Ayaz Mirzəyev: "Yaradan" dağıntıdan şəhər yaradan Azərbaycan xalqı haqqında filmdir
Bakı, 20 may, AZƏRTAC
"Yaradan" sırf dağıntıdan şəhər yaradan Azərbaycan xalqı haqqında filmdir. Yaradıcı insanlardan, sadə briqadirlərdən, fəhlələrdən tutmuş rəssamlar, heykəltaraşlar və işğaldan azad olunmuş ərazilərdə bərpa-quruculuq işini görən hər kəs bu filmdə yer alıb.
AZƏRTAC xəbər verir ki, bunu Ümumdünya Şəhərsalma Forumunun 13-cü Sessiyası (WUF13) çərçivəsində keçirilən “Gələcəyin qurulması: Qarabağ və Şərqi Zəngəzurda müasir yaşayış məhəllələrinin yaradılması” tədbirində jurnalistlərə açıqlaması zamanı “Yaradan” filminin ssenari müəllifi, “Azərbaycan Jurnalistlər Şəbəkəsi” İctimai Birliyinin sədri Ayaz Mirzəyev deyib.
O, filmin məqsədindən bəhs edərək deyib: “Biz azərbaycanlılar yaradıcı insanlarıq, başqalarından fərqli olaraq heç vaxt dağıdıcı olmamışıq. Biz yerlə-yeksan olunmuş, daş daş üstünə qalmamış, işğaldan azad olunmuş ərazilərdə çox qısa vaxt ərzində kiçik cənnət yaratdıq. Çox qısa bir vaxt ərzində də böyük qayıdış reallaşdı və bizim Azərbaycan insanı həmin ərazilərə qayıdır”.
A.Mirzəyev qeyd edib ki, bugünkü təqdimatın məqsədi gələn qonaqlara son beş il ərzində görülən işlər barədə məlumat vermək və ora köçən insanların təəssüratını çatdırmaqdır. Çünki işğaldan azad olunmuş ərazilərdə WUF13 prinsiplərinə uyğun addımlar atılıb.
Bölmənin digər xəbərləri
