Avtobus sürücülüyündən La Liqaya – “Sadə oğlan”ın maraqlı həyat hekayəsi
Bakı, 31 oktyabr, AZƏRTAC
Futbol üzrə İspaniya La Liqasında bu mövsüm liderlər sırasında sürpriz komanda var.
AZƏRTAC xəbər verir ki, “Espanyol” 10 turdan sonra 18 xalla 5-ci pillədə qərarlaşıb. Bu komandanı 2-ci sırada yer alan “Barselona”dan cəmi 4 xal ayırır.
“Espanyol”un uğurlu çıxışının əsas səbəbkarlarından biri baş məşqçisi Manolo Qonsalesdir. Ötən ilin mart ayında komandanın sükanı arxasına keçən mütəxəssisin kifayət qədər maraqlı hekayəsi var.
1979-cu ildə Qalisiya kəndində anadan olan Qonsales 3 yaşı olarkən ailəsi ilə birlikdə Barselonaya köçüb. Elə futbola da orada başlayıb. Xasiyyətcə Bolqarıstan millisinin əfsanəvi oyunçusu Xristo Stoiçkova oxşarlığına görə komanda yoldaşları ona “Stoiçkov” ləqəbini verib. Qonsales futbolçu karyerası ilə bağlı danışarkən maraqlı məqamlara toxunub: “Yaxşı oyunçu idim, amma başımı işlədə bilmirdim. İnkişafıma mane olan amil həmin vaxtkı davranışlarım olub. Ona görə də indi oyunçularımda eyni səhvləri görəndə dərhal müdaxilə edirəm”.
Məşqçilik karyerasına cəmi 16 yaşında başlayan Qonsales nə vaxtsa bu işlə peşəkar səviyyədə məşğul olacağını heç vaxt düşünməyib: "Futbolu sevirdim, amma bir gün La Liqada məşqçi olacağımı heç vaxt xəyal etməzdim. Mənə oyunu anlamağı, meydanı fərqli görməyi keçmiş məşqçim Antonio Sançes öyrədib. Amma seçim şansım olsaydı, futbolçu olmaq istərdim”.
İspaniyalı çalışdırıcı bu peşəyə sürücülükdən gəlib. O, 2018-ci ilə qədər gündüzlər avtobus sürücüsü, axşamlar isə məşqçi kimi çalışıb: “Səhər 5-də işə başlayır, günortadan sonra məşqə gedir, gec saatlarda evə qayıdırdım. Təəssüf ki, insanlar yalnız bu günü görür, illərin zəhmətini unudur”.
İspaniyanın B Sequnda təmsilçisi “Badalona” klubu ilə Kral Kubokunda “Xetafe”ni mübarizədən kənarlaşdırdıqdan sonra diqqətləri üzərinə çəkən Qonsales ardınca “Penya Deportivo”nu 2 dəfə ardıcıl pley-off mərhələsinə daşımaqla bir növ özünü sübut etdi. Bu uğurlar isə ona “Espanyol”un ikinci komandasının qapılarını açdı. 2023-cü ildə Barselona təmsilçisində işə başlayan mütəxəssis qısa zamanda A komandasının baş məşqçisi təyin olundu. Çətin dövrdə kifayət qədər “ağır yük”ün altına girən Qonsales çətin sınaqdan üzüağ çıxmağı bacardı və komandanı elitaya qaytardı: “La Liqaya yüksəlmək mənim üçün lotereya kimiydi, amma buna layiq olduğumu düşünürəm. Çünki bu, sadəcə şans deyil. Bu hekayədə illərin zəhməti, yuxusuz gecələr və inam var. Oyunçularım mənə, mən də onlara inandım”.
Hazırda “Espanyol” azarkeşlərinin ən sevimli məşqçisi kimi tanınan Manolo Qonsales hələ də öz sadəliyi ilə seçilir: "Futbol məni dəyişdirməyib. Mənim missiyam oyunçularımı inkişaf etdirməkdir. Karyeranızın istiqamətini həyat özü müəyyənləşdirir”.
İllərlə şəhərlərarası avtobus sürən və həvəskar liqalarda məşqçilik edən həmin "sadə oğlan" indi İspaniyanın yüksək liqasındadır. Və bəlkə də buna görə onun uğur hekayəsi hər kəsə ilham verir.
Bölmənin digər xəbərləri
