Bakı, 23 sentyabr, AZƏRTAC

Daxili bazarda sabitliyi təmin etmək üçün Rusiyanın benzin və dizel ixracına qoyduğu müvəqqəti məhdudiyyətdən sonra Avropada dizel yanacağının qiyməti 5 faiz bahalaşıb.

AZƏRTAC “The Guardian” qəzetinə istinadla xəbər verir ki, hazırda Avropa bazarlarında bir ton dizel yanacağının qiyməti min dolları ötüb.

Sentyabrın 21-də Rusiya hökuməti benzin və dizel ixracına müvəqqəti məhdudiyyət tətbiq edib. Rusiya energetika nazirinin birinci müavini Pavel Sorokin qadağanın hələlik müddətsiz olduğunu bildirib və deyib ki, müddət bazardan və tədbirin nəticələrindən asılı olacaq.