Ata xeyir-duası ilə başlanan sənət yolu - gənc tenor Səməd Novruzovun hekayəsi
Bakı, 3 dekabr, AZƏRTAC
“Oxu, Səməd, oxu, səndə çox gözəl alınır”, - deyə Əbülqasım oğluna ürək-dirək verib. Səməd atasının bu sözlərindən sonra bir az da ürəklə klassik musiqini öyrənməyə başlayıb, məşhur ifaçıları dinləyib. Bəlkə də, onun klassik musiqiyə gəlişi elə bu dəstəkdən sonra başlayıb.
“Adətən, gənclər klassik musiqiyə o qədər də maraq göstərmirlər”, - deyə Səməd Novruzov AZƏRTAC-ın müxbiri ilə söhbətində deyir: “Məndə isə tamam əksinə olub. Əlbəttə, mən bunu Şuşadan olmağımla əlaqələndirmirəm, çünki mən heç oranı görməmişəm. Amma atamda həmin musiqilərə qarşı böyük məhəbbət var idi. O, həmişə evdə simfonik musiqilərə, Bülbül, Müslüm Maqomayev, Rəşid Behbudov, Lütfiyar İmanov və Yusif Eyvazovun ifalarına qulaq asır, məni də həvəsləndirirdi.
Amma auditoriya qarşısında, səhnədə ilk ifam orta məktəb illərində olub. Bir dəfə sağlamlıq imkanları məhdud uşaqlar üçün 5 saylı respublika xüsusi internat məktəbinin həyətində sinif yoldaşlarımla oturub söhbətləşir, arada zümzümə edir, mahnı oxuyurduq. Necə olubsa, həmin vaxt məktəbdə tədbirlərin təşkilatçısı olan Xoşqədəm Mehdiyeva yanımızdan keçəndə səsimi eşidib. Bundan sonra o, məni çağırıb məktəbdəki tədbirdə ifa edəcəyimi dedi”.
Həmin ifadan sonra məktəbin direktoru İradə Vəzirova Səmədi Rusiyanın NTV kanalı ilə yayımlanan “Tı super” verilişində iştirak etmək üçün göndərib. Təəssüf ki, bu sahədə ilk addımlarını atan Səməd həmin verilişdə laureatlar sırasına düşə bilməyib. Bir il sonra Moskvada “Belaya trost (Ağ əsa)” festivalında iştirak edərək diploma layiq görülüb.
Orta məktəbi qurtarandan sonra Bakı Musiqi Akademiyasına imtahan verib. Qabiliyyət imtahanı zamanı qədim ariya, romans və ya xalq mahnısı ifa edib. Abituriyentlər arasında ifaçılığı 10 balla qiymətləndirilən iki-üç nəfərdən biri də Səməd olub. Onun istedadını görən Xalq artisti Xuraman Qasımova Səməd Novruzovu öz sinfinə qəbul edib.
Ustad vokalçıdan dərs alan Səmədin uğurları bir-birini əvəz edib: Ümummilli Lider Heydər Əliyevin anadan olmasının 100 illik yubileyinə həsr olunmuş gənc ifaçıların IV Respublika müsabiqəsinin qalibi, bir sıra respublika və beynəlxalq yarış və müsabiqələrin laureatı...
Opera vətənində ustad dərsləri
Ötən il COP29 çərçivəsində Yaşıl Zonanın “İncəsənət pavilyonu”nda “İnklüzivlik Günü” ilə əlaqədar DOST İnklüziv İnkişaf və Yaradıcılıq Mərkəzi tərəfindən təqdim edilən tədbirin bədii hissəsində Səməd də çıxış edir. Onun ifa etdiyi bəstəkar Lucio Dallanın “Karuzo” əsəri çox böyük maraqla qarşılanır. Gənc vokalçının çıxışı Heydər Əliyev Fondunun vitse-prezidenti Leyla Əliyevanın da diqqətini çəkib və ifaçının İtaliyada təhsil alması üçün təşəbbüs göstərib.
