən əsas məqsəd Avropa Şurası Parlament Assambleyası ilə region dövlətləri arasında hərtərəfli əlaqələrin inkişaf etdirilməsi ilə bağlı fikir mübadiləsi aparmaqdır. Azərbaycanda artıq bir sıra görüşlər keçirmişəm və müəyyən fikirlərlə tanış olmuşam. Ümid edirəm ki, biz ümumi bir nəticəyə gələ biləcəyik. Mən onu da başa düşürəm ki, regionda mövcud münaqişələr əməkdaşlığımızın genişlənməsinə ciddi maneələr törədir. Amma bunun da çıxış yolu tapılmalıdır. Məlumunuzdur ki, AŞ-nin Dağlıq Qarabağ üzrə məruzəçisi Terri Devis indi qurumun baş katibi seçilmişdir. Amma, o, artıq siyasi komitədə münaqişə ilə bağlı öz çıxışını etmişdir. Təşkilat məsələ ilə bağlı yeni məruzəçi təyin edəcəkdir və ümid edirəm ki, o da fəaliyyətində Terri Devisin tövsiyələrini unutmayacaq.
Sonra görüşdə qarşılıqlı maraq doğuran digər məsələlər ətrafında fikir mübadiləsi aparılmışdır.
Bölmənin digər xəbərləri
