Atlantik okeanında nanoplastiklərin yüksək konsentrasiyası aşkarlanıb
Bakı, 12 iyul, AZƏRTAC
Tekseldəki Niderland Kral Dəniz Tədqiqatları İnstitutunun (NIOZ) alimlərinin fikrincə, Şimali Atlantik Okeanında təxminən 27 milyon ton nanoplastik hissəciklər var. Tədqiqat göstərib ki, diametri 1 mikrometrdən az olan bu mikroskopik hissəciklər daha böyük plastik qalıqlardan əhəmiyyətli dərəcədə yüksək konsentrasiyalarda mövcuddur.
AZƏRTAC xarici mediaya istinadla xəbər verir ki, “Pelagia” tədqiqat gəmisinin göyərtəsində aparılan ekspedisiya zamanı alimlər Şimali Atlantikanın 12 nöqtəsində nümunələr götürüblər. Nümunələr üç dərinlikdə toplanılıb: səthdə 10 metr dərinlikdə, 1000 metr dərinlikdə və dəniz dibindən təxminən 30 metr yüksəklikdə. Bu yerlərin beşi Şimali Atlantik subtropik girdabında, dördü açıq okeanda və üçü Avropa kontinental şelfində olub.
Yüksək dəqiqliyə malik skanerdən istifadə edən tədqiqatçılar nanoplastik hissəciklərin hər yerdə, xüsusən də sahilyanı ərazilərdə və subtropik zonalarda, tullantıların yığılıb parçalandığı ərazilərdə olduğunu aşkar ediblər.
Tapılan ən çox yayılmış plastiklər butulkaların və qablaşdırmaların hazırlanmasında istifadə edilən PET, PVC və polistiroldur. Tədqiqat zamanı təbii mühitdə geniş yayılmış polietilen və polipropilen demək olar ki, aşkar edilməyib ki, bu da istifadə olunan analitik metodların texniki məhdudiyyətləri ilə bağlı ola bilər.
Tədqiqatçılar deyirlər ki, mikroplastiklər gözlənilməz davranış göstərə, orqanizmlərə daxil ola və ətraf mühitə daha böyük fraqmentlərdən fərqli təsir edə bilər. Alimlər plastikin okeanlara daxil olan miqdarını məhdudlaşdırmaq üçün təcili tədbirlər görməyə çağırırlar, çünki onun təsirləri ilə mübarizə üçün indiki səylər kifayət qədər effektiv deyil.
Bölmənin digər xəbərləri
