AVROPA ƏDALƏTLİ OYUNLAR HƏRƏKATI İCRAÇI KOMİTƏSİNİN AZƏRBAYCANDA KEÇİRİLƏCƏK KONQRESİNƏ HAZIRLIQ MƏSƏLƏLƏRİ MÜZAKİRƏ EDİLMİŞDİR
Bakı, 16 may (AZƏRTAC). Mayın 16-da Bakıda ölkəmizdə səfərdə olan Avropa Ədalətli Oyunlar Hərəkatının İcraçı Komitəsi (AƏOHİK), Gənclər və İdman Nazirliyi, Milli Olimpiya Komitəsi və Azərbaycan Ədalətli Oyunlar Komissiyası nümayəndələrinin iştirakı ilə iclas keçirilmişdir.
İclasda AƏOHİK-in cari ilin oktyabrında Azərbaycanda keçiriləcək konqresinə hazırlıq məsələləri müzakirə edilmişdir.
İclasın yekunlarına həsr olunmuş mətbuat konfransında AƏOHİK-in prezidenti Karlos Qonsalves rəhbərlik etdiyi qurumun yaranma tarixindən danışmışdır. Bildirmişdir ki, hərəkatın məqsədi idmanda və cəmiyyətdə ədalət və etik prinsiplərin qorunmasını təmin etmək, idmanda ədalətli mübarizə ruhunu, yüksək mədəni davranış qaydalarını aşılamaqdır. O vurğulamışdır ki, yarandığı dövrdə 14 ölkənin daxil olduğu qurumun hazırda 40 ölkədən üzvləri vardır.
Azərbaycanın idman sahəsində qazandığı uğurlardan xəbərdar olduğunu bildirən K.Qonsalves bu naliyyətləri yüksək qiymətləndirmişdir. Məlumat vermişdir ki, Azərbaycanın AƏOHİK-ə verdiyi dəstəyi və onun fəaliyyətində yaxından iştirakı nəzərə alınaraq qurumun ötən ilin mayında Nikosiya şəhərindəki iclasında AƏOHİK-in növbəti konqresinin bu ilin oktyabrında Bakıda keçirilməsinə dair yekdilliklə qərar qəbul edilmişdir.
Qonaq vurğulamışdır ki, idman mədəniyyətlərarası dioloqun yaradılmasında mühüm bir vasitədir və məhz bu amil nəzərə alınaraq ədalətli oyunların mədəniyyətlərarası dialoqda rolu keçiriləcək konqresin əsas mövzusu olacaqdır.
Konqresdə Avropanın 30-a yaxın milli ədalətli oyunlar təşkilatının mütəxəssisləri iştirak edəcəklər.
Milli Olimpiya Komitəsinin vitse-prezidenti Çingiz Hüseynzadə konqresin ölkəmizdə keçirilməsini yüksək qiymətləndirmiş və uğurlu nəticələr əldə ediləcəyinə əmin olduğunu bildirmişdir.
######
Bölmənin digər xəbərləri
