“ATASPORT” XOKKEY ÜZRƏ AVROPA KUBOKUNDA İŞTİRAK EDƏCƏKDİR
Bakı, 27 may (AZƏRTAC). Azərbaycanın qadınlardan ibarət otüstü xokkey üzrə “Atasport” klubu Hollandiyadadır. Komandamız Xertohenbos şəhərində keçiriləcək Avropa ölkələri kubokları qaliblərinin Avropa Kuboku uğrunda yarışda iştirak edəcəkdir.
Yarışlar mayın 29-da başlayacaqdır. Azərbaycan qadın xokkeyçiləri “A” qrupunda çıxış edəcəklər. Burada onların rəqibləri Hollandiyanın “Xertohenbos”, İngiltərənin “Sloy” və Belçikanın “Royal Antverp” komandaları olacaqdır. “B” qrupunda isə İspaniyanın “Terassa”, Almaniyanın “Berliner”, Rusiyanın “Volqa Telekom” və Ukraynanın “Dinamo Sumçanka” komandaları yarışacaqlar.
“Atasport” ilk oyununu mayın 29-da İngiltərənin “Sloy” komandasına qarşı keçirəcək, ertəsi gün Belçika xokkeyçiləri ilə yarışacaq, mayın 31-də isə yerli “Xertohenbos” komandasına qarşı qrup mərhələsində sonuncu oyunda iştirak edəcəkdir.
Qruplarda birinci yeri tutmuş komandalar finala çıxacaq və öz aralarında birinci yerin sahibini müəyyənləşdirəcəklər. Öz qruplarında ikinci yeri tutmuş komandalar üçüncü yer uğrunda mübarizə aparacaqlar. “A” qrupunda üçüncü yerə çıxan komanda “B” qrupunun dördüncü komandası ilə və yaxud əksinə yarışacaqdır.
Çempionlar Kubokunun yekunlarına görə sonuncu iki yeri tutmuş kollektivlər növbəti yarışlarda ikinci Avropa Trophu divizionunda çıxış edəcəklər.
Bölmənin digər xəbərləri
