Astanada yüngül relsli nəqliyyatın sərnişinlərinə xəbərdarlıq: qaydanı pozanlar məsuliyyətə cəlb olunacaq
Astana, 17 may, AZƏRTAC
Astanada LRT (yüngül relsli nəqliyyat) xəttində sərnişinlər tərəfindən təhlükəsizlik qaydalarının pozulması halları qeydə alınıb.
AZƏRTAC paytaxt meriyasına istinadla xəbər verir ki, bütün qayda pozucuları stansiyalarda və qatar vaqonlarının içərisindəki videomüşahidə kameraları vasitəsilə müəyyən edilərək cinayət məsuliyyətinə cəlb olunacaqlar.
Xüsusilə, sərnişinlər lazımsız yerə təcili əyləc düyməsini basıb, təcili qapını açma düyməsini aktivləşdirib, vaqonun qapılarını içəridən açmağa cəhd edib və hətta onların bağlanmasına qəsdən mane olublar.
LRT sistemi tam avtomatlaşdırılıb - bu cür hərəkətlər potensial təhlükəsizlik riski kimi qəbul edilir. Bu da qatarın dayanmasına və dispetçer mərkəzi tərəfindən əlavə yoxlamalara gətirib çıxarır.
Xatırladaq ki, Astanada LRT xətti mayın 16-dan fəaliyyətə başlayıb. 22,4 kilometrlik marşrut üzrə 18 stansiyanı əhatə edən on beş sürücüsüz qatar hərəkət edir. Səyahət müddəti təxminən 40 dəqiqə təşkil edir, hərəkət intervalı isə 5-6 dəqiqədir.
Bölmənin digər xəbərləri
