Avropa çempionatının bürünc mükafatçısı: Qarşıdakı yarışlarda qızıl medal qazanacağıma inanıram
Bakı, 24 mart, AZƏRTAC
Final uğurunda qarşılaşmanı istədiyim kimi keçirə bilmədim və 3-cü yeri tutdum. Düşünürəm ki, hər bir rəqibə qalib gəlmək olar. Qarşıdakı yarışlara daha yaxşı hazırlaşıb, qızıl medal qazanacağıma inanıram.
AZƏRTAC xəbər verir ki, bu sözləri Azərbaycan Boks Federasiyasının rəsmi saytına Xorvatiyanın Poreç şəhərində keçirilən 22 yaşadək boksçular arasında Avropa çempionatında fəxri kürsünün üçüncü pilləsinə yüksələn Nəbi İsgəndərov (67 kq) deyib.
Avropa çempionatının ilk görüşündə gürcüstanlı, daha sonra xorvatiyalı rəqibini rahatlıqla mübarizədən kənarlaşdırdığını bildirən N. İsgəndərov bu dəfə bürünc medal qazansa da, növbəti yarışlarda mükafatın əyarını yüksəltməyə çalışacağını bildirib: “Dörddəbir finalda fransalı boksçu ilə üz-üzə gəldim. Hakim də bir az məni sıxırdı. Buna baxmayaraq, onu üçüncü raundda nokaut etdim. Ən güclü rəqibim isə yarımfinalda qarşılaşdığım Danimarka idmançısı idi".
Qeyd edək ki, Avropa çempionatında milli üzvlərindən Nicat Hüseynov (51 kq) qızıl, Ruslan Qədirov (54 kq) gümüş, Cəlal Qurbanov (63,5 kq) və Nəbi İsgəndərov (67 kq) bürünc medal qazanıb.
Bölmənin digər xəbərləri