Səməd vokal bacarıqlarını təkmilləşdirmək üçün bu il avqustun axırlarından noyabrın ortalarınadək İtaliyanın Florensiya şəhərində Sənət Akademiyasında üç ay ustad sənətkarlardan peşəkarlıq dərsi alıb. Akademiyada vokal texnikası üzrə Suzanna Riqaççidən, opera sənəti ilə əlaqədar isə Canni Giqnadan dərs alıb. Gənc vokal ifaçısı həmin təhsil ocağının tarixində ilk dəfə olaraq İtaliyanın tarixi memarlıq binası - Santo Stefano al Ponte Muzeyində iki dəfə konsert proqramı ilə çıxış edib. Tələbkar İtaliya tamaşaçıları onun ifasını yüksək dəyərləndiriblər.
O, İtaliyanın tanınmış opera müğənnisi Kiarra Panacci ilə eyni səhnəni paylaşaraq, solo və duet şəklində italyan bəstəkarlarının əsərlərindən klassik ariyaları səsləndirib. Akademiyanın digər tələbələri ilə birlikdə hesabat konsertində də yüksək peşəkarlıq və istedad nümayiş etdirib. Səmədə İtaliyadakı teatrlardan birində işləmək təklif edilsə də, o, Bakıya qayıdıb.
Gənc həmyerlimiz İtaliyadan qayıdanda opera müəllimi Canni Gianni çox mütəəssir olub və ürək sözlərini yazdığı məktubu ona verərək Bakıya qayıdandan sonra oxumağı xahiş edib. Səməd onun dediyi kimi də edib. Məktubda yazılmışdı: “Əzizim Səməd! Həyatda istedadını, emosional təmizliyini və yüksək həssaslığını qısqananlarla rastlaşacaqsan. Onlar səni fərqli görəcəklər və bunu qəbul etmək istəməyəcəklər.
...Sən öz potensialına inanmalı və heç kəsə qəlbinə şübhə toxumu səpməyə imkan verməməlisən. Zəif hesab etdiklərimiz, əslində, bizim güclü nöqtələrimizdir. Biz nə taleyin, nə də bəxtin əsiri olmamalıyıq. Biz öz həyatımızın sahibiyik. Bunu heç vaxt unutma!
Hörmət və sevgi ilə Gianni”.
Lirik tenorun yaradıcılıq axtarışları
Bir ildən artıqdır ki, DOST İnklüziv İnkişaf və Yaradıcılıq Mərkəzində təlimçi işləyən Səməd ikinci qrup görmə məhdudiyyətli sayılır. Lakin fiziki keyfiyyətləri çox sevdiyi vokal sənətinin incəlikləri öyrənməkdə, öz peşəkarlığı üzərində daimi olaraq işləməkdə ona qətiyyən mane olmur.
Ötən il Bakı Musiqi Akademiyasını bitirən Səməd deyir: “Opera teatrında çalışmaq üçün vokal partiyalarını ifa etməklə yanaşı aktyorluq keyfiyyətləri də tələb olunur. Mən dirijorun çubuğunu görür, rejissorun tələb etdiyi istənilən mizan və hərəkətləri yerinə yetirə bilərəm. Məşq prosesində də özümü olduqca sərbəst hiss edirəm və fiziki keyfiyyətlərim mənə heç bir məhdudiyyət yaratmır”.
Lirik tenor Səməd Novruzov hazırda Mozart-Dolentenin “İmmagine”, Puççininin “Donna non vidi mai” ariyası, yeni romans və mahnılar üzərində işləyir.
...Səməd əslən Şuşadan olsa da, 22 yaşlı gənc məcburi köçkünlük illərində doğulub. Gənc vokalçının istedadı, sənətə olan sevgisi və öz üzərində işləmək bacarığı onun musiqi beşiyi kimi tanınan şəhərə şöhrət gətirəcəyinə böyük ümidlər verir.
Bölmənin digər xəbərləri
