“AZƏRBAYCAN 2006 - TURİZM DÜNYASI” FOTOMÜSABİQƏSİ BAŞA ÇATMIŞDIR
Müsabiqəyə Bakı, Gədəbəy, Masallı, Qax, Lerik, Qusar, Zaqatala, Balakən, Lənkəran və Tovuz rayonlarının 77 peşəkar və həvəskar fotoqrafının 700-dən çox işi təqdim edilmişdir.
Mədəniyyət və turizm naziri Əbülfəs Qarayev mərasimdə çıxış edərək bildirmişdir ki, fotomüsabiqə ölkəmizin tarixinin, mədəni və tarixi irsinin, xalqımızın özgünlüyünün, Azərbaycan təbiətinin müxtəlifliyinin, gözəlliyinin və təkrarsızlığının təbliği məqsədilə keçirilmişdir. Təqdim olunan fotolarda turizm və istirahət sahəsində qazanılmış nailiyyətlər, mehmanxana, mədəniyyət-istirahət, idman mərkəzlərinin dünya standartlarına uyğun gəlməsi, ekstremal turizm növlərinin mümkünlüyü öz əksini tapmışdır. Bu çox vacibdir, axı, bu il Azərbaycanda turizm xidmətlərindən 1 milyondan çox adam istifadə etmişdir.
Müsabiqə dörd kateqoriya üzrə keçirilmiş və qaliblər müəyyənləşdirilmişdir.
A kateqoriyası – Azərbaycan təbiəti üzrə 1-ci yeri Emil Xəlilov (Xızı dağları), 2-ci yeri Asim Talıbov (Xınalıq çayı), 3-cü yeri İlham Kişiyev (Şahdağın ətəyində) tutmuşlar.
B kateqoriyası üzrə (İrs) Mirnaib Həsənoğlu (Çıraqqala), Tofiq Babayev (Baba və nəvə), Elçin Əliyev (Nehrəm kəndində məscid) fərqlənmişlər.
C kateqoriyasında – (Əyləncə və istirahət) Cəmilə Əsgər qızı (İnsan yuvası), Asim Talıbov (Ay işığı, kottec, Nabran) və Denis Safronov (Bahar bayramı) qalib gəlmişlər.
D kateqoriyası üzrə (Mənim Azərbaycanım) ilk üç yeri Şahin Hüseynov (Kənd uşaqları), Aqdes Bağırzadə (Xaç analıqları) və Afaq Hüseynova tutmuşlar.
Bundan əlavə, “Azerbaijan reviem” jurnalı və Azərbaycan Fotoqraflar Birliyi ən yaxşı əsərlər üçün xüsusi mükafatlar və qiymətli hədiyyələr təsis etmişdi.
Bölmənin digər xəbərləri
